1 Kroniklys 29 - An Bibel Kernewek 20234 (Kernewek Kemmyn)

Rohow rag Drehevyans an Tempel

¹ Davydh an myghtern a leveris dhe oll an kuntelles, ‘Solomon ow mab, onan dewisys gans Duw, yw yowynk ha heb prevyans. An ober yw meur; rag ny vydh an palys rag mab-den mes rag an Arloedh Duw.

² Ytho gans oll ow nerth my re brovias rag chi ow Duw, owr rag an ober a owr, arghans rag an ober a arghans, brons rag an ober a vrons, horn rag an ober a horn, ha prenn rag an ober a brenn, hag ynwedh meyn onyks rag an settyansow, antimoni, meyn liesliw, pub eghenn meyn drudh, ha meur a alabaster.

³ Gans henna, rag my dhe gavoes delit yn chi ow Duw, my re ros owr hag arghans dhiworth ow pyth ow honan, yn keworrans dhe oll re bareusis vy rag an chi sans:

⁴ tri mil dalent a owr, a'n owr a Ofir, ha seyth mil dalent a arghans purhes, dhe genna fosow an chiow,

⁵ owr rag an ober a owr hag arghans rag an ober a arghans, ha rag oll an ober dhe vos gwrys gans kreftoryon. Ha piw ytho yw bolonjedhek, owth omsakra an jydh ma dhe'n Arloedh?’

⁶ Ena pennow an teyluyow, pennow loethow Ysrael, kaptenyon milyow ha kansow, ha hembrenkysi ober an myghtern a ombrofyas a'ga bodh,

⁷ hag i a ros rag ober chi Duw pymp mil dalent ha deg mil dharik a owr, deg mil dalent a arghans, etek mil dalent a vrons, ha kans mil dalent a horn.

⁸ Pubonan mayth esa dhodho meyn drudh a's ros dhe argh chi an Arloedh, dre leuv Yehiel an Gershonyas.

⁹ An dus a lowenhas, rag an rohow dhe vos res dhe'n Arloedh a'ga bodh hag a leun golonn. Myghtern Davydh ynwedh o pur lowen.

Davydh a Wormel Duw

¹⁰ Davydh a vennigas an Arloedh a-dherag an kuntelles oll. Ha Davydh a leveris, ‘Benniges os, A Arloedh, Duw Ysrael agan tas, bys vykken ha bynnari.

¹¹ Dhiso jy, A Arloedh, yw an braster, ha'n nerth, ha'n glori ha'n splannder, rag dhiso jy yw pup-tra yn nev ha nor. Dhiso jy, A Arloedh, yw an myghternsys, hag ughelhes os avel penn dres pup-tra.

¹² Rychys ha glori a dheu dhiworthis, ha ty a rewl pup-tra, hag y'th leuv yma krevder ha nerth. Y'th leuv yma an galloes dhe veurhe ha dhe grevhe pup-tra.

¹³ Ha lemmyn, agan Duw, ni a woer gras dhis ha ni a wormel dha hanow gloryus.

¹⁴ ‘Mes piw ov vy, ha piw yw ow fobel, ni dhe alloes profya yndella mar hel? Rag dhiworthis jy y teu pup-tra, hag a'th leuv dha honan yth eson ow ri dhis.

¹⁵ Rag alyons on ni a-ragos, ha godrigoryon, kepar ha'gan tasow oll. Avel skeus yw agan dydhyow war an nor, heb govenek.

¹⁶ A Arloedh agan Duw, oll an palster ma a wrussyn y dharbari dhe dhrehevel chi dhis, a-barth dha hanow sans, a dheu dhiworth dha leuv jy, ha dhiso jy yw an taklow oll.

¹⁷ My a woer, ow Duw, ty dhe brevi an golonn, ha dhe lowenhe yn ewnhynseth. Yn gwiryonsys ow holonn y res vy a'm bodh oll an taklow ma. Ha lemmyn my re welas dha bobel usi omma ow ri dhis a'ga bodh yn lowen.

¹⁸ A Arloedh Duw Abraham, Ysak hag Ysrael agan tasow, gwith hemma bys vykken yn brys ha prederow kolonn dha bobel, ha kevarwoedh aga holonn troha dhis.

¹⁹ Gront dhe Solomon ow mab kolonn berfydh dhe witha dha worhemmynnow, dha dhustuniow ha'th ordenansow, dhe wul pup-tra, ha dhe dhrehevel an palys, a wrugavy y dharbari.’

²⁰ Ena Davydh a leveris dhe oll an kuntelles, ‘Bennigewgh an Arloedh agas Duw.’ Hag oll an kuntelles a wormolas an Arloedh, Duw aga thasow, hag omblegya, ow plegya dhe'n dor a-rag Arloedh ha'n myghtern.

²¹ Ternos i a sakrifias sakrifisow dhe'n Arloedh hag offrynna offrynnow leskys dhe'n Arloedh, mil lodhen, mil hordh, ha mil oen, gans aga offrynnow diwes ha sakrifisow yn kals rag oll Ysrael.

²² I a dhybris hag eva a-rag an Arloedh y'n jydh na gans lowena vras. Ena i a wrug Solomon mab Davydh myghtern rag an nessa treveth hag i a'n untyas avel rewler rag an Arloedh ha Sadok avel oferyas.

Solomon yw Kurunys Myghtern

²³ Y'n eur na Solomon a esedhas war dron an Arloedh avel myghtern yn le Davydh y das; hag ev a sewenis, hag oll Ysrael a'n obayas.

²⁴ Oll an soedhogyon ha'n gasoryon, hag ynwedh oll mebyon myghtern Davydh, a ambosas aga lelder dhe vyghtern Solomon.

²⁵ An Arloedh a ughelhas Solomon yn feur yn golok oll Ysrael ha ri dhodho meuredh ryel brassa es dell re bia war bub myghtern kyns yn Ysrael.

Mernans Davydh

²⁶ Davydh mab Yesse a reynyas war oll Ysrael.

²⁷ Termyn y reyn war Ysrael o dew-ugens blydhen; ev a reynyas seyth blydhen yn Hebron, ha trydhek blydhen warn ugens yn Yerusalem.

²⁸ Ev a verwis yn kothni dha, leun a dhydhyow, a rychys, hag a enor; ha Solomon, y vab a reynyas yn y le.

²⁹ Lemmyn gweythresow Davydh an myghtern, a dhalleth y reyn bys y'n diwedh, skrifys yns yn kovadhow Samuel an gwelesydh, hag yn kovadhow Nathan an profoes, hag yn kovadhow Gad an gwelesydh,

³⁰ gans oll y reyn ha'y alloes ha'n termynyow a dremenas warnodho ha war Ysrael ha war oll gwlaskordhow an bys.