1 Myghternedh 22 - An Bibel Kernewek 20234 (Kernewek Kemmyn)

Kaskyrgh gans Yuda Erbynn Aram

¹ Teyr blydhen nyns esa bresel yntra Aram hag Ysrael.

² Mes y'n tressa blydhen Yehoshafat myghtern Yuda a dheuth yn-nans dhe vyghtern Ysrael.

³ Myghtern Ysrael a leveris dh'y wesyon, ‘A wodhowgh bos Ramoth-gilead dhyn, mes ny wren travyth dh'y hemmeres yn-mes a leuv myghtern Aram?’

⁴ Ev a leveris dhe Yehoshafat, ‘A vynnydh mos genev dhe vatalyas orth Ramoth-gilead?’ Yehoshafat a worthybis dhe vyghtern Ysrael, ‘My yw avelos, ow fobel yw dha bobel, ow mergh yw dha vergh.’

⁵ Mes Yehoshafat a leveris ynwedh dhe vyghtern Ysrael, ‘Govynn yn kynsa ger an Arloedh.’

⁶ Ena myghtern Ysrael a guntellas war-barth an brofoesi, a-dro dhe beswar kans anedha, ha leverel dhedha, ‘Av vy dhe vatalyas orth Ramoth-gilead, po a hedhav?’ I a leveris, ‘Ke, rag an Arloedh a's re yn leuv an myghtern.’

⁷ Mes Yehoshafat a leveris, ‘A nyns eus omma profoes arall an Arloedh may kovynnyn anodho?’

⁸ Myghtern Ysrael a leveris dhe Yehoshafat, ‘Yma hwath ken onan may kovynnyn a'n Arloedh dredho, Mikaya mab Ymla; mes my a'n kas, rag ny dhargan dader dhymm, marnas drog.’ Yehoshafat a leveris, ‘Na leveres an myghtern tra a'n par na.’

⁹ Ena myghtern Ysrael a elwis spadhesik ha leverel, ‘Doro yn uskis Mikaya mab Ymla.’

¹⁰ Yth esa myghtern Ysrael ha Yehoshafat myghtern Yuda a'ga esedh war aga thronys, gwiskys yn aga goenyow war leur-drushya ryb entrans porth Samaria; hag yth esa oll an brofoesi ow targana a-ragdha.

¹¹ Sedekia mab Kenaana a wrug dh'y honan kern a horn, hag ev a leveris, ‘Yndellma y lever an Arloedh: Gans an re ma ty a gorn Aram bys pan vydhons distruys.’

¹² Yth esa oll an brofoesi ow targana an keth ha leverel, ‘Ke dhe Ramoth-gilead ha tryghi; an Arloedh a's re yn leuv an myghtern.’

Mikaya a Dhargan Meth

¹³ An gannas gyllys dhe elwel Mikaya a leveris dhodho, ‘Mir, geryow an brofoesi gans unn akord yw faveradow dhe'n myghtern; bedhes dha er, my a'th pys, haval dhe onan anedha, ha kewsel yn ewn.’

¹⁴ Mes Mikaya a leveris, ‘Dell vew an Arloedh, pyth pynag a lever an Arloedh dhymm, henna y kowsav.’

¹⁵ Pan dheuth dhe'n myghtern, an myghtern a leveris dhodho, ‘Mikaya, en ni dhe Ramoth-gilead dhe vatalyas, po a hedhyn?’ Ev a worthybis dhodho, ‘Ke yn-bann ha tryghi; an Arloedh a's re yn leuv an myghtern.’

¹⁶ Mes an myghtern a leveris dhodho, ‘Pes termyn yw res dhymm gul dhis ti may leverydh dhymm travyth mes an gwiryonedh yn hanow an Arloedh?’

¹⁷ Ena Mikaya a leveris, ‘My a welas Ysrael oll keskerys war an menydhyow, avel deves na's teves bugel; ha'n Arloedh a leveris, “An re ma ny's teves mester; gas peub dhe vos tre yn kres.” ’

¹⁸ Myghtern Ysrael a leveris dhe Yehoshafat, ‘A ny leveris dhis na dhargana dader dhymm, marnas drog?’

¹⁹ Ena Mikaya a leveris, ‘Ytho klew ger an Arloedh: My a welas an Arloedh esedhys war y dron, gans oll an lu nevek a'ga sav rybdho dhe'n dyghow ha dhe'n kledh.

²⁰ Ha'n Arloedh a leveris, “Piw a dhyn Ahab, mayth ello ha koedha yn Ramoth-gilead?” Ena an eyl a leveris unn dra, ha'y gila a leveris ken tra,

²¹ bys pan dheuth spyrys yn-rag ha sevel a-rag an Arloedh, ow leverel, “My a'n dyn.”

²² “Fatell?” an Arloedh a wovynnas orto. Ev a worthybis, “Yth av yn-mes, ha my a vydh spyrys gowek yn ganow oll y brofoesi.” Ena an Arloedh a leveris, “Ty a'n dyn, ha ty a sewen; ke yn-rag ha'y wul.”

²³ Ytho dell welydh, an Arloedh re worras spyrys gowek yn ganow oll a'n re ma dha brofoesi; an Arloedh re gewsis drog yn dha gever.’

²⁴ Ena Sedekia mab Kenaana a dheuth nes dhe Mikaya ha'y stiwenna war an vogh, ha leverel, ‘Fatell dremenas spyrys an Arloedh ahanav dhe gewsel dhis?’

²⁵ Mikaya a worthybis, ‘Ty a wodhvydh y'n jydh na pan edh dhe omgudha a stevell dhe stevell.’

