1 Myghternedh 8 - An Bibel Kernewek 20234 (Kernewek Kemmyn)

Solomon a Gyrgh Argh an Kevambos dhe'n Tempel

¹ Ena Solomon a guntellas henavogyon Ysrael hag oll pennow an loethow, ha hembrenkysi chiow tasow Ysrael, a-rag myghtern Solomon yn Yerusalem, rag dri argh kevambos an Arloedh yn-mes a sita Davydh, hag yw Sion.

² Oll gwer Ysrael a omguntellas dhe vyghtern Solomon dhe'n goel y'n mis Ethanim, an seythves mis.

³ Oll henavogyon Ysrael a dheuth, ha'n oferysi a gemmeras an argh yn-bann.

⁴ I a dhros yn-bann argh an Arloedh, tylda an kuntelles, hag oll an lestri sans esa y'n tylda; an oferysi ha'n Levysi a's dros yn-bann.

⁵ Myghtern Solomon hag oll kuntelles Ysrael re omguntellsa ganso a-rag an argh, ow sakrifia kemmys deves hag oghen ma na allsons bos reknys na niverys.

⁶ Ena an oferysi a dhros argh kevambos an Arloedh dh'y thyller, yn sentri pervedhel an chi, y'n tyller an moyha sans, yn-dann eskelli an jerubim.

⁷ Rag an jerubim a lesas aga eskelli a-ugh tyller an argh, may hwrug an jerubim kudhans a-ugh an argh ha'y gwelynni.

⁸ An gwelynni a omystynnas mar bell yn-mes mayth o gwelys pennow an gwelynni dhiworth an tyller sans a-rag an sentri pervedhel; mes ny allsons bos gwelys a'n tenewen a-ves; ymons i ena bys y'n jydh ma.

⁹ Nyns esa travyth y'n argh marnas an dhew legh a veyn re worras Moyses ena yn Horeb, le may hwrug an Arloedh kevambos gans fleghes Ysrael, pan dheuthons yn-mes a bow Ejyp.

¹⁰ Ha pan dheuth an oferysi yn-mes a'n tyller sans, kommolenn a lenwis chi an Arloedh,

¹¹ ma na ylli an oferysi sevel dhe venystra drefenn an gommolenn; rag golewder an Arloedh a lenwis chi an Arloedh.

¹² Ena Solomon a leveris, ‘An Arloedh re leveris, ev dhe driga yn tewlder tew.

¹³ Devri my re dhrehevis dhis chi ughel, tyller rag ty dhe driga ynno bys vykken.’

Areth Solomon

¹⁴ Ena an myghtern a dreylyas yn tro ha benniga oll kuntelles Ysrael, hag oll kuntelles Ysrael a'y sav.

¹⁵ Ev a leveris, ‘Benniges re bo an Arloedh, Duw Ysrael, neb gans y leuv re gollenwis an pyth a ambosas a'y anow dhe'm tas Davydh, ow leverel,

¹⁶ “A-dhia'n jydh may tres vy ow fobel Ysrael yn-mes a Ejyp, ny dhewisis sita vyth yn-mes a loethow Ysrael rag drehevel ow chi ynni, may fe ow hanow ena; mes my a dhewisas Davydh dhe vos a-ugh ow fobel Ysrael.”

¹⁷ Hag yth esa yn brys ow thas Davydh drehevel chi rag hanow an Arloedh, Duw Ysrael.

¹⁸ Mes an Arloedh a leveris dhe'm tas Davydh, “Da o bos y'th vrys drehevel chi rag ow hanow;

¹⁹ byttegyns ty ny dhrehevydh an chi, mes dha vab a vydh genys dhis a dhrehav an chi rag ow hanow.”

²⁰ Lemmyn an Arloedh re geweras an ambos a wrug; rag my re sevis yn le ow thas Davydh; hag esedhys ov war dron Ysrael, dell ambosas an Arloedh, ha my re dhrehevis an chi rag hanow an Arloedh, Duw Ysrael.

²¹ My re brovias tyller rag an argh, hag ynni kevambos an Arloedh a wrug gans agan tasow pan y's dros yn-mes a bow Ejyp.’

Pysadow an Sakrans

²² Ena Solomon a sevis a-rag alter an Arloedh yn lok oll kuntelles Ysrael, hag ystynn y dhiwleuv dhe nev.

²³ Ev a leveris. ‘A Arloedh, Duw Ysrael, nyns eus Duw avellos yn nev a-vann na war an nor a-woeles, ow kwitha an kevambos ha tregeredh rag dha wesyon a gerdh a-ragos gans oll aga holonn.

