1 Timothi 3 - An Bibel Kernewek 20234 (Kernewek Kemmyn)

An Pyth yw Gwiw yn Epskop

¹ Sur yw an lavar: Neb a vynn kavoes soedh epskop, a hwila obereth da.

² Y koedh dhe epskop bos divlam, gour unn wreg, sad, doeth, onest, hel dhe westoryon, dyskador da,

³ heb eva re nag omdhal, mes klor, ha digavyllek, heb kara mona;

⁴ rewler da a'y vayni ev, ow kwitha y fleghes ev gostydh ha gwiw yn tien aga fara.

⁵ Den mar ny woer rewlya y vayni ev, fatell wra gwitha eglos Duw?

⁶ Na vedhes ev dyskybel nowydh na goettho yn breus an jowl dre woeth.

⁷ Res yw ynwedh dhodho kavoes dustuni da dhiworth an re usi a-ves, ma na goettho yn disenor ha maglenn an jowl.

An Pyth yw Gwiw yn Dyagon

⁸ Yn kepar maner, res yw dhe dhyagonyon bos sad, heb taves dewblek na hwansek dhe eva re a win na kraf rag gwayn diveth,

⁹ ow synsi mysteri an fydh, glan aga howses.

¹⁰ Ha bedhens i prevys kynsa, ha mar pydhons divlam, gwrens i gonis avel dyagonyon.

¹¹ Yn kepar maner, y koedh dh'aga gwragedh bos sad; na vedhens hwedhloresow, mes klor ha lel yn pup-tra.

¹² Bedhes dyagonyon gwer unn wreg ha rewloryon dha aga fleghes ha'ga mayni i.

¹³ Rag an re a wonis yn ta avel dyagonyon a gyv roweth da ragdha i ha kolonnekter meur y'n fydh yn Krist Yesu.

Kevrin agan Kryjyans

¹⁴ An taklow ma a skrifav dhis ow kwaytya dos dhiso kyns nep-pell.

¹⁵ Mes mar strechyav, ty a wra godhvos fatell yw res omdhegi yn mayni Duw, yw eglos an Duw bew, an pilar ha'n grond a wiryonedh.

¹⁶ Res yw avowa, meur, dhe wir, yw an kevrin a sansoleth: Diskwedhys veu y'n kig, prevys ewn y'n Spyrys, gwelys gans eledh, pregewthys ynter an Jentilys, krysys y'n bys, kemmerys yn-bann yn splannder.