1 Myghternedh 11 - An Bibel Kernewek 20234 (Kernewek Kemmyn)

Kammwriansow Solomon

¹ Myghtern Solomon a gara lies benyn estren, keffrys ha myrgh Faro: Moabyadesow, Ammonyadesow, Edomyadesow, Sidonyadesow ha Hittyadesow,

² a genedhlow may leveris an Arloedh anedha dhe'n Ysraelysi, ‘Nyns ewgh yn priosoleth gansa, na nyns ons yn priosoleth genowgh; rag yn sertan i a dreyl dhe-ves agas kolonn dhe holya aga duwow’. Mes Solomon a lenas orth an re ma yn kerensa.

³ Yn mysk y wragedh yth esa seyth kans pennseviges ha tri hans iswreg; ha'y wragedh a dreylyas dhe-ves y golonn.

⁴ Rag pan o Solomon koth y wragedh a dreylyas dhe-ves y golonn war-lergh duwow erell; ha nyns o y golonn perfydh gans an Arloedh y Dhuw, par dell o kolonn y das Davydh.

⁵ Rag Solomon a holya Ashtoreth duwes an Sidonysi ha Milkom pyth kasadow an Ammonysi.

⁶ Ytho Solomon a wrug drog yn golok an Arloedh, ha ny holyas yn tien an Arloedh, par dell wrussa y das Davydh.

⁷ Ena Solomon a dhrehevis tyller ughel rag Kemosh pyth kasadow an Ammonysi, war an menydh a'n duryen dhe Yerusalem.

⁸ Ev a wrug an keth rag oll y wragedh estren, esens owth offrynna ynkys ha sakrifia dh'aga duwow.

⁹ Ena an Arloedh o serrys orth Solomon drefenn y golonn dhe dreylya dhe-ves a'n Arloedh, Duw Ysrael, re omdhiskwedhsa dhodho diwweyth,

¹⁰ ha gorhemmynn dhodho war an dra ma na holya duwow erell; mes ny verkyas an pyth a worhemmynnis an Arloedh.

¹¹ Ytho an Arloedh a leveris dhe Solomon, ‘A-ban via henna dha vrys ha ny withsys ow hevambos na'm ordenansow a worhemmynnis dhis, my a derr an wlaskor a-dhiworthis ha'y ri dhe'th was.

¹² Byttegyns a wovis dha das Davydh ny'n gwrav yn dha dhydhyow; my a'n terr a leuv dha vab.

¹³ Saw ny dorrav an wlaskor oll; my a re unn loeth dhe'th vab a-barth ow gwas Davydh hag a-barth Yerusalem, re dhewisis.’

Eskerens Solomon

¹⁴ Ena an Arloedh a dhrehevis eskar erbynn Solomon, Hadad an Edomyas, a deylu ryel Edom.

¹⁵ Rag pan esa Davydh yn Edom, ha Yoab an kaslewydh eth dhe ynkleudhyas an re varow, ev a ladhas pub gorreydh yn Edom.

¹⁶ Yoab hag oll Ysrael a besyas ena hwegh mis bys pan ladhsa pub gorreydh yn Edom.

¹⁷ Mes Hadad a fias dhe Ejyp gans re a'n Edomysi o wesyon y das. Ev o maw yowynk y'n termyn na.

¹⁸ I eth yn-kerdh a Midyan ha dos dhe Paran; i a gemmeras gwer gansa a Paran ha dos dhe Ejyp, dhe Faro myghtern Ejyp, neb a ros chi ha boes dhodho, ha ri dhodho tir.

¹⁹ Hadad a gavas favour meur yn golok Faro, may ros dhodho hwoer y wreg, an vyghternes Tahpenes.

²⁰ Hi a dhineythis dhodho y vab Genubath; Tahpenes a'n didhenas yn chi Faro; yth esa Genubath yn chi Faro yn mysk mebyon Faro.

²¹ Pan glewas Hadad yn Ejyp bos Davydh marow ha bos marow Yoab kaslewydh an lu, Hadad a leveris dhe Faro, ‘Gas vy dhe dhiberth mayth ylliv dhe'm pow ow honan.’

²² Mes Faro a leveris dhodho, ‘Pandr'a fyll dhis may hwilydh mos dhe'th pow dha honan?’ Hag ev a leveris, ‘Travyth, mes gas vy dhe vones.’

