1 Kroniklys 15 - An Bibel Kernewek 20234 (Kernewek Kemmyn)

An Argh yw Dres dhe Yerusalem

¹ Ev a dhrehevis chiow ragdho y honan yn sita Davydh, hag ev a dharbaris tyller dhe argh Duw ha lesa tylda rygdhi.

² Ena Davydh a leveris, ‘Ny yll nagonan doen argh Duw marnas an Levysi, rag an Arloedh a's dewisas dhe dhoen argh an Arloedh ha dhe venystra dhodho bys vykken.’

³ Davydh a guntellas oll Ysrael yn Yerusalem dhe dhoen argh an Arloedh yn-bann dh'y thyller re dharbarsa ev dhedhi.

⁴ Davydh a guntellas war-barth mebyon Aron ha'n Levysi:

⁵ a vebyon Kohath, Uriel an pennsevik, ha'y vreder kans hag ugens;

⁶ a vebyon Merari, Asaya an pennsevik, ha'y vreder dew kans hag ugens;

⁷ a vebyon Gershom, Yoel an pennsevik, ha'y vreder kans ha deg warn ugens;

⁸ a vebyon Elisafan, Shemaia an pennsevik ha'y vreder dew kans;

⁹ a vebyon Hebron, Eliel an pennsevik, ha'y vreder peswar ugens;

¹⁰ a vebyon Uzziel, Amminadab an pennsevik, ha'y vreder kans ha dewdhek.

¹¹ Davydh a elwis an oferysi Sadok hag Abiathar, ha'n Levysi Uriel, Asaya, Yoel, Shemaia, Eliel, hag Amminadab,

¹² ha leverel dhedha, ‘Hwi yw pennow teyluyow an Levysi; sakrewgh agas honan, hwi ha'gas breder, may tryllowgh yn-bann argh an Arloedh, Duw Ysrael, dhe'n tyller re dharbaris vy dhedhi.

¹³ Drefenn na's dugowgh hwi an kynsa prys, an Arloedh agan Duw a dardhas warnan, drefenn na hwilsyn dhiworto y'n vaner ordenys.’

¹⁴ Ytho an oferysi ha'n Levysi a sakras aga honan rag dri yn-bann argh an Arloedh, Duw Ysrael.

¹⁵ Ha'n Levysi a dhug argh Duw war aga diwskoedh gans an gwelynni, dell arghsa Moyses war-lergh ger an Arloedh.

¹⁶ Davydh a erghis dhe ledyoryon an Levysi apoyntya aga breder avel kanoryon gans daffar menestrouthi, telynnow, sowtris ha symbalys, ow trehevel son lowena.

¹⁷ Ytho an Levysi a apoyntyas Heman mab Yoel; ha dhiworth y vreder, Asaf mab Berekia; hag a vebyon Merari aga breder, Ethan mab Kushaya;

¹⁸ ha gansa aga breder a'n nessa ordyr, Zekaria, Ben, Yaaziel, Shemiramoth, Yehiel, Unni, Eliab, Benaya, Maaseya, Mattithia, Elifelehu ha Mikneya, ha'n borthoryon Obed-edom ha Yeiel.

¹⁹ An ganoryon, Heman, Asaf hag Ethan a vedha ow seni gans symbalys a vrons;

²⁰ Zekaria, Aziel, Shemiramoth, Yehiel, Unni, Eliab, Maaseya ha Benaya ow seni telynnow war-lergh Alamoth;

²¹ ha Mattithia, Elifelehu, Mikneya, Obed-edom, Yeiel hag Azaria ow seni sowtris war-lergh Sheminith.

²² Kenania, pennkenyas an Levysi, a veu yn charj a'n kana, rag ev dhe vos skentel.

²³ Berekia hag Elkana a vedha porthoryon rag an argh.

²⁴ Shebania, Yoshafat, Nethanel, Amasay, Zekaria, Benaya, hag Eliezer, an oferysi, a vedha ow hwytha an hirgern a-dherag argh Duw. Obed-edom ha Yehia ynwedh a vedha porthoryon rag an argh.

²⁵ Ena Davydh ha henavogyon Ysrael, ha kaptenyon an milyow, eth dhe dhri yn-bann argh kevambos an Arloedh dhiworth chi Obed-edom gans lowena.

²⁶ Rag Duw dhe weres an Levysi neb a dhug argh kevambos an Arloedh, i a sakrifias seyth tarow ha seyth hordh.

²⁷ Davydh a veu gwiskys yn goen a sendal, dell o ynwedh oll an Levysi neb a dhug an argh, ha'n ganoryon, ha'n pennkenyas Kenania a'n jevo charj a'n ganoryon. Davydh ynwedh a wiskas efod lien.

²⁸ Oll Ysrael a dhros yn-bann argh kevambos an Arloedh gans garmow, gans son korn, hirgern ha symbalys, ha son telynnow ha sowtris.

²⁹ Pan dheuth argh kevambos an Arloedh a-ji dhe sita Davydh, Mikal myrgh Sowl a viras der an fenester, ha gweles myghtern Davydh ow tonsya hag ow lowenhe; ha hi a'n dispresyas yn hy holonn.