2 Korinthianys 10 - An Bibel Kernewek 20234 (Kernewek Kemmyn)

Powl a Worthyp dhe Grodhvolyow

¹ My ow honan, Powl, a'gas pys dre glorder ha jentilys Krist, my neb yw uvel pan esov fas orth fas yn agas mysk mes hardh dhywgh pan esov dhe-ves ahanowgh:

² lemmyn my a'gas pys, ha my yn agas mysk, na vo edhomm dhymm bos hardh, gans an fydhyans dredho may prederav bedha bos hardh erbynn an re a breder ni dhe gerdhes war-lergh an kig.

³ Rag ni a gerdh y'n kig mes ny werryn war-lergh an kig,

⁴ rag arvow agan gwerryans nyns yns a'n kig mes yma dhedha nerth Duw dhe dhomhwel kastylli, ow tomhwel dadhlow

⁵ ha pub tra woethus hag a sett orth godhvos Duw, hag ow talghenna yn keth pub tybyans rag gul dhodho bos gostydh dhe Grist,

⁶ ha parys on ni dhe gessydhya pub diwostytter pan vo kowlwrys agas gostytter.

⁷ Hwi a vir orth traow herwydh aga semlans. Mar trest nebonan y vos dhe Grist, perthes kov a hemma: kepar dell yw ev dhe Grist, yndella ynwedh yth on ni.

⁸ Rag kyn fostiv nebes re a-dro dh'agan awtorita hag a ros an Arloedh dhyn rag agas drehevyans, a-der agas terri dhe'n leur, ny'm bydh meth anodho.

⁹ Ny vynnav heveli bos ow hwilas agas ownekhe der ow lytherow.

¹⁰ Y leverir gans nebonan, ‘Yn tevri, poesek ha krev yw y lytherow, mes yn agan mysk gwann yw y gorf, ha'y gows y hyllir y dhispresya.’

¹¹ Konvedhes hemma onan a'n par na: an pyth on ni yn ger der agan lytherow, ha ni dhe-ves ahanowgh, yndella ynwedh y fydhyn yn agan ober ha ni yn agas mysk.

¹² Rag ny vedhyn klassa po keheveli agan honan dhe rann a'n re neb a omgommend aga honan, mes pan vusurons aga honan an eyl orth y gila, ha keheveli aga honan an eyl dh'y gila, ny gonvedhons.

¹³ Byttegyns ny wren ni bostya dres musur, mes herwydh musur an rewl re rannas Duw dhyn, dhe dhrehedhes ynwedh bys dhywgh hwi.

¹⁴ Rag nyns esen ni dres agan oryon ow trehedhes dhywgh, rag ynwedh bys dhywgh hwi ni a dheuth yn aweyl Krist,

¹⁵ heb bostya dres musur yn lavur re erell, mes govenek a'gan beus, dell wra agas fydh tevi, agan gwrians dhe gressya yn feur, herwydh an rewl res dhyn,

¹⁶ may pregewtthyn an aweyl y'n powyow yn-hons dhywgh, heb bostya a-dro dhe ober gwrys seulabrys yn ranndir nebonan arall,

¹⁷ mes ‘Neb a vostyo, bostyes y'n Arloedh’;

¹⁸ rag nyns yw ev neb a omgommend y honan neb yw degemmerys, mes ev neb yw kommendys gans an Arloedh.