2 Kroniklys 10 - An Bibel Kernewek 20234 (Kernewek Kemmyn)

An Rebellyans erbynn Rehoboam

¹ Rehoboam eth dhe Shekem, rag oll Ysrael re dhothya dhe Shekem ma'n gwrellens myghtern.

² Pan glewas Yeroboam mab Nebat a-dro dhe henna, (rag yth esa ev yn Ejyp, may fisa a vyghtern Solomon), ev a dhehwelis dhiworth Ejyp.

³ I a dhannvonas ha'y elwel, ha Yeroboam hag oll Ysrael a dheuth hag a leveris dhe Rehoboam,

⁴ ‘Dha das a wre agan yew poes. Lemmyn ytho skavha an lavur kales ha'n yew boes a worras warnan, ha ni a'th serv.’

⁵ Ev a leveris dhedha, ‘Deus dhymmo vy wosa tri dydh.’ Yndella an bobel eth dhe-ves.

⁶ Ena myghtern Rehoboam a omgusulyas gans an henavogyon a sevi a-rag y das Solomon hag ev hwath yn few, ow leverel, ‘Fatell y'm kusulyowgh a worthybi dhe'n bobel ma?’

⁷ I a worthybis dhodho, ‘Mara pydhydh hegar orth an dus ma ha'ga flesya ha kewsel geryow da dhedha, ena i a vydh dha wesyon bys vykken.’

⁸ Mes ev a skonyas an gusul a ros an henavogyon dhodho hag ev a omgusulyas gans an yonkoryon re devsa ganso, esens ow sevel a-ragdho lemmyn.

⁹ Ev a leveris dhedha, ‘Pana gusul a'gas beus rag may hworthyppiv dhe'n bobel ma, re leveris dhymm, “Skavha an yew a worras dha das warnan”?’

¹⁰ An yonkoryon re devsa ganso a leveris dhodho, ‘Yndellma y tegoedh dhis kewsel dhe'n bobel a leveris dhis, “Dha das a wrug poes agan yew, mes res yw dhis hy skavhe ragon”; lavar dhedha, “Ow bys byghan yw tewa agas diwglun ow thas.

¹¹ Ow thas a worras warnowgh yew boes; my a geworr dh'agas yew. Ow thas a'gas skorjyas gans hwyppys, mes my a'gas skorj gans skorpyones.” ’

¹² Yeroboam hag oll an bobel a dheuth dhe Rehoboam wosa tri dydh, dell lavarsa an myghtern, ‘Deus dhymmo arta wosa tri dydh.’

¹³ An myghtern a worthybis dhedha yn harow. Myghtern Rehoboam a skonyas kusul an henavogyon;

¹⁴ ev a leveris dhedha herwydh kusul an yonkoryon, ‘Ow thas a wre poes aga yew, mes my a geworr dhedhi. Ow thas a'gas skorjyas gans hwyppys, mes my a'gas skorj gans skorpyones.’

¹⁵ Yndella ny woslowas an myghtern orth an bobel, drefenn bos hemma destnys gans Duw, dhe gewera an ger kewsys gans an Arloedh der Ahiya an Shilonyas dhe Yeroboam mab Nebat.

¹⁶ Pan gonvedhas oll Ysrael na vynna an myghtern goslowes orta, an bobel a worthybis dhe'n myghtern, ‘Pana rann a'gan beus yn Davydh? Ny'gan beus eretons yn mab Yesse. Dh'agas tyldow, A Ysrael! Mir lemmyn dhe'th chi dha honan, Davydh.’ Yndella oll Ysrael eth dhe-ves dh'aga thyldow.

¹⁷ Mes Rehoboam a reynyas war an Ysraelysi esa trigys yn sitys Yuda.

¹⁸ Myghtern Rehoboam a dhannvonas Hadoram, a'n jevo charj a'n lavur konstrynys, mes an Ysraelysi a'n labydhas dhe'n mernans. Myghtern Rehoboam a spedyas dhe yskynna yn y jarett ha fia dhe Yerusalem.

¹⁹ Yndella Ysrael re beu yn rebellyans erbynn chi Davydh bys y'n jydh hedhyw.