2 Korinthianys 5 - An Bibel Kernewek 20234 (Kernewek Kemmyn)

¹ Rag ni a woer hemma: mars yw distruys agan chi y'n bys, an tylda ma, yma dhyn drehevyans a Dhuw, chi nag yw gwrys gans leuv, a dhur bynitha y'n nevow.

² Yn hwir, ni a gyn y'n tylda ma, ow yeuni gwiska agan trigva nevek a-dro dhyn;

³ rag ena, ha ni gwiskys, ny vydhyn kevys noeth.

⁴ Yn tevri, ha ni hwath y'n tylda ma, ni a gyn ha beghys on, drefenn na vynnyn ni diwiska mes gwiska hwath moy, may fo an pyth yw marwel kollenkys gans bewnans.

⁵ Lemmyn, ev neb re'gan gwrug rag an pur dra ma yw Duw, re ros dhyn mewgh an Spyrys.

⁶ Prest leun a fydhyans on ni, ytho; ha ni a woer, ha ni yn chi y'n korf, agan bos a-dre dhiworth an Arloedh,

⁷ rag ni a gerdh dre fydh, a-der dre wolok.

⁸ Fydhyans a'gan beus, ytho, ha gwell via genen mos a'n korf, ha dos dhe-dre dhe'n Arloedh.

⁹ Rakhenna, mars eson ni po yn tre po a-dre, mall yw genen ni bos plegadow dhodho.

¹⁰ Rag y telledh ni oll dhe omdhiskwedhes a-rag barr Krist, may tegemmerro kettep penn an pyth a goedh dhodho herwydh an traow gwrys, hag ev y'n korf, po da po drog.

An Menystrans a Unnverheans

¹¹ Ytho, ha ni ow kodhvos own an Arloedh, ni a berswad tus dhe grysi, hag aswonnys yn ta on ni gans Duw; hag yma govenek dhymm agan bos aswonnys yn agas kowses hwi ynwedh.

¹² Nyns eson ni owth omgommendya dhywgh arta, mes ow ri dhywgh spas dhe vostya a-dro dhyn, may hyllowgh gorthybi dhe'n re neb a vost y'n pyth yw gwelys, a-der an pyth usi y'n golonn.

¹³ Rag mars on ni mes a'gan rewl, a-barth Duw yth yw; mars yw yagh agan brys, ragowgh hwi yth yw.

¹⁴ Rag kerensa Krist a'gan stroeth, drefenn agan kryjyans dhe vos ha bos fyrv y ferwis onan a-barth oll, rakhenna oll re verwis;

¹⁵ hag ev a verwis a-barth oll, ma na vewa an re vew dhedha aga honan na fella, mes dhodho ev neb a verwis hag a veu dastrehevys a-barth dhedha.

¹⁶ Ytho, alemma rag, ny aswonnyn ni denvyth yn maner dhenel; yn tevri, mar aswonnsyn ni Krist yn maner dhenel, lemmyn ny'n aswonnyn yndella na fella.

¹⁷ Ytho, mars eus nebonan yn Krist, kreasyon nowydh yw; tremenys dhe-ves yw an traow koth: otta, deuvons ha bos nowydh.

¹⁸ Ha pup-tra yw dhiworth Duw, neb re'gan unnverhas dhodho y honan dre Grist, ha neb re ros dhyn ni an menystrans a unnverheans;

¹⁹ henn yw, yth esa Duw yn Krist, owth unnverhe an bys dhodho y honan, heb rekna aga drogoberow er aga fynn, hag ev re worras yn agan charj an geryow a unnverheans.

²⁰ Rakhenna, a-barth Krist kannasow on ni, kepar dell vo Duw ow pledya dredhon. Ni a'gas pys, a-barth Krist, bedhewgh unnverhes gans Duw.

²¹ A-barth dhyn ni ev a wrug dhodho, neb na wodhva pegh, bos pegh, may teffen ni ha bos ewnder Duw ynno ev.