2 Korinthianys 11 - An Bibel Kernewek 20234 (Kernewek Kemmyn)

Powl ha'n Fals Abesteli

¹ Unnweyth a'm godhaffewgh nebes y'm follneth! mes yn tevri yth esowgh orth ow kodhevel.

² Avi a'm beus ragowgh, gans avi Duw, drefenn my dh'agas dedhewi dhe unn gour, rag agas profya avel gwyrghes pur dhe Grist,

³ Mes yma own dhymm, par dell doellas an sarf Eva der y felder, yma own dhymm bos agas brysyow dynys yn neb fordh dhiworth an sempledh ha'n lenduri usi yn Krist.

⁴ Rag yn tevri mar teu nebonan dhe bregoth Yesu arall neb na bregewthsyn ni, po mar tegemmerowgh ken spyrys ages an spyrys a dhegemmersowgh, po ken aweyl ages an aweyl a ressevsowgh, fest yn ta y'n godhevowgh.

⁵ Byttegyns, my a dyb nag ov kammenn vyth gweth ages an abesteli worughel ma.

⁶ Mes mars ov vy yn hwir heb sleyghneth owth arethya, nyns ov vy yndella yn godhvos, hag yn pub fordh ni re wrug henna fest apert dhywgh.

⁷ A beghis vy owth omuvelhe may fewgh hwi ughelhes drefenn my dhe bregoth aweyl Duw heb kost dhywgh?

⁸ Eglosyow erell a ledris vy ow kemmeres gobrow rag menystra dhywgh,

⁹ ha pan esen vy yn agas mysk, ha my edhommek, nyns en vy begh dhe dhenvyth; rag an vreder a dheuth dhiworth Makedonia a brovias an taklow a fylli dhymm, hag yn pub fordh my a omwitha ma na ven vy begh dhywgh, hag yndella my a wra pesya.

¹⁰ Ynnov vy yma gwiryonedh Krist, ma na vydh lettys ow bostyans yn powyow Aghaia.

¹¹ Praga? Drefenn na'gas karav? Gwrav, dell woer Duw.

¹² Ha'n pyth a wrav, henna my a wra pesya y wul, may tregghiv an grond a-dhann an re a hwila chons dhe vos aswonnys agan parow y'n taklow a vostyons anedha.

¹³ Tus a'n par na yw fals abesteli, gonisogyon ow toella, neb a dreusfurv aga honan dhe abesteli Krist.

¹⁴ Nyns yw marth: rag Satnas y honan a dreusfurv y honan dhe el a wolow.

¹⁵ Nyns yw ankoth, ytho, mar kwra y venysters treusfurvya aga honan dhe venysters a ewnder: may fydh aga diwedh herwydh aga oberow.

Godhevyans Powl avel Abostol

¹⁶ My a lever arta, na dybes denvyth ow bos foll; mes mar kwrewgh hwi, degemmerewgh vy poran kepar ha foll, may hwrylliv nebes bostya.

¹⁷ An pyth a gowsav, ny gowsav herwydh an Arloedh, mes yn fydhyans a vostya, kepar hag yn follneth.

¹⁸ A-ban vost lies war-lergh an kig, my ynwedh a wra bostya.

¹⁹ Rag yn lowen, ow pos fur, hwi a wodhav fellyon;

²⁰ rag y'n godhevowgh, nebonan mara'gas gwra kethyon, nebonan mara'gas preydh, nebonan mar kwra maystri warnowgh dh'y les y honan, nebonan mar omdhrehav, nebonan mara'gas gwysk y'n fas.

²¹ Dhe'm meth, my a lever agan bos re wann. Mes yn pypynag nebonan a vettho (yn follneth y kowsav), my a vedh ynwedh.

²² Ebrowyon yns i? My ynwedh. Ysraelysi yns i? My ynwedh. Has Abraham yns i? My ynwedh.

²³ Menystoryon Krist yns i? (My a gews kepar hag onan mes a'y rewl) onan gwell ov vy: my re lavuryas kalessa meur, my re beu prisonys moy menowgh, my re beu kastigys moy a-has, my re beu ogas dhe'n mernans lieskweyth.

²⁴ Pymp gweyth my a gavas dhiworth an Yedhewon an dew-ugens lash marnas onan.

²⁵ Teyrgweyth kronkys veuv gans gwelynni, unnweyth labydhys veuv, teyrgweyth my a borthas gwrekk gorhel. My re beu y'n mor unn nos hag unn jydh;

²⁶ ow vyajya lieskweyth, yn peryll a avonyow, yn peryll a ladron, yn peryll a'm tus ow honan, yn peryll a Jentilys, yn peryll yn sita, yn peryll yn difeyth, yn peryll y'n mor, yn peryll a fals vreder,

²⁷ yn lavur ha gweyth kales, yn meur a nosow heb kosk, yn nown ha syghes, yn divoetteryow menowgh, yn yeynder ha noethedh.

²⁸ Heb kewsel a daklow erell, an bern a'n eglosyow oll a boes warnav pub dydh.

²⁹ Piw yw gwann, ha nyns ov evy gwann? Piw yw gwrys dhe drebuchya, ha ny dhewav vy?

³⁰ Mar telledh my dhe vostya, my a vost a'n traow a dhiskwa ow gwannder.

³¹ Duw ha Tas an Arloedh Yesu, re bo ev benniges trank heb worfenn, a woer nag esov vy ow leverel gowyow.

³² Yn Damaskus an ethnargh yn-dann vyghtern Aretas a worras gwithysi yn sita tus Damaskus rag ow dalghenna,

³³ ha dyllys dhe'n leur veuv yn kanstell dre fenester y'n fos ha diank dhiworth y dhiwla.