1 Myghternedh 9 - An Bibel Kernewek 20234 (Kernewek Kemmyn)

Kevambos Duw gans Solomon

¹ Pan worfennas Solomon drehevel chi an Arloedh ha chi an myghtern ha pup-tra a dhesiryas Solomon y dhrehevel,

² an Arloedh a omdhiskwedhas dhodho an eyl termyn dell omdhiskwedhsa dhodho yn Gibeon.

³ An Arloedh a leveris dhodho, ‘My re glewas dha bysadow ha'th pledyans a wrussys a-ragov; my re sakras an chi ma re dhrehevsys, ha gorra ow hanow ena bys vykken; ow lagasow ha'm kolonn a vydh ena bys vykken.

⁴ Ha ty, mar kerdhydh a-ragov, par dell gerdhi dha das Davydh, gans kolonn lan hag ewnhynseth, ow kul herwydh pup-tra a worhemmynnis dhis, hag ow kwitha ow ordenansow ha'm breusow,

⁵ ena my a fast tron dha vyghterneth war Ysrael bys vykken, dell ambosis dhe'th tas Davydh, ow leverel, “Ny fyll dhis gour war dron Ysrael.”

⁶ ‘Mar treylyowgh dhiworthiv, hwi po agas mebyon, ha mar ny withowgh ow gorhemmynnow ha'm ordenansow re settis a-ragowgh, mes mos ha servya duwow erell ha'ga gordhya,

⁷ ena my a dregh Ysrael dhiworth an tir re res vy dhedha; ha my a dewl yn-mes a'm golok an chi re sakris rag ow hanow; hag Ysrael a vydh henlavar ha parabolenn yn mysk poblow oll.

⁸ An chi ma a vydh bern a vagoryow; peub a'n tremen a gemmer skruth ha hwibana; hag i a lever, “Prag y hwrug an Arloedh tra a'n par ma dhe'n tir ma ha dhe'n chi ma?”

⁹ I a worthyp, “Drefenn i dhe eskasa an Arloedh aga Duw, a dhros aga thasow yn-mes a bow Ejyp, ha kemmeres duwow erell, orth aga gordhya ha'ga servya; rakhenna an Arloedh re dhros terroes warnedha.” ’

¹⁰ Dhe benn ugens blydhen, may trehevis Solomon an dhew ji ynna, chi an Arloedh ha chi an myghtern,

¹¹ wosa Hiram myghtern Tyr dhe brovia dhe Solomon prenn keder ha prenn meryw hag owr, kemmys dell vynna, myghtern Solomon a ros dhe Hiram ugens sita yn pow Galile.

¹² Mes pan dheuth Hiram a-dhiworth Tyr rag gweles an sitys a ros Solomon dhodho, ny blegsons dhodho.

¹³ Ytho ev a leveris, ‘Py par sitys yw an re ma re resys dhymm, ow broder?’ Ytho gelwys yns tir Kabul bys y'n jydh ma.

¹⁴ Hiram re dhannvonsa dhe'n myghtern hwegh-ugens talent a owr.

Gwriansow Pella Solomon

¹⁵ Hemm yw derivadow a'n lavur konstrynys a elwis Solomon yn-bann rag drehevel chi an Arloedh ha'y ji y honan, ha'n Millo, ha fos Yerusalem, ha Hasor, Megiddo ha Gezer

¹⁶ (galsa Faro myghtern Ejyp ha kemmeres Gezer ha'y leski gans tan, ha ladha an Kananysi esa trigys y'n sita ha'y ri yn argovrow dh'y vyrgh, gwreg Solomon;

¹⁷ ytho Solomon a dhastrehevis Gezer), ha Beth-horon isel,

¹⁸ Baalath, Tamar y'n gwylvos, a-ji dhe'n tir,

¹⁹ keffrys ha sitys-gwithva Solomon, ha'n sitys rag y jarettow, an sitys rag y vergh, ha pup-tra a dhesiryas Solomon y dhrehevel yn Yerusalem, yn Lebanon, hag yn oll tiredh y vestrynses.

²⁰ Oll an bobel o gesys a'n Amorysi, an Hittysi, an Perizzysi, an Hivysi, ha'n Yebusysi, nag o Ysraelysi –

²¹ aga diyskynnysi o gesys hwath y'n tir, an re na ylli Ysrael aga howlladha – an re ma a veu konstrynys rag lavur kethneth, hag yndella yth yns bys y'n jydh ma.

²² Mes ny gethhas Solomon nagonan a'n Ysraelysi; yth ens y soudoryon, y soedhogyon, y gaslewydhyon, y gaptenyon ha hembrenkysi y jarettow ha'y varghoglu.

²³ Niver an benn-soedhogyon war weyth Solomon o pymp kans ha hanter-kans ow korweles an bobel a wre an gweyth.

²⁴ Wosa myrgh Faro dhe dhos yn-mes a sita Davydh dh'y chi hy honan re dhrehavsa Solomon rygdhi, ev a dhrehevis an Millo.

²⁵ Teyrgweyth y'n vlydhen Solomon a offrynna offrynnow leskys hag offrynnow kres war an alter a dhrehevis rag an Arloedh, ow leski an offrynnow a-rag an Arloedh. Yndella ev a worfennas an chi.

Kenwerth Solomon

²⁶ Myghtern Solomon a dhrehevis lu lestri yn Esyon-geber usi ogas dhe Eloth war lann an Mor Rudh, yn pow Edom.

²⁷ Hiram a dhannvonas y wesyon gans an lu, war-barth gans wesyon Solomon.

²⁸ I eth dhe Ofir, ha kyrghes alena peswar kans hag ugens talent a owr, ha'ga dri dhe Solomon.