1 Myghternedh 6 - An Bibel Kernewek 20234 (Kernewek Kemmyn)

Solomon a Dhrehav an Tempel

¹ Y'n peswar kans ha peswar-ugensves blydhen wosa fleghes Ysrael dhe dhos yn-mes a Ejyp, y'n peswora blydhen a reyn Solomon war Ysrael, yn mis Ziv, an eyl mis, ev a dhallathas drehevel chi an Arloedh.

² An chi a dhrehevis Solomon rag an Arloedh o tri-ugens kevelin y hys, ugens kevelin y les, ha deg kevelin warn ugens y ughelder.

³ An portal a-rag sentri an chi o ugens kevelin hy les, a-dreus les an chi, ha deg kevelin o hy les a-rag an chi.

⁴ Ha rag an chi ev a wrug fenestri kul gans lattis.

⁵ Hag erbynn fosow an chi ev a dhrehevis ystynnans a-dro dhe'n chi ha'n sentri pervedhel; hag ev a wrug chambouryow oll a-dro.

⁶ An isella leur o pymp kevelin y les; an leur kres o hwegh kevelin y les ha'n tressa o seyth kevelin y les; rag tu a-ves an chi ev a wrug estyll kul war an fos ma na ve gorrys an kebrow yn fosow an chi.

⁷ An chi a veu drehevys a veyn pareusys y'n mengleudh, ma na veu klewys morthol na boel na toul horn vyth y'n tempel pan esa ow pos drehevys.

⁸ Yth esa daras an leur isella war denewen dyghow an chi: yth esa grisyow ow ledya dhe'n leur kres, hag a'n leur kres dhe'n tressa.

⁹ Ytho ev a dhrehevis an chi ha'y worfenna; ev a worheras an chi gans kebrow hag estyll a gederwydh.

¹⁰ Ev a dhrehevis an chambouryow erbynn an chi, pymp kevelin aga ughelder, hag i a veu stegys dhe'n chi gans prenn keder.

¹¹ Ger an Arloedh a dheuth dhe Solomon, ow leverel,

¹² ‘A-dro dhe'n chi ma a dhrehevydh, mar kerdhydh yn ow ordenansow, ha bos gostydh dhe'm breusow ha gwitha oll ow gorhemmynnow ha kerdhes ynna, ena my a fast ow ambos genes, a wrug vy dhe'th tas Davydh.

¹³ My a vydh trigys yn mysk fleghes Ysrael ha ny eskasav ow fobel Ysrael.’

¹⁴ Ytho Solomon a dhrehevis an chi ha'y worfenna.

¹⁵ Ev a bannellyas parosyow pervedhel an chi gans estyll prenn keder; a leur an chi dhe gebrow an nen, ev a's gorheras a-ji gans prenn; hag ev a worheras leur an chi gans plenkys a veryw.

¹⁶ Ev a dhrehevis spas a ugens kevelin rynnys dhiworth delergh an chi gans estyll prenn keder a'n leur dhe'n kebrow, hag ev a dhrehevis hemma avel sentri pervedhel, avel an tyller an moyha sans.

¹⁷ An chi, henn yw an tempel a-ragdho, o dew-ugens kevelin y hys.

¹⁸ An prenn keder a-ji dhe'n chi a'n jevo kervyansow pompyons ha bleujennow igor; pup-tra o prenn keder, nyns esa men dhe vos gwelys.

¹⁹ Ev a bareusis an sentri pervedhel a-ji dhe'n chi, rag gorra ena argh kevambos an Arloedh.

²⁰ Pervedh an sentri pervedhel o ugens kevelin y hys, ugens kevelin y les, hag ugens kevelin yn ughelder; ev a'n gorowras gans owr pur. Ev a worlownyas an alter ynwedh gans prenn keder.

²¹ Solomon a worlownas pervedh an chi gans owr pur, ena ev a dennas kadonyow owr a-dreus, a-rag an sentri pervedhel, a veu gorlownys gans owr.

²² Ev a worlownas gans owr oll an chi bys pan worfennsa oll an chi; hwath an alter esa y'n sentri pervedhel ev a worlownas gans owr.

Meblans an Tempel

²³ Y'n sentri pervedhel ev a wrug dew jerub a brenn oliv, pubonan deg kevelin yn ughelder.

²⁴ Pymp kevelin o hys unn askell a'n cherub, ha pymp kevelin o hys askell arall an cherub; deg kevelin o a vleyn unn askell dhe vleyn hy ben.

²⁵ Ha'n cherub arall o deg kevelin; an dhew jerub a's tevo an keth myns ha'n keth furv.

²⁶ Ughelder an unn cherub o deg kevelin, ha'n keth o ughelder an cherub arall.

²⁷ Ev a worras an cherubim a-ji dhe'n sentri pervedhel; eseli an cherubim o lesys may tochyas askell onan anedha an eyl fos, hag askell y gila a dochyas an fos arall; aga eskelli erell tu ha kres an chi a dochyas askell dhe askell.

²⁸ Ev a worlownas an cherubim ynwedh gans owr.

²⁹ A-dro dhe barosyow an chi ev a gervyas cherubim, palmwydh, ha bleujennow igor, a-ji hag a-ves.

³⁰ Leur an chi ev a worlownas gans owr y'n stevellow a-ji hag a-ves.

³¹ Rag porth an sentri pervedhel ev a wrug darasow a brenn oliv; penn an daras ha'n postow o pympkornek.

³² Ev a gudhas an darasow a brenn oliv gans kervyansow a jerubim, palmwydh, ha bleujennow igor; ev a's gorlownas gans owr, ha mortholya owr war an cherubim ha war an palmwydh.

³³ Ha rag porth an sentri ev a wrug darasow a brenn oliv, pubonan peswar-kornek,

³⁴ ha dew dharas a brenn meryw, ha'n dhiw rann an eyl daras a blegya, ha'n dhiw rann an daras arall a blegya.

³⁵ Ev a gervyas cherubim, palmwydh, ha bleujennow igor, orth aga gorowra gans owr desedhys war an ober kervys.

³⁶ Ev a dhrehevis an klos pervedhel gans teyr res a veyn treghys hag unn res a gebrow keder.

³⁷ Y'n peswora blydhen selveyn chi an Arloedh a veu gorrys, y'n mis Ziv.

³⁸ Y'n unnegves blydhen, y'n mis Bul, hag yw an ethves mis, an chi a veu gorfennys yn oll y rannow, ha herwydh oll y dhesinyow. Ytho ev a spenas seyth blydhen orth y dhrehevel.