1 Korinthianys 7 - An Bibel Kernewek 20234 (Kernewek Kemmyn)

Kudynnow a-dro dhe Dhemmedhyans

¹ Lemmyn a-dro dhe'n traow may skrifsowgh: ‘Da yw dhe wour na docchyo benyn.’

² Mes drefenn fornikasyon y koedh dhe bub gour kavoes y wreg y honan, ha pub benyn hy gour hy honan.

³ Y koedh dhe'n gour ri dh'y wreg hy gwiryow priosel, keffrys an wreg dh'y gour.

⁴ Rag an wreg ny rewl hy horf hy honan, mes hy gour a'n rewl; y'n keth vaner an gour ny rewl y gorf y honan, mes an wreg a'n rewl.

⁵ Na skonyewgh an eyl orth y gila, marnas, martesen, der akordyans rag termyn, mayth omryllowgh hwi dhe bysadow; mes ena dewgh war-barth arta ma na'gas dynnyo Satnas der agas fowt omrewl.

⁶ Hemma my a lever avel kummyas, a-der gorhemmynn.

⁷ Hwans a'm beus pub den oll dhe vos avelov vy ow honan; mes yma gans peub y ro arbennik y honan dhiworth Duw; an eyl a'n jeves hemma, y gila henna.

⁸ My a lever dhe'n re dhibries ha dhe'n gwedhwesow bos da dhedha gortos avelov vy.

⁹ Mes mar ny yllons i omrewlya, gwrens demmedhi; gwell yw demmedhi ages dewi dre hwans.

¹⁰ Dhe'n re bries my a worhemmynn (nyns yw my, mes an Arloedh), ma na goedhvo dhe'n wreg diberth dhiworth hy gour,

¹¹ mes mar kwra diberth, gortes dibries poken bedhes unnverhes gans hy gour; ha ny goedh dhe'n gour didhemmedhi y wreg.

¹² Dhe'n re erell y lavarav evy (nyns yw an Arloedh): broder mara'n jeves gwreg dhiskryjyk ha hy owth assentya triga ganso, ny goedh dhodho diberth dhiworti;

¹³ ha benyn mara's teves gour diskryjyk hag ev owth assentya triga gensi, ny goedh dhedhi diberth dhiworto.

¹⁴ Rag an gour diskryjyk re beu sakrys der an wreg, ha'n wreg dhiskryjyk re beu sakrys der an gour. Poken, avlan via agas fleghes, mes lemmyn sans yns i.

¹⁵ Mes mar omdhiberth an diskryjyk, bedhes diberthys; yn kas a'n par na nyns yw kelmys na'n broder na'n hwoer. Rag yn kres Duw re'gas gelwis.

¹⁶ A wreg, fatell wodhesta mar kwredh selwel dha wour? A wour, fatell wodhesta mar kwredh selwel dha wreg?

An Bewnans Ordenys gans an Arloedh

¹⁷ Byttegyns, kerdhes pubonan kepar dell ordenas dhodho an Arloedh, par dell elwis Duw pubonan. Hemma my a worhemmynn y'n eglosyow oll.

¹⁸ O trodreghys nebonan pan veu gelwys? Na hwiles defendya dhe-ves merkyow trodreghyans. A veu gelwys nebonan antrodreghys? Na bedhes trodreghys.

¹⁹ Trodreghyans nyns yw travyth, hag antrodreghyans nyns yw travyth; mes gwitha arghadowyow an Arloedh yw dres pup-tra.

²⁰ Gortes pub huni y'n studh may feu gelwys.

²¹ A veusta keth pan veus gelwys? Ny vern; mes mar kyllydh dos ha bos livrys, gwell yw gul yndella.

²² Rag neb a veu gelwys y'n Arloedh, hag ev keth, den livrys an Arloedh yth yw; keffrys neb o den livrys pan veu gelwys, keth Krist yth yw.

²³ Prenys a bris vewgh; na dhewgh ha bos kethyon tus.

²⁴ Ytho, breder, yn py studh pynag y feu pub huni gelwys, gortes yndella gans Duw.

An Re Andhemmedhys ha'n Gwedhwesow

²⁵ Lemmyn a-dro dhe wyrghesow, nyns eus dhymm gorhemmynn a'n Arloedh, mes ow brys a rov avel onan neb yw lel, dre dregeredh an Arloedh.

²⁶ Dell dybav, drefenn an poenvotter y'n jydh hedhyw, da yw dhe dhen gortos dell ywa.

²⁷ Kelmys dhe wreg osta? Na hwila livreson. Livrys dhiworth gwreg osta? Na hwila gwreg.

²⁸ Mes mar temmedhydh, ny beghydh, ha gwyrghes mar temmedh, ny begh. Byttegyns an re a dhemmedh a's teves poenvos y'n kig, ha'gas gwitha rakhenna a vynnsen.

²⁹ Ow styr yw hemma, breder: devedhys ha bos pur verr yw an termyn; alemma rag, an re neb a's teves gwragedh, bedhens kepar ha pan vens i hebdha,

³⁰ ha'n re a gyn kepar ha pan na vens ow kyni, ha'n re neb a lowenha kepar ha pan na vens ow lowenhe, ha'n re neb a bren kepar ha pan vens i heb pythow,

³¹ ha'n re neb a wra devnydh a'n bys kepar ha pan na wrens i leun dhevnydh anodho. Rag yma furv an bys ma ow tremena dhe-ves.

³² My a vynn orthowgh bos heb fienasow. An gour dibries yw prederus a-dro dhe negys an Arloedh, fatell blekkyo dhe'n Arloedh;

³³ mes an gour pries yw prederus a-dro dhe negys an bys, fatell blekkyo dh'y wreg,

³⁴ ha rynnys yw y vrys. Ha'n venyn dhibries po an wyrghes yw prederus a-dro dhe negys an Arloedh, fatell vo sans hag y'n korf hag yn spyrys; mes an venyn bries yw prederus a-dro dhe negys an bys, fatell blekkyo dh'y gour.

³⁵ My a lever hemma rag agas les agas honan, heb gorra fronn vydh warnowgh, mes rag onester ha rag may hwonetthowgh an Arloedh heb lett.

³⁶ Mar tyb nebonan y vos owth omdhegi heb onester dh'y wyrghes, mars yw hi dres hy yowynkneth, ha mar tegoedh, gwres a vynno: nyns yw peghes, i demmedhens.

³⁷ Mes mars yw nebonan ha'y brys ow sevel yn fast, heb bos yn-dann dravyth a res, neb a rewl y vodh y honan, ha neb yw ervirys ev dh'y gwitha gwyrghes, ev a wra yn ta.

³⁸ Ytho, neb a dhemmedh y wyrghes a wra yn ta, ha neb na dhemmedh a wra gwell.

³⁹ Kelmys dh'y gour yw an wreg hedre vo ev bew; mes mar kosk ev, livrys yw hi dhe dhemmedhi neb a vynno hi, mar kwra hi henna y'n Arloedh.

⁴⁰ Mes dhe'm brys vy moy gwynn hy bys yw mar korta kepar dell yw hi; ha my a dyb y'm beus ynwedh spyrys Duw.