2 Korinthianys 9 - An Bibel Kernewek 20234 (Kernewek Kemmyn)

An Ro rag an Syns

¹ Nyns eus dhymm edhomm a skrifa a-dro dhe'n menystrans dhe'n syns,

² rag my a woer agas frethter may fostyav dhe dus Makedonia a-dro dhywgh, ow leverel dhedha bos Aghaia parys nans yw blydhen; ha'gas diwysygneth re gentrynnas an rann vrassa anedha.

³ Ha my a dhannvonas an vreder ma na ve gwrys koeg agan bostyans a-dro dhywgh y'n mater ma, mes may fewgh hwi parys, dell leveris vy;

⁴ poken mar teu tus Makedonia genev vy ha kavoes nag owgh hwi parys, ni a'gan bia meth y'n omgemmeryans ma – heb kampoella travyth a-dro dh'agas meth agas honan.

⁵ Rakhenna, dell dybis vy, res o pysi an vreder a vos yn-rag dhywgh dhe ordena a-brys an ro hel dedhewys genowgh; y'n fordh ma parys vydh avel ro hel, ha ny vydh avel neppyth kemmerys dre nerth.

⁶ Attendyewgh hemma: piwpynag a hasso boghes, ev a wra mysi boghes ynwedh; ha piwpynag a hasso yn pals, ev a wra mysi yn pals ynwedh.

⁷ Res yw dhe bub huni ri an pyth a erviras yn y golonn, heb anvodh po heb bos ynniys: rag Duw a gar riyas lowenek.

⁸ Ha Duw a yll gul dhe ras oll palshe dhywgh, ha rakhenna, prest ow kavoes pup-tra lowr, hwi a balsha yn pub ober da.

⁹ Dell yw skrifys, ‘Ev re rannas, ev re ros dhe'n voghosogyon, ha'y wiryonedh a dhur bys vykken.’

¹⁰ Lemmyn ev, neb a brovi has dhe'n gonador, a wra provia bara rag boes ha palshe agas has ha kressya trevas agas ewnder;

¹¹ gwrys vydhowgh rych, yn oll sempledh, ha'n siwyans a henna a vydh grasyans dhe Dhuw dredhon ni,

¹² drefenn bos menystrans an gonis ma ow provia rag edhommow an syns, keffrys palshe gans meur a rasow dhe Dhuw;

¹³ yn prov an menystrans ma hwi a wordh Duw dre wostytter agas avowans a aweyl Krist, ha der agas helder ow kevrenna gansa ha gans tus oll,

¹⁴ hag i ow pysi ragowgh hwi hag ow yeuni war agas lergh drefenn an gras dres musur re ros Duw dhywgh hwi.

¹⁵ Grasow re bo dhe Dhuw a'y ro na yllir y dheskrifa.