²³ Duw a sevis eskar arall erbynn Solomon, Rezon mab Elyada, re fias dhiworth y arloedh, Hadadezer myghtern Soba.

²⁴ Ev a guntellas gwer dhodho ha dos ha bos kapten bagas preydhoryon, wosa an ladhva gans Davydh; i eth dhe Damaskus ha triga ena ha gul dhodho bos myghtern yn Damaskus.

²⁵ Ev o eskar Ysrael dydhyow oll Solomon, ow kul dregynn kepar dell wrug Hadad; ev a dhispresyas Ysrael hag a reynyas war Edom.

Rebellyans Yeroboam

²⁶ Yeroboam mab Nebat, Efraymyas a Sereda, was Solomon, ha hanow y vamm Serua, gwedhwes, a rebellyas erbynn an myghtern.

²⁷ Hemm yw an reson ev dhe rebellya erbynn an myghtern. Solomon a dhrehevis an Millo, ha degea an aswa yn fos sita y das Davydh.

²⁸ Yeroboam o gour pur alloesek, ha pan welas Solomon bos an gour yowynk diwysyk ev a'n gwrug rewler war oll an lavur konstrynys a ji Yosep.

²⁹ A-dro dhe'n termyn na, pan esa Yeroboam ow mos yn-mes a Yerusalem, an profoes Ahiya a Shilo a'n kavas war an fordh. Ahiya re omwisksa yn mantell nowydh. Yth esa aga dew aga honan yn pow igor.

³⁰ Ena Ahiya a dhalghennas an vantell nowydh esa warnodho ha'y skwardya yn dewdhek darn,

³¹ ha leverel dhe Yeroboam: Kemmer dhis deg darn; rag yndellma y lever an Arloedh, Duw Ysrael, ‘Otta, my a skward gwlaskor Ysrael a-dhiworth gavel Solomon, ha ri dhis deg loeth.

³² Ev a'n jevydh unn loeth, a-barth ow gwas Davydh hag a-barth Yerusalem, an sita re dhewisis yn-mes a'n loethow oll a Ysrael.

³³ Hemm yw drefenn ev dhe'm eskasa ha gordhya Ashtoreth duwes an Sidonysi, Kemosh duw Moab, ha Milkom duw an Ammonysi, ha ny gerdhas yn ow fordhow, ow kul an pyth yw ewn yn ow golok ha gwitha ow ordenansow ha'm breusow, dell wrug y das Davydh.

³⁴ Byttegyns ny gemmerav an wlaskor oll a'y leuv mes my a'n sett avel pennsevik oll dydhyow y vewnans, a-barth ow gwas Davydh, neb a dhewisis, neb a withas ow gorhemmynnow ha'm ordenansow;

³⁵ mes my a gemmer an wlaskor ma a-dhiworth y vab ha'y ri dhis, an deg loeth.

³⁶ Mes dh'y vab my a re unn loeth, ma'n jevydh prest ow gwas Davydh lugarn a-ragov yn Yerusalem, an sita may tewisis vy gorra ow hanow ynni.

³⁷ Ha ty, my a'th kemmer dhe reynya war bup-tra a dhesir dha enev; ty a vydh myghtern war Ysrael.

³⁸ Mar koslowydh orth pup-tra a worhemmynnav dhis, kerdhes yn ow fordhow, ha gul an pyth yw ewn yn ow golok ow kwitha ow ordenansow hag ow gorhemmynnow, dell wrug ow gwas Davydh, my a vydh genes, ha ty a dhrehav chi sur, par dell dhrehevis rag Davydh, ha my a re Ysrael dhis.

³⁹ Rag an skila ma my a gessydh diyskynnysi Davydh, mes ny vydh bys vykken.’

⁴⁰ Ytho Solomon a hwilas ladha Yeroboam; mes Yeroboam a fias dison dhe Ejyp, dhe Shishak myghtern Ejyp, hag yth esa yn Ejyp bys yn mernans Solomon.

Mernans Solomon

⁴¹ Gwriansow erell Solomon, pup-tra a wrug, ha'y furneth, a nyns yns i skrifys yn Lyver Gwriansow Solomon?

⁴² An termyn may reynyas Solomon yn Yerusalem war Ysrael oll o dew-ugens blydhen.

⁴³ Solomon a verwis hag a veu ynkleudhys yn sita y das Davydh; ha'y vab Rehoboam a reynyas yn y le.