1 Thessalonianys 5 - An Bibel Kernewek 20234 (Kernewek Kemmyn)

¹ Mes nyns yw res skrifa dhywgh a vreder, a-dro dhe'n termynyow ha'n sesonyow;

² rag hwi agas honan a woer yn kewar dydh an Arloedh dhe vos kepar ha lader yn nos.

³ Tus pan leverons, ‘Yma kres ha diogeledh’, ena diswrians tromm a dheu warnedha kepar ha gloes dineythyans dhe venyn gans flogh, ha ny wrons diank mann.

⁴ Mes nyns esowgh hwi, a vreder, yn tewlder, may hwrello an jydh agas kavoes kepar ha lader.

⁵ Rag hwi oll yw mebyon golow ha mebyon an jydh. Nyns on ni a'n nos nag a'n tewlder.

⁶ Ytho, na goskyn kepar ha'n re erell, mes gwren goelyas ha bedhen divedhow.

⁷ Rag an re a gosk, yn nos y koskons, ha'n re a yv, yn nos yth yns medhow.

⁸ Mes, ha ni mebyon an jydh, bedhen divedhow, ow kwiska lurik fydh ha kerensa, hag avel basnett, govenek selwyans.

⁹ Rag ny wrug Duw agan destna dhe sorr mes dhe gavoes selwyans der agan Arloedh Yesu Krist,

¹⁰ neb a verwis ragon, may fewen war-barth ganso, ha ni difun po yn kosk.

¹¹ Rakhenna, kennerthewgh an eyl y gila, ha drehevel an eyl y gila, dell wrewgh yn hwir.

Arghadowyow Diwettha ha Salusyans

¹² Lemmyn, ni a'gas pys a vreder, a aswonn an re a lavur yn agas mysk ha neb a'gas hembronk y'n Arloedh ha'gas keski,

¹³ ha'ga synsi yn ughel dres eghenn yn kerensa drefenn aga gonis. Bedhewgh yn kres an eyl gans y gila.

¹⁴ Ha ni a'gas pys, a vreder, a geski an re yw diek, a hebaskhe an re yw digolonnek, a skoedhya an re yw gwann, hir agas godhevyans troha pub den oll.

¹⁵ Gwaytyewgh nag attallo denvyth drog rag drog, mes pup-prys siwyewgh an pyth yw da, an eyl rag y gila, ha rag pub den oll.

¹⁶ Lowenhewgh pup-prys.

¹⁷ Gwrewgh pysi heb hedhi.

¹⁸ Yn pup-tra, rewgh grasyans, rag hemm yw bolonjedh Duw ragowgh yn Krist Yesu.

¹⁹ Na wrewgh difeudhi an Spyrys.

²⁰ Na wrewgh dispresya profoesans.

²¹ Prevewgh pup-tra, synsewgh an pyth yw da.

²² Omwithewgh rag drog a bub eghenn.

²³ Ha'n Dew a gres y honan re'gas sakkro yn tien; ha'gas spyrys ha'gas enev ha'gas korf kowal re bo gwithys divlam orth devedhyans agan Arloedh Yesu Krist.

²⁴ Lel yw neb a'gas gelow, hag ynwedh ev a wra y gollenwel.

²⁵ A vreder, gwrewgh pysi ragon.

²⁶ Salusewgh an vreder oll gans bay sans.

²⁷ My a'gas charj may fo an lyther ma redys dhe'n vreder oll.

²⁸ Gras agan Arloedh Yesu Krist re bo genowgh hwi.