1 Myghternedh 2 - An Bibel Kernewek 20234 (Kernewek Kemmyn)

Charj Davydh dhe Solomon

¹ Lemmyn dydhyow Davydh a dheuth nes rag ev dhe verwel; hag ev a worhemmynnis dh'y vab Solomon, ow leverel,

² ‘Yth esov ow mos yn fordh an norvys oll; bydh kolonnek ytho, ha bydh gour,

³ ha gwith charj an Arloedh dha Dhuw, dhe gerdhes yn y fordhow, dhe witha y ordenansow, y worhemmynnow, y vreusow, ha'y dhustuniow, dell yw skrifys yn lagha Moyses, may hylli seweni yn pup-tra a wredh, ha plepynag may treylydh;

⁴ may kewerro an Arloedh y er a veu kewsys ganso y'm kever, ow leverel, “Mar kwra dha fleghes gwitha aga fordh, ow kerdhes a-ragov yn gwiryonedh gans oll aga holonn ha gans oll aga enev, ny fyll dhis gour war dron Ysrael.”

⁵ ‘Kekeffrys ty a woer an pyth a wrug Yoab mab Seruya dhymm, ha'n pyth a wrug ev dhe'n dhew gapten a luyow Ysrael, dhe Abner mab Ner, ha dhe Amasa mab Yether; ev a's ladhas, ha skoellya an goes a vresel yn termyn kres, ow korra an goes a vresel war an grogys esa a-dro dh'y dhiwglun, ha war y eskisyow esa war y dhewdroes.

⁶ Gwra ytho herwydh dha furneth, ha na as y vlew loes dhe dhiyskynn dhe ifarn yn kres.

⁷ Mes bydh kuv orth vebyon Barzillay an Gileadyas, ha bedhens yn mysk an re a dheber orth dha voes: rag yndella y teuthons dhymm pan fiis vy dhiworth Absalom dha vroder.

⁸ Hag yma genes ynwedh Shimei mab Gera, Benyaminyas a Bahurim, neb a'm mollethis gans molleth ankensi y'n jydh mayth yth vy dhe Mahanaym: mes ev a dheuth dhe'm metya orth an Yordan, ha my a dos dhodho re'n Arloedh, ow leverel, “Ny wrav vy dha ladha gans an kledha.”

⁹ Rakhenna lemmyn na'n gas heb kessydhyans: rag gour fur osta, ha ty a woer an pyth a goedhvo dhis y wul dhodho. Doro y vlew loes dhe ifarn yn goes.’

Mernans Davydh

¹⁰ Ytho Davydh a goskas gans y dasow, hag a veu ynkleudhys yn sita Davydh.

¹¹ Ha'n dydhyow may reynyas Davydh dres Ysrael o dew-ugens blydhen: seyth blydhen y reynyas yn Hebron, ha teyr blydhen y reynyas yn Yerusalem.

¹² Ena Solomon a esedhas war dron Davydh y das; ha'y vyghterneth o fastys yn fyrv.

Reyn Solomon yw Fastys

¹³ Ena Adoniya mab Haggith a dheuth dhe Bathsheba mamm Solomon. Ha hi a leveris, ‘A wre'ta dos yn kres?’ Yn-medh ev, ‘Yn kres.’

¹⁴ Ena yn-medh ev, ‘Yma dhymm neppyth dhe leverel dhis.’ Yn-medh hi, ‘Kows.’

¹⁵ Yn-medh ev, ‘Ty a woer y feu an wlaskor dhymm, hag oll Ysrael a settyas aga fas warnav dhe reynya. Mes an wlaskor re beu treylys a-dro, ha res eth dhe'm broder, rag y feu dhodho dhiworth an Arloedh.

¹⁶ Ha lemmyn my a wovynn unn gorholedh ahanas; na'm nagh.’ Yn-medh hi dhodho, ‘Kows.’

¹⁷ Hag ev a leveris, ‘Kows, my a'th pys, gans Solomon an myghtern, rag ny wra ev dha nagha, may rollo dhymm Abishag an Shunammyades avel gwreg.’

¹⁸ Ha Bathsheba a leveris, ‘Da lowr, kewsel a wrav gans an myghtern ragos.’

¹⁹ Yth eth Bathsheba ytho dhe vyghtern Solomon, rag kewsel ganso a-barth Adoniya. Ha'n myghtern a sevis dh'y metya, hag a omblegyas orti; ena ev a esedhas war y dron, hag ordena kador dhe vos settys rag mamm an myghtern; ha hi a esedhas orth y leuv dhyghow.

²⁰ Ena yn-medh hi, ‘Yma hwans dhymm dhe unn govynnadow byghan ahanas; my a'th pys, na wra y skonya dhymm.’ Yn-medh an myghtern dhedhi, ‘Govynn orthiv, ow mamm; rag ny wrav y skonya dhis.’

²¹ Yn-medh hi, ‘Re bo Abishag an Shunammyades res dhe Adoniya avel gwreg.’

²² Myghtern Solomon a worthybis hag a leveris dh'y vamm, ‘Prag y hwovynnydh Abishag an Shunammyades dhe vos res rag Adoniya? Govynn an wlaskor ragdho ev ynwedh. Rag ev yw ow hottha broder; govynn ragdho ev, ha rag Abiathar an oferyas, ha rag Yoab mab Seruya.’

²³ Ena myghtern Solomon a dos re'n Arloedh, ow leverel, ‘Re wrello Duw dhymm yndella ha moy ynwedh, mar ny gewsis Adoniya an ger ma erbynn y vewnans y honan.

