1 Myghternedh 1 - An Bibel Kernewek 20234 (Kernewek Kemmyn)

Adoniya a Assay Dalghenna an Tron

¹ Myghtern Davydh o gyllys koth yn y dhydhyow; hag i a'n kudhas gans dillasow, mes ny ylli omdoemma.

² Y wesyon a leveris dhodho, ‘Bedhes gwyrghes yowynk hwilys rag ow arloedh an myghtern; ha gas hi dhe sevel a-rag an myghtern ha bos gwithyadores; ha gas hi dhe wrowedha y'th askra, may kaffo ow arloedh an myghtern toemmder.’

³ I a hwilas mowes teg ytho der oll pow Ysrael, ha kavoes Abishag an Shunammyades, hag i a's dros dhe'n myghtern.

⁴ An vowes o pur deg, ha hi a veu gwithyades dhe'n myghtern, ha menystra dhodho: mes ny wrug an myghtern hy aswonn.

⁵ Adoniya mab Haggith a omdhrehevis, ow leverel, ‘My a vydh myghtern’: hag ev a bareusis ragdho charettow ha marghogyon, ha deg korfwithyas ha dew-ugens rag poenya a-ragdho.

⁶ Ny wrug y das y geredhi bythkweth ow leverel. ‘Prag re wruss'ta yndella?’ Hag ynwedh ev o pur deg y semlans; hag ev a veu dineythys nessa wosa Absalom.

⁷ Ev a geskusulyas gans Yoab mab Seruya, ha gans Abiathar an oferyas: hag i a ros skoedhyans dhe Adoniya.

⁸ Mes Sadok an oferyas, ha Benaya mab Yehoyada, ha Nathan an profoes, ha Shimei, ha Rei, ha kasoryon Davydh, nyns esens gans Adoniya.

⁹ Adoniya a sakrifias deves hag oghen ha bualyon peskys ryb men Zoheleth, usi ryb En-rogel, hag ev a elwis oll y vreder, mebyon an myghtern, hag oll soedhogyon ryel Yuda.

¹⁰ Mes ny elwis Nathan an profoes, na Benaya, na'n gasoryon, na Solomon y vroder.

¹¹ Ena Nathan a leveris dhe Bathsheba mamm Solomon, ‘A ny glewsys Adoniya mab Haggith dhe reynya, ha ny woer henna Davydh agan arloedh?

¹² Lemmyn ytho deus, gas my dhe ri dhis kusul, may hylli sawya dha vewnans dha honan, ha bewnans dha vab Solomon.

¹³ Ke ha mos a-ji dhe'n myghtern Davydh ha lavar dhodho, “Ow arloedh an myghtern, a ny desys dhe'th vaghteth ow leverel: Solomon dha vab a reyn war ow lergh, hag ev a wra esedha war ow thron? Prag y reyn Adoniya ytho?”

¹⁴ Ena my a dheu a-ji ynwedh war dha lergh, ha ty hwath ow kewsel gans an myghtern, hag afydhya dha eryow.’

¹⁵ Ytho Bathsheba eth a-berth y'n chambour dhe'n myghtern: ha'n myghtern o pur goth. Yth esa Abishag an Shunammyades ow menystra dhe'n myghtern.

¹⁶ Bathsheba eth war benn-dewlin, hag omblegya a-rag an myghtern. Ha'n myghtern a leveris, ‘Pandr'a vynnydh?’

¹⁷ Ha hi a leveris dhodho, ‘Ow arloedh, ty a dos dhe'th vaghteth re'n Arloedh dha Dhuw, ow leverel: Dha vab Solomon a reyn war ow lergh, hag ev a wra esedha war ow thron.

¹⁸ Mes lemmyn Adoniya re dheuth ha bos myghtern; ha ty, ow arloedh an myghtern, ny'n goer.

¹⁹ Hag ev re ladhas oghen ha bualyon peskys ha deves pals, ha re elwis oll mebyon an myghtern, hag Abiathar an oferyas, ha Yoab kapten an lu: mes ny elwis Solomon dha was.

²⁰ Ha ty, ow arloedh an myghtern, yma lagasow oll Ysrael warnas, dhe leverel dhedha piw a esedh war dron ow arloedh an myghtern war y lergh.

²¹ Poken y hwyrvydh, pan gosk ow arloedh an myghtern gans y dasow, my ha'm mab Solomon dhe vos reknys avel drogoberoryon.’

²² Pan esa hi hwath ow kewsel gans an myghtern, Nathan an profoes a dheuth a-ji.

²³ Y feu leverys dhe'n myghtern, ‘Awotta Nathan an profoes.’ Ha pan dheuth a-rag an myghtern, ev a omblegyas dhe'n myghtern gans y fas dhe'n leur.

²⁴ Nathan a leveris, ‘Ow arloedh an myghtern, a wruss'ta leverel, “Adoniya a reyn war ow lergh, hag ev a wra esedha war ow thron”?

²⁵ Rag ev yw gyllys yn-nans hedhyw, ha re ladhas oghen ha bualyon peskys ha deves pals, ha re elwis oll mebyon an myghtern, ha kaptenyon an lu, hag Abiathar an oferyas; hag, otta, i a dheber hag eva a-ragdho, ha leverel, “Re vewo myghtern Adoniya.”

²⁶ Mes my, my dha was, ha Sadok an oferyas, ha Benaya mab Yehoyada, ha'th was Solomon, ny wrug ev agan gelwel.

²⁷ Yw an dra ma gwrys gans ow arloedh an myghtern, heb y dhiskwedhes dhe'th wesyon, piw a esedh war dron ow arloedh an myghtern war y lergh?’