²⁴ Ty re withas an pyth a leversys dhe'th was Davydh ow thas; ty a ambosas gans dha anow ha'y gollenwel hedhyw gans dha leuv.

²⁵ Ytho lemmyn, A Arloedh, Duw Ysrael, gwith rag dha was ow thas Davydh an pyth a leversys dhodho, ow leverel, “Ny fyll dhis nevra gour dhe esedha a-ragov war dron Ysrael, mar mynn dha fleghes gwitha aga fordh, dhe gerdhes a-ragov par dell gerdhsys a-ragov.”

²⁶ Ytho, A Dhuw Ysrael, bedhes afydhys dha er a ambossys dhe'th was Davydh ow thas.

²⁷ ‘Mes a wra Duw triga yn hwir war an dor? Hwath ny yll nev ha nev an nevow dha synsi, myns le an chi ma re dhrehevis!

²⁸ Kemmer vri a bysadow dha was ha'y bledyans, A Arloedh ow Duw, ow koslowes orth an kri ha'n pysadow a bys dha was dhis hedhyw;

²⁹ may fydh igor dha lagasow war-tu ha'n chi ma nos ha dydh.

³⁰ Klew pledyans dha was ha'th pobel Ysrael pan bysons war-tu ha'n tyller ma; ha klew yn nev dha drigva; ha pan glewydh, gav.

³¹ ‘Mar pegh nebonan erbynn y gentrevek ha mars yw erghys dhe wul ti, hag ev a dheu ha ti a-rag dha alter y'th chi ma,

³² ena, klew yn nev, ha gweythres, ha breus dha wesyon, ow tampnya an den kablus dre dhri y fara war y benn y honan ha previ ewn an den gwiryon orth y wobra herwydh y ewnder.

³³ ‘Pan vydh tryghys dha bobel Ysrael a-rag eskerens, wosa pegha er dha bynn, ha treylya arta dhis hag avowa dha hanow, ha pysi ha pledya genes y'n chi ma,

³⁴ ena klew yn nev, ha gava pegh dha bobel Ysrael, ha'ga dri arta dhe'n tir a resys dh'aga thasow.

³⁵ ‘Pan vydh nev deges ha nyns eus glaw drefenn i dhe begha er dha bynn, hag ena i a bys war-tu ha'n tyller ma, gormel dha hanow, ha treylya dhiworth aga fegh, drefenn ty dh'aga hessydhya,

³⁶ ena klew yn nev, ha gav pegh dha wesyon, dha bobel Ysrael, pan dhyskydh dhedha an fordh dha dhe gerdhes ynni; ha dannvon glaw war dha dir, a resys dhe'th pobel avel eretons.

³⁷ ‘Mars eus divoetter y'n tir, mars eus pla, kleves losk, kleves melynheans, hes a lokustes, po lokustes distruel; mar pydh aga eskerens yn esedhva warnedha yn onan a'ga sitys; py pla pynag po kleves pynag yma;

³⁸ ha pan vo pysadow pynag po pledyans pynag gwrys gans den po gans oll dha bobel Ysrael, owth aswonn galarow aga holonn aga honan mayth ystynnons aga diwleuv war-tu ha'n chi ma:

³⁹ ena klew yn nev dha drigva, gav, gweythres, ha ri dhe bub a aswonnydh y golonn herwydh y fordhow, rag ty unnsel a woer an pyth eus yn kolonn mab-den oll;

⁴⁰ ma's teffo own ahanas dydhyow oll aga bewnans war enep an tir a resys dh'agan tasow.

⁴¹ ‘Keffrys, pan dheu estren, nag usi a'th pobel Ysrael, a dir pell drefenn dha hanow

⁴² – rag i dhe glewes a'th hanow meur, a'th leuv grev, ha'th vregh ystynnys – pan dheu estren ha pysi war-tu ha'n chi ma,

⁴³ ena klew yn nev dha drigva, ha gwra herwydh pup-tra a elow an estren warnas, may hwodhvo oll poblow an bys dha hanow ha perthi own ahanas, par dell wra dha bobel Ysrael, ha may hwodhvons bos gelwys dha hanow war an chi ma re dhrehevis vy.

⁴⁴ ‘Mars a dha bobel dhe werrya erbynn aga eskerens, dre fordh bynag y's dannvonydh, hag i a bys dhe'n Arloedh war-tu ha'n sita re dhewissys ha'n chi re dhrehevis vy rag dha hanow,

⁴⁵ ena klew yn nev aga pysadow ha'ga fledyans, ha menten aga hen.

