1 Kroniklys 23 - An Bibel Kernewek 20234 (Kernewek Kemmyn)

Teyluyow Levysi ha'ga Gweythresow

¹ Pan o myghtern Davydh koth ha leun a dhydhyow, ev a wrug Solomon y vab myghtern war Ysrael.

² Myghtern Davydh a guntellas war-barth oll hembrenkysi Ysrael, gans an oferysi ha'n Levysi.

³ An Levysi, deg warn ugens bloedh ha moy a veu niverys, ha'n sommenn o etek mil wour warn ugens.

⁴ ‘Peswar mil warn ugens anedha a'n jevydh charj a'n ober yn chi an ARLOEDH, hwegh mil a vydh soedhogyon ha breusysi,

⁵ peswar mil a vydh porthoryon ha peswar mil a wormel an Arloedh gans an daffar menestrouthi re wrug rag gormel.’

⁶ Davydh a's kevrennas yn bagasow herwydh kordhow mebyon Levi: Gershon, Kohath ha Merari.

⁷ Mebyon Gershon: Ladan ha Shimei.

⁸ Mebyon Ladan: Yehiel an penn, Zetham ha Yoel, tri.

⁹ Mebyon Shimei: Shelomoth, Haziel, ha Haran, tri. An re ma o pennow teyluyow Ladan.

¹⁰ Mebyon Shimei: Yahath, Zina, Yeush ha Beria. An peswar ma o mebyon Shimei.

¹¹ Yahath o an penn, ha Ziza an nessa; mes ny's tevo Yeush ha Beria lies mab, hag i a veu reknys avel unn kordh.

¹² Mebyon Kohath: Amram, Yshar, Hebron, hag Uzziel, peswar.

¹³ Mebyon Amram: Aron ha Moyses. Aron a veu diberthys gans y vebyon bys vykken dhe sakra an taklow moyha sans, dhe leski offrynnow a-rag an Arloedh, dhe venystra dhodho ha dhe leverel bennathow yn y hanow bys vykken.

¹⁴ Mes mebyon Moyses, gour Duw, a veu henwys yn mysk loeth Levi.

¹⁵ Mebyon Moyses: Gershom hag Eliezer.

¹⁶ Mebyon Gershom: Shebuel o an penn.

¹⁷ Mebyon Eliezer: Rehabia an penn. Eliezer ny'n jevo mebyon arall mes mebyon Rehabia o fest lies.

¹⁸ Mebyon Yshar: Shelomith an penn.

¹⁹ Mebyon Hebron: Yeria an penn, Amaria an nessa, Yahaziel an tressa, ha Yekameam an peswora.

²⁰ Mebyon Uzziel: Mika an penn, hag Ysshia an nessa.

²¹ Mebyon Merari: Mahli ha Mushi. Mebyon Mahli: Eleazar ha Kish.

²² Eleazar a verwis ha ny'n jevo mebyon vyth, mes unnsel myrghes; ha'ga breder, mebyon Kish, a's demmedhis.

²³ Mebyon Mushi: Mahli, Eder ha Yeremoth, tri.

²⁴ An re ma o mebyon Levi war-lergh pennow aga theyluyow – pennow teyluyow dell vons kovskrifys war-lergh niver an henwyn a wer ugens bloedh ha moy. I a wre an ober rag servis chi an Arloedh.

²⁵ Rag Davydh a leveris, ‘An Arloedh, Duw Ysrael, re ros powes dh'y bobel; hag ev a drig yn Yerusalem bys vykken.

²⁶ Ytho nyns yw res na fella dhe'n Levysi doen an tabernakel na'n daffar rag y servis’ –

²⁷ rag war-lergh diwettha geryow Davydh, an Levysi a veu niverys a ugens bloedh ha moy.

²⁸ Aga dever o oberi ryb tenewen an oferysi, mebyon Aron, ha dhe weres yn servis chi an Arloedh, gans charj a'n klosow, an chambouryow, purheans oll an taklow sans, hag ober arall rag servis chi Duw;

²⁹ dhe weres ynwedh gans bara an wolok, an bleus fin rag an offrynn greun, tesennow tanow an bara heb goell, an offrynn pebys war veyn-pobas, an tesennow rond kemmyskys gans oyl, hag oll musuryow a vyns po a vraster.

³⁰ Pub myttin i a sev ow ri grasow ha gormel dhe'n Arloedh, ha keffrys yn gorthugher,

³¹ ha peskweyth mayth yw offrynnys offrynnow leskys dhe'n Arloedh yn sabotys, yn loeryow nowydh hag yn dy'goelyow, herwydh an niver rekwirys anedha, heb hedhi a-dherag an Arloedh.

³² I a's tevydh charj a dylda an kuntelles ha'n sentri, ha gweres aga breder, mebyon Aron, y'n servis chi an Arloedh.