2 Kroniklys 27 - An Bibel Kernewek 20234 (Kernewek Kemmyn)

Reyn Yotham

¹ Yotham o pymp bloedh warn ugens pan dhallathas reynya, hag ev a reynyas hwetek blydhen yn Yerusalem. Hanow y vamm o Yerusha myrgh Sadok.

² Ev a wrug an pyth o ewn yn golok an Arloedh par dell re wrussa y das Uzzia, saw ny entras y'n tempel an Arloedh. Mes an bobel a besyas yn aga drogobereth.

³ Ev a dhrehevis an yet wartha yn chi an Arloedh, hag a wrug drehevyansow pals war fos Ofel.

⁴ Dres henna ev a dhrehevis sitys yn bro venydhyek Yuda, ha dinasow ha touryow war an breow koesek.

⁵ Ev a vatalyas orth myghtern an Ammonysi ha'y fetha. An Ammonysi a ros dhodho y'n vlydhen na kans talent a arghans, deg mil gor a ys ha deg mil a heydh. An Ammonysi a dylis an keth myns y'n nessa hag y'n tressa blydhen.

⁶ Ytho Yotham eth ha bos krev drefenn ev dhe witha y fordhow kompes a-rag an Arloedh y Dhuw.

⁷ Gweythresow erell Yotham, hag oll y vreselyow ha'y fordhow, yw skrifys yn Lyver Myghternedh Ysrael ha Yuda.

⁸ Ev o pymp bloedh warn ugens pan dhallathas reynya, hag ev a reynyas hwetek blydhen yn Yerusalem.

⁹ Yotham a goskas gans y dasow, hag i a'n ynkleudhyas yn sita Davydh; ha'y vab Ahaz a reynyas yn y le.