1 Kroniklys 28 - An Bibel Kernewek 20234 (Kernewek Kemmyn)

Dannvonadow Davydh rag an Tempel

¹ Myghtern Davydh a guntellas yn Yerusalem oll soedhogyon Ysrael, pennow an loethow, pennow an rannow a servya an myghtern, kaptenyon milyow, kaptenyon kansow, an soedhogyon a'n jevo charj a oll an pythow hag a oll chatel an myghtern ha'y vebyon, war-barth gans soedhogyon an palys, an gasoryon hag oll an vreselyoryon golonnek.

² Davydh an myghtern a sevis yn-bann, hag a leveris: ‘Goslowewgh orthiv, ow breder ha'm pobel. Dhe'm parth evy, yth esa y'm brys dhe dhrehevel chi a bowes rag argh kevambos an Arloedh ha rag skavell-droes agan Duw, ha my re wrug darbarow dh'y dhrehevel.

³ Mes Duw a leveris dhymm, “Ny wredh drehevel chi rag ow hanow, rag ty re beu gour a vresel ha ty re skoellyas goes.”

⁴ Byttegyns an Arloedh, Duw Ysrael, a'm dewisas dhiworth oll chi ow thas dhe vos myghtern war Ysrael bys vykken; rag ev a dhewisas Yuda avel rewler, hag yn chi Yuda chi ow thas, hag y feu plegadow dhodho dhiworth mebyon ow thas dhe wul dhymm bos myghtern war oll Ysrael.

⁵ A oll ow mebyon (rag Arloedh re ros dhymm lies mab) ev re dhewisas Solomon ow mab dhe esedha war dron myghterneth an Arloedh war Ysrael.

⁶ Ev a leveris dhymm, “Solomon dha vab, ev a dhrehav ow chi ha'm klosow, rag my re'n dewisas dhe vos ow mab, ha my a vydh y das.

⁷ My a fast y vyghterneth bys vykken mar pydh hardh ow kwitha ow gorhemmynnow ha'm breusow, dell wra y'n jydh ma.”

⁸ Lemmyn ytho a-wel dhe oll Ysrael, ha kuntelles an Arloedh, hag yn klewans agan Duw, gwaytyewgh gwitha oll gorhemmynnow an Arloedh dha Dhuw may eritewgh an pow da ma ha'y gemmynna rag eretons dhe'th vebyon war dha lergh bys vykken.

⁹ ‘Ha ty, Solomon ow mab, aswonn Duw dha das, ha'y servya a leun golonn ha gans brys bolonjedhek; rag an Arloedh a hwither oll kolonnow, hag ev a gonvedh pub towl ha pub preder. Mara'n hwilydh, ev a vydh kevys genes; mes mara'n eskasydh, ev a'th tenagh bys vykken.

¹⁰ Kemmer with lemmyn, rag an Arloedh re'th tewisas dhe dhrehevel chi rag an sentri; bydh krev, ha'n gwra.’

¹¹ Davydh a ros dhe Solomon y vab an towl rag portal an tempel ha'y dhrehevyansow, y dresorvaow, y jambouryow gwarthav, y jambouryow pervedhel ha chi an dregeredhva;

¹² ha'n towl a bup-tra esa yn y vrys rag klosyow chi an Arloedh ha rag oll an chambouryow a-derdro, rag tresorvaow chi Duw, ha rag tresorvaow an rohow sakrys;

¹³ rag rannow an oferysi ha'n Levysi, ha rag oll ober an servis yn chi an Arloedh; rag oll an lestri rag an servis yn chi an Arloedh;

¹⁴ rag poes an owr rag oll an lestri owrek rag pub eghenn a servis, poes an arghans rag oll an lestri arghans rag pub eghenn a servis,

¹⁵ an poes rag an golowbrennyer a owr ha'ga lugern a owr, gans poes an owr rag pub golowbrenn ha'ga lugern, ha poes an arghans rag an golowbrennyer a arghans ha'ga lugern war-lergh an devnydh a bub golowbrenn y'n servis;

¹⁶ rag poes an owr rag pub moes rag bara an wolok, ha'n arghans rag an moesow a arghans;

¹⁷ ynwedh owr pur rag an kigveryow, an bollow, ha'n hanafow; ha rag an basonyow owrek ha'n poes a bub, ha'n bollow a arghans ha'ga foes;

¹⁸ rag poes owr purhes rag an alter a ynkys, ha'n owr rag patron charett an cherubim a lesa aga diwaskell dhe worskeusi argh kevambos an Arloedh.

¹⁹ ‘Oll hemma,’ yn-medh Davydh, ‘my a'm beus yn skrif dhiworth leuv an Arloedh warnav, hag ev a ros dhymm konvedhes yn oll manylyon an towl.’

²⁰ Y'n eur na Davydh a leveris dhe Solomon y vab, ‘Bydh krev ha bydh kolonnek ha gwra an ober. Na borth own, na vydh digennerthys, rag yma genes an Arloedh Duw, ow Duw. Ny wra dha asa na dha eskasa erna vo gorfennys oll an ober rag servis chi an Arloedh.

²¹ Hag awotta rannow an oferysi ha'n Levysi. I a vydh genes rag oll an servis yn chi Duw; ha genes yn oll an ober y fydh pub den bolonjedhek, neb a'n jeves sleyghneth rag pub eghenn servis; ynwedh an soedhogyon hag oll an bobel a vydh yn tien orth dha arghadow.’