1 Kroniklys 19 - An Bibel Kernewek 20234 (Kernewek Kemmyn)

Davydh a Feth an Ammonysi hag Aram

¹ Wosa hemma, Nahash myghtern an Ammonysi a verwis, ha'y vab a reynyas yn y le.

² Davydh a leveris, ‘My a diskwa tregeredh dhe Hanun mab Nahash, rag y das a dhiskwedhas tregeredh dhymmo vy.’ Ytho Davydh a dhannvonas kannasow dh'y gonfortya a-dro dh'y das. Pan dheuth kannasow Davydh dhe Hanun yn pow an Ammonysi dh'y gonfortya,

³ pennsevigyon an Ammonysi a leveris dhe Hanun, ‘A dybydh bos Davydh owth enora dha das y'th wolok, hag ev ow tannvon konforters dhis? A ny dhannvonas Davydh y wesyon dhis dhe hwithra, dhe dhomhwel ha dhe aspia an pow?’

⁴ Ytho Hanun a sesyas kannasow Davydh ha'ga divarva ha treghi dhe-ves an rann isella a'ga dillasennow bys aga diwbedrenn, ha'ga dannvon dhe-ves.

⁵ I a dhibarthas. Pan veu derivys dhe Davydh a-dro dhe'n wer, ev a dhannvonas dh'aga metya, rag an wer a berthi meth bras. An myghtern a leveris, ‘Gortewgh yn Yeriko bys pan vo agas barv tevys, hag ena dehwelewgh.’

⁶ Pan wodhva an Ammonysi, i dhe vos kasadow dhe Davydh, Hanun ha'n Ammonysi a dhannvonas mil dalent a arghans dhe wobrena charettow ha marghogyon dhiworth Aram Naharaym, dhiworth Aram Maaka, ha dhiworth Soba.

⁷ I a wobrenas dewdhek mil jarett warn ugens ha myghtern Maaka gans y lu, neb a dheuth ha kampya a-rag Medeba. An Ammonysi a omguntellas war-barth dhiworth aga sitys, hag i a dheuth rag batalyas.

⁸ Pan glewas Davydh hemma, ev a dhannvonas Yoab gans oll an gasoryon.

⁹ An Ammonysi a dheuth yn-mes arayys rag batel orth entrans an sita, ha'n vyghternedh re dhothya esa aga honan y'n gwel.

¹⁰ Pan wodhva Yoab linyow an vatel dhe vos settys er y bynn a-rag hag a-dryv, ev a dhewisas rann a'y soudoryon wella, ha'ga settya yn aray erbynn Aram.

¹¹ Ev a worras y vroder Abishay yn charj a remenant y soudoryon hag i a veu arayys erbynn an Ammonysi.

¹² Yoab a leveris dh'y vroder, ‘Mars yw Aram re grev ragov, ena ty a'm saw; mes mars yw an Ammonysi re grev ragos, ena my a'th saw.

¹³ Bydh krev, ha diskwedhyn agan honan kolonnek a-barth agan pobel ha rag sitys agan Duw; ha re wrello an Arloedh an pyth a hevel da dhodho.’

¹⁴ Ena Yoab ha'n soudoryon esa ganso a dheuth nes a-rag Aram rag batel; hag i a fias a-ragdho.

¹⁵ Pan welas an Ammonysi Aram dhe fia dhiworth soudoryon Yoab, i ynwedh a fias a-rag Abishay y vroder, ha kildenna a-ji dhe'n sita. Ena Yoab a dhehwelis dhe Yerusalem.

¹⁶ Pan wodhva Aram aga bos fethys gans Ysrael, i a dhannvonas kannasow dhe elwel Aram yn-mes, esa dres an avon Ewfrates, hembrenkys gans Shofak kaslewydh lu Hadadezer.

¹⁷ Pan veu derivys dhe Davydh, ev a guntellas oll lu Ysrael war-barth, ha treusi an Yordan ha dos er aga fynn, hag araya y soudoryon a-dal dhedha. Davydh a arayas y lu rag metya Aram yn batel, hag i a omladhas ganso.

¹⁸ Mes Aram a fias a-dherag Ysrael. Davydh a ladhas a Aram seyth mil jaretter ha dew-ugens mil droesek, ha ladha ynwedh Shofak, kaslewydh aga lu.

¹⁹ Pan wodhva Aram aga bos fethys gans Ysrael, i a wrug kres gans Davydh, hag eth ha bos gostydh dhodho. Ytho ny vynnas Aram sawya an Ammonysi nevra namoy.