1 Myghternedh 13 - An Bibel Kernewek 20234 (Kernewek Kemmyn)

Profoes a Yuda

¹ Dre er an Arloedh gour Duw a dheuth yn-mes a Yuda dhe Bethel, ha Yeroboam a'y sav ryb an alter rag leski offrynn.

² Ev a grias erbynn an alter dre er an Arloedh, ha leverel. ‘A alter, alter, yndellma y lever an Arloedh: “Mab a vydh genys dhe ji Davydh, Yosia y hanow; hag ev a sakrifi warnas oferysi an tylleryow ughel a lesk offrynnow warnas, hag eskern denel a vydh leskys warnas.” ’

³ Ev a ros tokyn an keth jydh, ow leverel, ‘Homm yw an tokyn a gewsis an Arloedh: “An alter a vydh skwardys, ha'n lusu usi warnedhi a vydh diverys yn-mes.” ’

⁴ Pan glewas an myghtern an pyth a grias gour Duw erbynn an alter yn Bethel, ev a ystynnas y leuv a-dhiworth an alter, ow leverel, ‘Dalghennewgh ynno!’ Mes an leuv a ystynnas er y bynn a wedhras ma na ylli hy thenna war-dhelergh.

⁵ An alter ynwedh a veu skwardys, ha'n lusu a veu diverys yn-mes a'n alter, herwydh an tokyn re rosa gour Duw gans ger an Arloedh.

⁶ An myghtern a leveris dhe wour Duw, ‘Pys lemmyn favour an Arloedh dha Dhuw, ha pys ragov, may fydh daskorrys ow leuv dhymm.’ Ytho gour Duw a bysis war an Arloedh; ha leuv an myghtern a veu daskorrys dhodho hag a dheuth ha bos par dell o kyns.

⁷ Ena an myghtern a leveris dhe wour Duw, ‘Deus tre genev ha kav sosten, ha my a re dhis ro.’

⁸ Mes gour Duw a leveris dhe'n myghtern, ‘Mar redh dhymm hanter dha wlaskor, nyns av a-ji genes; na ny dhebrav boes po eva dowr y'n tyller ma.

⁹ Rag yndellma y feu gorhemmynnys dhymm gans ger an Arloedh: Ny dhybrydh boes, na eva dowr, na dehweles der an fordh may teuthys.’

¹⁰ Ytho ev eth dre fordh arall, ha ny dhehwelis der an fordh may tothya dhe Bethel.

¹¹ Yth esa trigys profoes koth yn Bethel. Onan a'y vebyon a dheuth ha leverel pup-tra re wrussa gour Duw an jydh na yn Bethel; ha'n geryow ynwedh re lavarsa dhe'n myghtern i a leveris dh'aga thas.

¹² Aga thas a leveris dhedha, ‘Py fordh yth eth?’ Ha'y vebyon a dhiskwedhas dhodho an fordh mayth eth gour Duw re dhothya a Yuda.

¹³ Ena ev a leveris dh'y vebyon, ‘Dibrewgh an asen dhymm.’ Ytho i a dhibras an asen ragdho, hag ev a yskynnas warnodho.

¹⁴ Ev eth war-lergh gour Duw, ha'y gavoes owth esedha yn-dann derebinthenn. Ev a leveris dhodho, ‘Osta gour Duw a dheuth a Yuda?’ Ev a worthybis, ‘Ov.’

¹⁵ Ena ev a leveris dhodho, ‘Deus tre genev ha dybri boes.’

¹⁶ Mes ev a leveris, ‘Ny allav dehweles genes; na ny dhebrav boes po eva dowr genes y'n tyller ma;

¹⁷ rag y feu leverys dhymm dre er an Arloedh: Ny dhybrydh boes na eva dowr ena, na dehweles der an fordh may teuthys.’

¹⁸ Ena ev a leveris dhodho, ‘My yw profoes ynwedh kepar dell os, hag el a gewsis dhymm dre er an Arloedh: Doro ev genes dhe'th chi may teppro boes hag eva dowr.’ Mes yth esa ow kowleverel.

¹⁹ Ena gour Duw a dhehwelis ganso, ha dybri boes hag eva dowr yn y ji.

²⁰ Dell esens a'ga esedh orth an voes, ger an Arloedh a dheuth dhe'n profoes re'n dros tre.

²¹ Ev a grias erbynn wour Duw a dheuth a Yuda, ‘Yndellma y lever an Arloedh: drefenn ty dhe rebellya erbynn ger an Arloedh, ha ny withsys an gorhemmynn a worhemmynnis an Arloedh dha Dhuw dhis,

²² mes dehweles ha dybri boes hag eva dowr y'n tyller may leveris dhis, “Na dheber boes vyth na eva dowr vyth”, ny dheu dha gorf dhe vedh dha dasow.’

²³ Wosa gour Duw dhe dhybri boes hag eva, i a dhibras asen dhodho esa dhe'n profoes re'n dros dhe dre.

²⁴ Ena dell eth yn-mes, lew a'n metyas war an fordh ha'y ladha. Y gorf a veu tewlys y'n fordh, ha'n asen a sevis rybdho; ha'n lew ynwedh a sevis ryb an korf.

²⁵ Tus a dremenas ha gweles an korf tewlys y'n fordh, ha'n lew a'y sav ryb an korf. Hag i a dheuth ha'y leverel dhe'n dre mayth esa trigys an profoes koth.

²⁶ Pan glewas hemma an profoes neb a'n drosa tre dhiworth an fordh, ev a leveris, ‘Gour Duw yw neb a rebellyas erbynn ger an Arloedh. An Arloedh re'n ros dhe lew, hag ev a'n skwardyas ha'y ladha herwydh an ger a gewsis an Arloedh dhodho.’

²⁷ Ena ev a leveris dh'y vebyon, ‘Dibrewgh an asen dhymm.’ Ytho i a'n dibras.

²⁸ Ev eth ha kavoes an korf tewlys y'n fordh, ha'n asen ha'n lew a'ga sav ryb an korf. Ny dhyb'sa an lew an korf na terri an asen.

²⁹ An profoes a gemmeras korf gour Duw yn-bann, ha'y worra war an asen, ha'y dhri arta dhe sita an profoes koth, dhe gyni ha dh'y ynkleudhyas.

³⁰ Ev a worras an korf yn y vedh; hag i a gynis warnodho, ow leverel, ‘Ellas, ow broder!’

³¹ Wosa ev dh'y ynkleudhyas, ev a leveris dh'y vebyon, ‘Pan vydhav marow, ynkleudhyewgh vy y'n bedh may ma ynkleudhys gour Duw; gorrewgh ow eskern ryb y eskern ev.

³² Rag an lavar a grias dre er an Arloedh erbynn an alter yn Bethel hag erbynn oll chiow an tylleryow ughel usi yn sitys Samaria, yn sur a dheu ha hwarvos.’

³³ Wosa hemma ny dreylyas Yeroboam a'y dhrog fordh, mes arta ev a wrug oferysi rag an tylleryow ughel a-dhiworth oll renkasow an bobel. Piwpynag a vynna bos oferyas ev a sakras dhe'n tylleryow ughel.

³⁴ An dra ma a dheuth ha bos pegh dhe ji Yeroboam, dh'y dhilea ha'y dhistrui a-dhiworth enep an nor.