1 Korinthianys 8 - An Bibel Kernewek 20234 (Kernewek Kemmyn)

Taklow Offrynnys dhe Idolys

¹ Lemmyn a-dro dhe offrynnow dhe idolys, dell wodhon, ‘ni oll a'gan beus godhvos.’ Godhvos a dheg hwythfians, mes kerensa a dhrehav.

² Nebonan mar tyb ev dhe wodhvos neptra, ny woer na hwath kepar dell goedh dhodho godhvos;

³ mes nebonan mar kar Duw, aswonnys ganso yth ywa.

⁴ Rakhenna, a-dro dhe dhybri offrynnow dhe idolys, ni a woer ‘idol y'n bys ma dhe vos travyth’, ha ‘nag eus Duw vyth saw onan.’

⁵ Rag kynth eus duwow, dell yns gelwys, po yn nev po yn nor – dell yn hwir yma meur a dhuwow ha meur a arlydhi –

⁶ hwath ragon nyni yma unn Duw, an Tas, dhiworth neb yw pup-tra, ha rag neb yth on ni, hag unn Arloedh, Yesu Krist, dre neb yw pup-tra ha dre neb yth on ni.

⁷ Byttegyns, nyns yw peub a'n jeves an godhvos ma, mes re, drefenn aga howethyans kyns-lemmyn gans idolys, a dheber an boes avel boes offrynnys dhe idol, ha'ga howses, ow pos gwann, defolys yw.

⁸ Boes ny wra agan kommendya dhe Dhuw; nyns on ni gweth mar ny dhybryn na gwell mar tybryn.

⁹ Mes kemmerewgh with, dha livreson ma na dheffo ha bos war neb kor ken a drebuchya dhe'n re wann.

¹⁰ Rag nebonan mara'th wel, ty dhen a wodhvos, owth esedha orth moes yn tempel idol, a ny vydh ev dynys, gwann y gowses, dhe dhybri offrynnow dhe idolys?

¹¹ Ytho, dre dha wodhvos, distruys yw an den gwann, an broder may ferwis Krist ragdho.

¹² Yndellma, ow pegha erbynn an vreder hag ow shyndya aga howses pan yw gwann, ty a begh erbynn Krist.

¹³ Rakhenna, boes mar lett ow broder, nevra ny wrav vy dybri kig rag dout my dhe wul dhodho trebuchya.