2 Kroniklys 15 - An Bibel Kernewek 20234 (Kernewek Kemmyn)

¹ Spyrys Duw a dheuth war Azaria mab Oded.

² Ev eth yn-mes rag metya gans Asa, hag a leveris dhodho, ‘Goslow orthiv, Asa hag oll Yuda ha Benyamin. Yma an Arloedh genowgh, ha hwi ganso. Mara's hwilowgh, ev a vydh kevys genowgh, mes mara's gesowgh, ev a'gas gas.

³ Termyn hir y feu Ysrael heb an gwir Dhuw, ha heb oferyas dhe dhyski, ha heb lagha,

⁴ mes pan dreylsons yn aga ahwer dhe'n Arloedh, Duw Ysrael, ha'y hwilas, kevys veu gansa.

⁵ Y'n termynyow na, ny ylli tus mos yn-mes na dos a-ji yn sawder, drefenn an deray bras esa war oll trigoryon an tiryow.

⁶ Terrys yn temmigow yth ens, gwlaskor erbynn gwlaskor ha sita erbynn sita, rag yth esa Duw orth aga throbla gans ankres a bub eghenn.

⁷ Mes hwi, bedhewgh krev, ha na esewgh dh'agas diwla bos lows; rag y fydh pewas a'gas ober.’

⁸ Pan glewas Asa an geryow ma, profoesans Azaria mab Oded, kennerthys o, hag ev a dhefendyas dhe-ves an taklow kasadow dhiworth oll tiredh Yuda ha Benyamin ha dhiworth an sitys re gemmersa yn bro venydhyek Efraym. Ev a ewnhas alter an Arloedh esa a-rag portal chi an Arloedh.

⁹ Ev a guntellas oll Yuda ha Benyamin, ha'n tus a Efraym, Manasse, ha Simeon esa trigys gansa avel alyons, rag lies re gilfisa dhodho dhiworth Ysrael pan wodhyens bos an Arloedh y Dhuw ganso.

¹⁰ Omguntellys yth ens yn Yerusalem y'n tressa mis a'n pymthegves blydhen a reyn Asa.

¹¹ I a sakrifias dhe'n Arloedh y'n jydh na, dhiworth an preydh re dhrosens, seyth kans ojyon ha seyth mil dhavas.

¹² I a entras yn kevambos dhe hwilas an Arloedh, Duw aga thasow, gans oll aga holon ha gans oll aga enev.

¹³ Piw pynag ny vynna hwilas an Arloedh, Duw Ysrael, y tegoedhva may fedha ledhys, po yowynk po koth, po gour po benyn.

¹⁴ I a dos ti dhe'n Arloedh gans lev ughel, ha gans garma, ha gans hirgern ha gans kern.

¹⁵ Oll Yuda a lowenhas orth an ti; rag i re dosa gans oll aga holonn. I a'n hwilas gans oll aga bodh, hag ev o kevys gansa. Ha'n Arloedh a ros dhedha powes oll a-derdro.

¹⁶ Ynwedh ev a wordhellos Maaka mamm myghtern Asa dhiworth hy soedh avel mamm-vyghternes, drefenn hi dhe wruthyl imaj kasadow a Ashera. Asa a droghas dhe'n dor hy thra gasadow ha'y vrewi ha'y leski yn nans Kidron.

¹⁷ Nyns o an tylleryow ughel kemmerys yn-mes a Ysrael. Byttegyns kolonn Asa o perfydh oll y dhydhyow.

¹⁸ Ev a dhros yn chi Duw rohow sakrys y das ha'y rohow sakrys y honan – arghans, owr ha daffar.

¹⁹ Ha nyns esa bresel vytholl bys an pymthegves blydhen warn ugens a reyn Asa.