⁴⁶ ‘Mar peghons er dha bynn – rag nyns eus nagonan na begh – ha ty yw serrys gansa ha's redh dhe eskar, mayth ons degys dhe-ves yn kethneth dhe dir an eskar, pell po ogas;

⁴⁷ hwath mar tons dh'aga skians y'n tir may fons kemmerys yn kethneth, ha bos edregus, ha pledya genes yn tir an re a's dug yn kethneth, ow leverel, “Ni re beghas, ha kammwul; ni re wrug drogedh”,

⁴⁸ ha mar tewhelons a leun golonn hag a leun enev yn tir aga eskerens, a's kemmeras yn kethneth, ha pysi dhis war-tu ha'ga thir, a resys dh'aga thasow, an sita re dhewissys, ha'n chi re dhrehevis rag dha hanow,

⁴⁹ ena klew yn nev dha drigva aga fysadow ha'ga fledyans, menten aga hen

⁵⁰ ha gav dha bobel re beghas er dha bynn, hag oll aga threuspassow a wrussons er dha bynn; ha ro dhedha truedh yn golok an re a's dug yn kethneth, ma's teffo truedh warnedha

⁵¹ (rag i yw dha bobel ha dha ertach, a dhresys yn-mes a Ejyp, a gres an fornes horn).

⁵² Bedhes dha dhewlagas igor dhe bledyans dha was, ha dhe bledyans dha bobel Ysrael, ow koslowes orta peskweyth may helwons warnas.

⁵³ Rag ty re's diberthys yn-mes a boblow oll an bys, rag bos dha ertach, kepar dell ambossys dre Moyses dha was, pan dhresys agan tasow yn-mes a Ejyp, A Arloedh Duw.’

Solomon a Vennik an Kuntelles

⁵⁴ Lemmyn pan worfennas Solomon profya an pysadow ma ha'n pledyans ma dhe'n Arloedh, ev a sevis a-dherag alter an Arloedh, le may fia war benn-dewlin ha'y dhiwleuv ystynnys dhe nev;

⁵⁵ ev a sevis ha benniga oll kuntelles Ysrael, ughel y lev:

⁵⁶ ‘Benniges re bo an Arloedh, re ros powes dh'y bobel Ysrael herwydh pup-tra a ambosas; ny fyllis ger vyth a'y ambos da, a gewsis der y was Moyses.

⁵⁷ Bedhes genen an Arloedh agan Duw, par dell o gans agan tasow; bynner re wrello agan gasa na'gan forsakya,

⁵⁸ mes treylya agan kolonn dhodho, dhe gerdhes yn y fordhow, ha gwitha y worhemmynnow, y ordenansow, ha'y vreusow, a worhemmynnis dh'agan tasow.

⁵⁹ Bedhes ow geryow ma, gansa may hwrug vy pysi dhe'n Arloedh dos nes dhe'n Arloedh agan Duw dydh ha nos, dhe ventena ken y was ha ken pobel Ysrael, dell vo edhomm pub dydh;

⁶⁰ may hwodhvo poblow an bys bos an Arloedh Duw; nyns eus nahen.

⁶¹ Ytho re bo agas kolonn perfydh gans an Arloedh agan Duw, ow kerdhes yn y ordenansow hag ow kwitha y worhemmynnow, avel y'n jydh ma.’

Solomon a Offrynn Sakrifisow

⁶² Ena an myghtern, hag oll Ysrael ganso, a offrynnas sakrifis a-rag an Arloedh.

⁶³ Solomon a offrynnas avel offrynn kres dhe'n Arloedh dew warn ugens a ojyon ha hwegh-ugens mil a dheves. Ytho an myghtern hag oll an Ysraelysi a sakras chi an Arloedh.

⁶⁴ An keth jydh na an myghtern a sakras kres an klos esa a-rag chi an Arloedh; rag ena ev a offrynnas offrynn leskys ha'n offrynn greun, ha blonek offrynn kres, drefenn bos re vyghan an alter a vrons esa a-rag an Arloedh rag degemmeres an offrynnow leskys ha'n offrynn greun ha blonek an offrynn kres.

⁶⁵ Ytho Solomon a withas an goel y'n prys na, hag Ysrael oll ganso, kuntelles meur, a Lebo-hamath bys yn nans Ejyp, a-rag an Arloedh, seyth dydh.

⁶⁶ Y'n ethves dydh ev a dhannvonas an bobel dhe-ves; hag i a vennigas an myghtern, ha mos dh'aga thyldow, lowenek hag yn spyrys da drefenn an dader oll a dhiskwedhas an Arloedh dh'y was Davydh ha dh'y bobel Ysrael.