²⁶ Myghtern Ysrael a leveris, ‘Kemmer Mikaya ha'y dhaskorr dhe Amon governour an sita ha dhe Yoash mab an myghtern,

²⁷ ha leverel, “Yndellma y lever an myghtern: Gorr an gwas ma y'n prison, ha'y voesa orth ewnrannow lehes a vara hag a dhowr bys pan dhov yn kres.” ’

²⁸ Mikaya a leveris, ‘Mar tehwelydh yn kres, ny gewsis an Arloedh dredhov.’ Hag ev a leveris, ‘Klewewgh, hwi boblow oll!’

Mernans Ahab

²⁹ Ytho myghtern Ysrael ha Yehoshafat myghtern Yuda eth dhe Ramoth-gilead.

³⁰ Myghtern Ysrael a leveris dhe Yehoshafat, ‘My a doellwisk ow honan ha mos y'n vatel, mes ty gwisk dha woenyow.’ Ytho myghtern Ysrael a doellwiskas ha mos y'n vatel.

³¹ Mes myghtern Aram re worhemmynnsa dhe'n dewdhek kapten warn ugens a'y jarettow, ‘Na omledhewgh gans nagonan byghan na meur, marnas gans myghtern Ysrael.’

³² Kaptenyon an charettow pan welsons Yehoshafat, i a leveris, ‘Yn sur yth yw myghtern Ysrael.’ Ytho i a dreylyas dhe omladh ganso; mes Yehoshafat a grias.

³³ Pan welas kaptenyon an charettow nag o myghtern Ysrael, i a dreylyas a'y jasya.

³⁴ Mes neb gour a dennas y warak ha heb y wodhvos ev a weskis myghtern Ysrael yntra platyow y arvwisk ha'n lurik. Ev a leveris dh'y jaretter, ‘Treyl a-dro ha'm doen yn-mes a'n vatel, rag goliys ov.’

³⁵ An vatel a ynkressyas an jydh na, ha'n myghtern a veu kelmys serth yn y jarett a-dal Aram bys y'n gorthugher pan verwis; goes an goli a resas yn goeles an charett.

³⁶ Ena a-dro dhe howlsedhes garm eth der an lu ervys, ‘Pub gour dh'y sita, ha pub gour dh'y vro y honan!’

³⁷ Ytho an myghtern a verwis hag a veu degys dhe Samaria; i a ynkleudhyas an myghtern yn Samaria.

³⁸ I a wolghas an charett ryb poll yn Samaria mayth omvadhyens horys; an keun a lapyas y woes, herwydh ger an Arloedh re gowssa.

³⁹ Gwriansow erell Ahab, ha pup-tra a wrug ev, ha'n chi a dhans-olifans a dhrehevis, hag oll an sitys a dhrehevis, a nyns yns i skrifys yn lyver kovadhow myghternedh Ysrael?

⁴⁰ Ytho Ahab a goskas gans y dasow; ha'y vab Ahazia a dheuth war y lergh.

Yehoshafat a Reyn war Yuda

⁴¹ Yehoshafat mab Asa a dhallathas reynya war Yuda y'n peswora blydhen a Ahab myghtern Ysrael.

⁴² Yehoshafat o pymthek bloedh warn ugens pan dhallathas reynya, hag ev a reynyas pymp blydhen warn ugens yn Yerusalem. Hanow y vamm o Azuba myrgh Shilhi.

⁴³ Ev a gerdhas yn fordh y das Asa; ny dreylyas a-denewen anedhi, ow kul an pyth o ewn yn golok an Arloedh; mes ny veu kemmerys dhe-ves an tylleryow ughel, ha'n bobel a besyas sakrifia hwath ha leski offrynnow y'n tylleryow ughel.

⁴⁴ Yehoshafat a wrug kres ynwedh gans myghtern Ysrael.

⁴⁵ Gwriansow erell Yehoshafat ha'y nerth a dhiskwedhas, ha'y vreselyow, a nyns yns i skrifys yn lyver kovadhow myghternedh Ysrael?

⁴⁶ Remenant an horys-tempel worow gesys y'n tir yn dydhyow y das Asa, ev a fesyas a'n tir.

⁴⁷ Nyns esa myghtern yn Edom; yth esa lesruw a'n myghtern.

⁴⁸ Yehoshafat a wrug gorholyon Tarshish rag mos dhe Ofir rag owr; mes nyns ethons rag bos an gorholyon terrys yn Esyon-geber.

⁴⁹ Ena Ahazia mab Ahab a leveris dhe Yehoshafat, Gas ow gwesyon dhe vos gans dha wesyon y'n gorholyon. Mes ny vynna Yehoshafat.

⁵⁰ Yehoshafat a goskas gans y dasow hag a veu ynkleudhys gans y dasow yn sita y das Davydh; y vab Yehoram a dheuth war y lergh.

Ahazia a Reyn war Ysrael

⁵¹ Ahazia mab Ahab a dhallathas reynya war Ysrael yn Samaria y'n seytegves blydhen a Yehoshafat myghtern Yuda; ev a reynyas diw vlydhen war Ysrael.

⁵² Ev a wrug an pyth o drog yn golok an Arloedh, ha kerdhes yn fordh y das ha'y vamm, hag yn fordh Yeroboam mab Nebat, a wrug dhe Ysrael pegha.

⁵³ Ev a servyas Baal ha'y wordhya; ev a brovokyas an Arloedh, Duw Ysrael, dhe sorr, kepar dell wrussa y das.