²⁴ Lemmyn ytho, dell vew an Arloedh, neb a'm fastyas ha'm settya war dron ow thas, ha neb a wrug chi ragov dell ambosas, Adoniya a vydh gorrys dhe'n mernans hedhyw.’

²⁵ Ytho myghtern Solomon a dhannvonas dre leuv Benaya mab Yehoyada; hag ev a goedhas warnodho may ferwis.

²⁶ Yn-medh an myghtern dhe Abiathar an oferyas, ‘Ke dhe Anathoth, dhe'th parkow dha honan, rag ty a dhervynn an mernans. Mes ny wrav vy dha ladha yn eur ma, rag ty a dhug argh an Arloedh Duw a-rag Davydh ow thas, ha drefenn ty dhe wodhav oll an keth ankenyow may hwodhevis ow thas ynna.’

²⁷ Ytho Solomon a wordhellos Abiathar dhiworth oferyaseth an Arloedh; ow kewera yndella ger an Arloedh, a leveris a-dro dhe ji Eli yn Shilo.

²⁸ Pan dheuth an nowodhow dhe Yoab – rag Yoab a assentsa gans Adoniya, kyn na assentsa gans Absalom – Yoab a fias dhe dylda an Arloedh, hag a dhalghennas kern an alter.

²⁹ Y feu leverys dhe vyghtern Solomon, ‘Yoab re fias dhe dylda an Arloedh, hag otta, yma ev ryb an alter.’ Ena Solomon a dhannvonas Benaya mab Yehoyada, ow leverel, ‘Ke, koedh warnodho.’

³⁰ Ytho Benaya a dheuth dhe dylda an Arloedh, ha leverel dhodho, ‘An myghtern re erghis, “Deus mes.” ’ Yn-medh ev, ‘Na dhov, mes my a verow omma.’ Ytho Benaya a dherivas hemma dhe'n myghtern, ‘Yndella yn-medh Yoab, hag yndella y hworthybis dhymm.’

³¹ Yn-medh an myghtern dhodho, ‘Gwra dell leveris ev: koedh warnodho, ha'y ynkleudhyas. Yndella ty a gemmer dhiworthiv ha dhiworth chi ow thas kabel an goes gwiryon a wrug Yoab y skoellya.

³² Ha'n Arloedh a wra dh'y woes dehweles war y benn ev y honan, rag heb godhvos ow thas Davydh, ev a goedhas war dhew wour moy gwiryon ha gwell agesso ev, ha'ga ladha gans an kledha: Abner mab Ner, kapten lu Ysrael, hag Amasa mab Yether, kapten lu Yuda.

³³ Dehweles a wra aga goes war benn Yoab, ha war benn y has bys vykken; mes dhe Davydh, ha dh'y has, ha dh'y ji, ha dh'y dron, y fydh kres bys vykken dhiworth an Arloedh.’

³⁴ Ytho Benaya mab Yehoyada eth yn-bann hag a goedhas warnodho, ha'y ladha; hag ynkleudhys veu yn y ji y honan y'n gwylvos.

³⁵ An myghtern a worras Benaya mab Yehoyada yn y le dres an lu, ha'n myghtern a worras Sadok an oferyas yn le Abiathar.

³⁶ Ena an myghtern a dhannvonas hag a elwis Shimei, hag yn-medh ev dhodho, ‘Drehav chi ragos yn Yerusalem, ha trig ena, ha na wra mos alena dhe dyller arall vytholl.

³⁷ Rag y'n jydh mayth edh yn-mes, ha mos dres an keynres Kidron, godhvydh yn sertan, ty a wra merwel; dha woes a vydh war dha benn dha honan.’

³⁸ Yn-medh Shimei dhe'n myghtern, ‘Da yw an ger: dell leveris ow arloedh an myghtern, yndella y hwra dha was.’ Ytho yth esa Shimei trigys yn Yerusalem lies dydh.

³⁹ Y hwarva dhe benn teyr vlydhen, y tienkas dew was a Shimei dhe Akish mab Maaka myghtern Gath. Leverys veu dhe Shimei, ‘Otta, yma dha wesyon yn Gath.’

⁴⁰ Shimei a sevis, ha dibra y asen, ha mos dhe Akish yn Gath rag hwilas y wesyon. Ytho Shimei eth ha dri y wesyon dhiworth Gath.

⁴¹ Leverys veu dhe Solomon, bos Shimei gyllys dhiworth Yerusalem dhe Gath, hag ev dhe vos dehwelys.

⁴² An myghtern a dhannvonas ha gelwel Shimei, ha leverel dhodho, ‘A ny wrug vy dhis gul ti re'n Arloedh, ha'th warnya, ow leverel, “Y'n jydh mayth edh yn-mes, ha kerdhes dhe dyller arall vytholl, godhvydh yn sertan, ty a wra merwel?” ha ty a leveris dhymm, “Da yw an ger; my a'n goslow.”

⁴³ Prag na wruss'ta gwitha an ti re'n Arloedh, ha'n gorhemmynn a worhemmynnis vy dhis?’

⁴⁴ Ynwedh an myghtern a leveris dhe Shimei, ‘Ty a woer y'th kolonn oll an drog a wrussys dhe Davydh ow thas; ytho an Arloedh a attal dha dhrog war dha benn dha honan.

⁴⁵ Mes myghtern Solomon a vydh benniges, ha tron Davydh a vydh fastys a-rag an Arloedh bys vykken.’

⁴⁶ Ena an myghtern a worhemmynnis dhe Benaya mab Yehoyada; hag ev eth yn-mes, ha koedha warnodho, may ferwis. Yndella an vyghterneth a veu fastys yn leuv Solomon.