Solomon a Hol Davydh avel Myghtern

²⁸ Myghtern Davydh a worthybis, ‘Gelwewgh Bathsheba dhymm.’ Ha hi a dheuth yn lok a'n myghtern, hag a sevis a-rag an myghtern.

²⁹ Ha'n myghtern a dos, ha leverel, ‘Dell vew an Arloedh, neb re dhasprenas ow enev a bub ahwer,

³⁰ kepar dell des re'n Arloedh, Duw Ysrael, ow leverel, “Solomon dha vab a reyn war ow lergh, hag ev a esedh war ow thron y'm le”, yndella my a wra an jydh ma.’

³¹ Ena Bathsheba a goedhas war benn-dewlin gans hy fas dhe'n leur, hag omblegya dhe'n myghtern, ha leverel, ‘Re vewo ow arloedh myghtern Davydh bys vykken.’

³² Myghtern Davydh a leveris, ‘Gelwewgh dhymm Sadok an oferyas, ha Nathan an profoes, ha Benaya mab Yehoyada.’ Hag i a dheuth a-rag an myghtern.

³³ An myghtern a leveris dhedha, ‘Kemmerewgh genowgh gwesyon agas arloedh, ha settyewgh Solomon ow mab dhe varghogeth war ow mul, ha'y dhri yn-nans dhe Gihon.

³⁴ Ha gesewgh Sadok an oferyas ha Nathan an profoes dh'y untya ena avel myghtern dres Ysrael. Ena hwythewgh an hirgorn, ha leverel, “Re vewo myghtern Solomon!”

³⁵ Hag ena ewgh yn-bann war y lergh, may teffo ev hag esedha war ow thron; rag ev a vydh myghtern y'm le: ha my re'n ordenas avel rewler dres Ysrael ha dres Yuda.’

³⁶ Ha Benaya mab Yehoyada a worthybis dhe'n myghtern, ‘Amen! Re lavarro yndella an Arloedh, Duw ow arloedh an myghtern.

³⁷ Kepar dell veu an Arloedh gans ow arloedh an myghtern, yndella re bo gans Solomon, ha gul y dron brassa ages tron ow arloedh myghtern Davydh.’

³⁸ Ytho Sadok an oferyas, ha Nathan an profoes, ha Benaya mab Yehoyada, ha'n Kerethysi, ha'n Pelethysi, eth yn-nans, hag a settyas Solomon dhe varghogeth war vul myghtern Davydh, hag i a'n dros dhe Gihon.

³⁹ Sadok an oferyas a gemmeras korn an oyl yn-mes a'n tylda hag a untyas Solomon. Ena i a hwythas an hirgorn; hag oll an bobel a leveris, ‘Re vewo myghtern Solomon!’

⁴⁰ Hag oll an bobel eth yn-bann war y lergh, ha'n bobel a hwythas an pibow, hag a lowenhas gans joy bras, may feu folsys an dor gans an son anedha.

⁴¹ Adoniya hag oll an westoryon esa ganso a'n klewas hag i ow korfenna dybri. Pan glewas Yoab son an hirgorn, yn-medh ev, ‘Prag yma tros a dervans y'n sita?’

⁴² Ha pan esa hwath ow kewsel, Yonathan mab Abiathar an oferyas a dheuth. Yn-medh Adoniya dhodho. ‘Deus a-ji rag gour a vri osta, ha ty a dhre nowodhow da.’

⁴³ Yonathan a worthybis ha leverel dhe Adoniya, ‘Na dhrov; agan arloedh myghtern Davydh re wrug Solomon myghtern.

⁴⁴ Ha'n myghtern re dhannvonas ganso Sadok an oferyas, ha Nathan an profoes, ha Benaya mab Yehoyada, ha'n Kerethysi, ha'n Pelethysi, hag i a'n settyas dhe varghogeth war vul an myghtern.

⁴⁵ Ha Sadok an oferyas ha Nathan an profoes re'n untyas avel myghtern yn Gihon; hag i res eth yn-bann alena ow lowenhe, may ma an sita yn tervans. Hemm yw an tros a glewsowgh.

⁴⁶ Hag ynwedh Solomon a esedh war an tron ryel.

⁴⁷ Kekeffrys gwesyon an myghtern a dheuth rag benniga agan arloedh myghtern Davydh, ow leverel, “Re wrello Duw hanow Solomon gwell ages dha hanow jy, ha'y dron brassa ages dha dron jy.” Ena an myghtern a omblegyas yn gordhyans war an gweli.

⁴⁸ Hag ynwedh an myghtern a leveris, “Benniges yw an Arloedh, Duw Ysrael, neb re ros nebonan dhe esedha war ow thron hedhyw, ha'm dewlagas ynwedh dh'y weles.” ’

⁴⁹ Ena own a's tevo oll gwestoryon Adoniya; i a sevis, ha pubonan eth war y fordh y honan.

⁵⁰ Adoniya y honan a'n jevo own drefenn Solomon; ytho ev a sevis, hag eth, hag a dhalghennas kern an alter.

⁵¹ Ena derivys veu dhe Solomon, ‘Adoniya a'n jeves own a vyghtern Solomon, rag ev re dhalghennas kern an alter, ow leverel “Gas myghtern Solomon dhe di orthiv hedhyw, na ladh ev y was gans an kledha.” ’

⁵² Ha Solomon a leveris, ‘Mar pydh ev den wordhi, ny goedh blewenn vyth a'y benn dhe'n dor; mes mar pydh droktra kevys ynno, ev a verow.’

⁵³ Ena myghtern Solomon a dhannvonas, hag i a'n gemmeras yn-nans dhiworth an alter. Hag ev a dheuth hag omblegya dhe vyghtern Solomon; ha Solomon a leveris dhodho, ‘Ke dhe'th chi.’