1 Samuel 11 - An Bibel Kernewek 20234 (Kernewek Kemmyn)

Sowl a Feth an Ammonysi

¹ Ena Nahash an Ammonyas a dheuth yn-bann hag omsettya a-dro dhe Yabesh Gilead. Hag oll gwer Yabesh a leveris dhodho, ‘Gwra kevambos genen, ha ni a wra dha servya.’

² Mes Nahash an Ammonyas a worthybis, ‘War an gorholedh ma y hwrav kevambos genowgh, may hallav gorra yn-mes oll agas lagas dyghow, hag yndellma gorra disenor war oll Ysrael.’

³ Henavogyon Yabesh a leveris dhodho, ‘Ro dhyn powesva a seyth dydh may hyllyn dannvon kannasow dhe oll pow Ysrael. Ena, mar nyns eus nagonan dh'agan sawya, ni a dheu yn-mes dhis.’

⁴ An kannasow a dheuth dhe Gibea a Sowl, ha derivas an geryow yn skovornow an bobel; hag oll an bobel a dhrehevis aga lev, hag oela yn ughel.

⁵ Lemmyn yth esa Sowl ow tos a-dhiworth an gwel a-dryv an chatel; ha Sowl a leveris, ‘Pandr'a hwer dhe'n bobel? Prag yth esons i owth oela?’ Ytho i a dherivas dhodho geryow gwer Yabesh.

⁶ Ha Spyrys Duw a dheuth war Sowl pan glewas ev an geryow ma, ha'y sorr a dhewis yn feur.

⁷ Ev a gemmeras yew a oghen, ha'ga threghi yn temmyn ha'ga dannvon der oll pow Ysrael dre leuv kannasow, ow leverel, ‘Piwpynag na dheffo yn-rag wosa Sowl ha Samuel, yndella y fydh gwrys dh'y oghen ev!’ Ena own an Arloedh a goedhas war an bobel, hag i a dheuth yn-mes kepar hag unn gour.

⁸ Pan wrug ev aga huntelles yn Bezek, mebyon Ysrael o tri hans mil, ha mebyon Yuda deg mil warn ugens.

⁹ I a leveris dhe'n kannasow neb a dheuth, ‘Yndella hwi a lever dhe wer Yabesh-gilead: “A-vorow erbynn an termyn may fydh an howl toemm, hwi a'gas bydh delivrans.” ’ An kannasow a dheuth ha derivas hemma orth gwer Yabesh, ha lowen ens.

¹⁰ Rakhenna gwer Yabesh a leveris, ‘A-vorow ni a dheu yn-mes dhywgh, ha hwi a yll gul dhyn pypynag a hevel da dhywgh.’

¹¹ An nessa dydh Sowl a rannas an bobel yn teyr rann, hag orth goel an bora i a dheuth a-bervedh y'n kamp ha ladha an Ammonysi bys toemmder an jydh; ha'n re a veu gesys a skattras, ma nag esa dew anedha gesys war-barth.

¹² An bobel a leveris dhe Samuel, ‘Piw a leveris, “A wra Sowl reynya warnan?” Drewgh an wer dhyn may hyllyn ni aga gorra dhe'n mernans.’

¹³ Mes Sowl a leveris, ‘Na worrewgh dhe'n mernans gour vyth an jydh ma, rag hedhyw an Arloedh re dhros delivrans dhe Ysrael.’

¹⁴ Ena Samuel a leveris dhe'n bobel, ‘Dewgh, deun dhe Gilgal ha nowydhhe an vyghterneth ena.’

¹⁵ Ytho oll an bobel eth dhe Gilgal, hag ena i a wrug Sowl myghtern a-dherag an Arloedh yn Gilgal. Ena i a sakrifias sakrifisow kres a-dherag an Arloedh, hag ena Sowl hag oll gwer Ysrael a lowenhas yn feur.