1 Samuel 3 - An Bibel Kernewek 20234 (Kernewek Kemmyn)

An Arloedh a Elow Samuel

¹ Lemmyn yth esa an maw Samuel ow servya an Arloedh yn-dann Eli. Ger an Arloedh o tanow y'n dydhyow na; ha nyns esa lies gwelesigeth.

² Y'n termyn na, yth esa Eli, may tallathsa y dhewlagas fyllel ma na ylli gweles, ow krowedha yn y le;

³ ny via lugarn Duw difeudhys na hwath, hag yth esa Samuel ow krowedha yn tempel an Arloedh, le mayth esa argh Duw.

⁴ Ena an Arloedh a elwis dhe Samuel, hag ev a worthybis, ‘Ottavy!’

⁵ hag ev a boenyas dhe Eli, ha leverel, ‘Ottavy, rag ty a'm gelwis.’ Mes ev a leveris, ‘Ny elwis; growedh arta.’ Ytho ev eth ha growedha.

⁶ Ha'n Arloedh a elwis arta, ‘Samuel!’ Ha Samuel a sevis ha mos dhe Eli ha leverel, ‘Ottavy, rag ty a'm elwis.’ Hag ev a worthybis, ‘Ny elwis, ow mab; growedh arta.’

⁷ Lemmyn ny aswonnis Samuel an Arloedh na hwath, ha ny via ger an Arloedh diskudhys dhodho na hwath.

⁸ Ha'n Arloedh a elwis Samuel arta, tressa termyn. Hag ev a sevis ha mos dhe Eli, ha leverel, ‘Ottavy, rag ty a'm gelwis.’ Ena Eli a wodhva bos an Arloedh ow kelwel dhe'n maw

⁹ Rakhenna Eli a leveris dhe Samuel, ‘Ke, growedh; mara'th helow, ty a lever, “Kows, Arloedh rag yma dha was ow koslowes.” ’ Ytho Samuel eth ha growedha yn y le.

¹⁰ Ha'n Arloedh a dheuth ha sevel ena ha gelwel kepar ha kyns, ‘Samuel! Samuel!’ Ha Samuel a leveris, ‘Kows, rag yma dha was ow koslowes.’

¹¹ Ha'n Arloedh a leveris dhe Samuel, ‘Otta, my a wra tra a verr spys yn Ysrael a wra dhe dhiwskovarn peub a'n klew kosa.

¹² Y'n jydh na my a gollenow erbynn Eli pup-tra re leveris vy a-dro dh'y ji, a-dhiworth an dalleth dhe'n gorfenn.

¹³ Rag my re leveris dhodho, a verr spys my dhe vreusi y ji bys vykken, rag an kammweyth a wodhya, drefenn bos y vebyon ow molleth Duw, ha ny's lettyas.

¹⁴ Rakhenna my a dos ti dhe ji Eli, na vydh kammweyth chi Eli dasprenys gans sakrifis na offrynn bys vykken.’

¹⁵ Ha Samuel a wrowedhas ena bys y'n myttin; ena ev a igoras darasow chi an Arloedh. Ha Samuel a borthas own a leverel an welesigeth dhe Eli.

¹⁶ Hag Eli a elwis Samuel ha leverel, ‘Samuel, ow mab.’ Hag ev a worthybis, ‘Ottavy.’

¹⁷ Yn-medh ev, ‘Pandr'yw an pyth a leveris an Arloedh dhis? My a'th pys na gudh ev a-dhiworthiv. Re wrello Duw yndella dhis ha moy ynwedh, mar kudhydh neppyth a-dhiworthiv a oll an taklow a leveris ev dhis.’

¹⁸ Ha Samuel a dherivas dhodho pup-tra ha ny gudhas travyth a-dhiworto. Hag ev a leveris, ‘An Arloedh yw; Gwres ev an pyth a hevel da dhodho.’

¹⁹ Ha Samuel a devi yn-bann, hag yth esa an Arloedh ganso, ha ny asas nagonan a'y eryow vyth koedha dhe'n leur.

²⁰ Hag oll Ysrael dhiworth Dan bys yn Beer-sheba a wodhya bos Samuel apoyntys profoes lel a'n Arloedh.

²¹ Ha'n Arloedh a besyas omdhiskwedhes yn Shilo, rag an Arloedh a dhiskwedhas y honan dhe Samuel yn Shilo dre er an Arloedh.