1 Kroniklys 21 - An Bibel Kernewek 20234 (Kernewek Kemmyn)

Niveryans an Bobel, ha Plag

¹ Satnas a sevis erbynn Ysrael hag ynnia war Davydh nivera pobel Ysrael.

² Ytho Davydh a leveris dhe Yoab ha dhe gaslewydhyon an lu, ‘Kewgh, niverewgh Ysrael, dhiworth Beer-sheba bys yn Dan, ha drewgh derivas dhymm, may hylliv godhvos aga niver.’

³ Mes Yoab a leveris, ‘Re geworro an Arloedh dh'y bobel kanskweyth kekemmys! Ow arloedh an myghtern, a nyns yns i oll gwesyon ow arloedh? Prag ytho y fynn ow arloedh gul hemma? Prag y fydh blam dres war Ysrael?’

⁴ Mes ger an myghtern a warthevyas erbynn Yoab. Ytho Yoab a dhibarthas ha mos der oll Ysrael, hag ena dehweles dhe Yerusalem

⁵ Yoab a ros sommenn niveryans an bobel dhe Davydh. Yth esa yn oll Ysrael milvil gledhevor ha kans mil, hag yn Yuda peswar kans, deg ha tri-ugens a vilyow a gledhevoryon.

⁶ Mes ny niveras Yoab Levi na Benyamin y'n niveryans drefenn arghadow an myghtern dhe vos kasadow dhe Yoab.

⁷ Duw ynwedh a veu displesys gans an dra ma, hag ev a weskis Ysrael.

⁸ Davydh a leveris dhe Dhuw, ‘My re beghas yn feur drefenn my dhe wul an dra ma. Lemmyn, my a'th pys, kemmer dhe-ves kammweyth dha was, rag my re beu pur foll.’

⁹ An Arloedh a gewsis orth Gad, gwelesydh Davydh, ow leverel,

¹⁰ ‘Ke ha lavar dhe Davydh, “Yndellma y lever an Arloedh: My a brof dhis tri thra; dewis onan anedha, ha my a'n gwra dhis.” ’

¹¹ Gad a dheuth dhe Davydh ha leverel dhodho, ‘Yndellma y lever an Arloedh: “Gwra dha dhewis:

¹² po teyr blydhen a dhivoetter, po tri mis ow fia a-rag dha eskerens ha kledha dha eskerens orth dha dhistrui; po tri dydh a gledha an Arloedh, plag y'n pow hag el an Arloedh ow tistrui dres oll tiredh Ysrael.” Lemmyn ervir py gorthyp y kemmerav dhodho ev neb a'm dannvonas.’

¹³ Davydh a leveris dhe Gad, ‘Yth esov yn ahwer meur. Gas vy dhe goedha yn leuv an Arloedh, rag pur vras yw y druedh; mes na as vy dhe goedha yn leuv mab-den.’

¹⁴ Ytho an Arloedh a dhannvonas plag war Ysrael; ha deg ha tri-ugens gour Ysrael a goedhas.

¹⁵ Duw a dhannvonas el dhe Yerusalem dh'y distrui; mes pan o ev parys dh'y distrui, an Arloedh a welas, hag ev a'n jevo edrek a'n drog, hag ev a leveris dhe'n el esa ow tistrui, ‘Henn yw lowr, lemmyn lows dha leuv.’ Yth esa el an Arloedh ow sevel ryb leur-drushya Ornan an Yebusyas.

¹⁶ Davydh a dhrehevis y dhewlagas ha gweles el an Arloedh ow sevel yntra nor ha nev, hag yn y leuv kledha noeth ystynnys yn-mes war Yerusalem. Y'n eur na Davydh ha'n henavogyon, gwiskys yn yskar, a goedhas war aga fas.

¹⁷ Davydh a leveris dhe Dhuw, ‘A nyns yw my a ros an arghadow dhe nivera an bobel? Yth yw my re beghas ha re wrug drog. Mes an deves ma, pandr'a wrussons i? Bedhes dha leuv, my a'th pys, A Arloedh ow Duw, er ow fynn hag erbynn teylu ow thas, mes na as an plag dhe vos war dha bobel.’

Davydh a Dhrehav Alter dhe'n Arloedh

¹⁸ Ena el an Arloedh a erghis dhe Gad dhe leverel dhe Davydh mayth ella yn-bann ha drehevel alter dhe'n Arloedh war leur-drushya Ornan an Yebusyas.

¹⁹ Ytho Davydh eth yn-bann herwydh ger Gad re gowssa yn hanow an Arloedh.

²⁰ Lemmyn yth esa Ornan ow trushya gwaneth; ev a dreylyas ha gweles an el, ha'y beswar mab esa ganso a omgelas.

²¹ Pan dheuth Davydh dhe Ornan, Ornan a viras ha gweles Davydh, hag ev eth yn-mes a'n leur-drushya, hag omblegya dhe Davydh gans y fas dhe'n leur.

²² Davydh a leveris dhe Ornan, ‘Ro dhymm tyller an leur-drushya may treheffiv warnodho alter dhe'n Arloedh; ro e dhymm rag an pris leun, may fo an plag treylys dhe-ves dhiworth an bobel.’

²³ Ornan a leveris dhe Davydh, ‘Kemmer e, ha gwres ow arloedh an myghtern an pyth a hevel da dhodho. Mir, my a re dhis an oghen rag offrynnow leskys ha'n draylellow-drushya rag an prennyer, ha'n gwaneth rag offrynnow greun. My a re pup-tra oll.’

²⁴ Mes myghtern Davydh a leveris dhe Ornan, ‘Na; mes my a'n prenn dhiworthis rag an pris leun. Ny gemmerav rag an Arloedh an pyth yw dhis, nag offra offrynnow leskys na gostyas travyth.’

²⁵ Ytho Davydh a dylis dhe Ornan hwegh kans shekel a owr orth poes rag an tyller.

²⁶ Davydh a dhrehevis alter ena dhe'n Arloedh ha sakrifia offrynnow leskys hag offrynnow kres. Ev a elwis war an Arloedh, hag ev a'n gorthybis dre dan a nev war alter an offrynn leskys.

²⁷ An Arloedh a gewsis dhe'n el, hag ev a worras y gledha arta yn y woen.

An Tyller rag an Tempel

²⁸ Y'n termyn na, pan welas Davydh an Arloedh dhe worthybi dhodho orth leur-drushya Ornan an Yebusyas, ev a sakrifias ena.

²⁹ Rag yth esa tabernakel an Arloedh re wrussa Moyses y'n gwylvos, hag alter an offrynn leskys y'n termyn na y'n tyller ughel yn Gibeon;

³⁰ mes ny allas Davydh mos a-rygdhi dhe hwilas mynnas Duw, rag own a'n jeva a gledha el an Arloedh.