1 Korinthianys 3 - An Bibel Kernewek 20234 (Kernewek Kemmyn)

Kesoberoryon rag Duw

¹ Ha my, breder, ny yllis vy kewsel orthowgh hwi kepar ha pan vewgh tus spyrysel, mes avel tus a'n kig, avel fleghesigow yn Krist.

² Leth my a ros dhywgh; ny res vy boes, rag nag ewgh hwi parys ragdho. Yn hwir, hwath nyns owgh parys,

³ rag hwath a'n kig yth owgh. Rag a-ban eus avi ha kedrynn yn agas mysk, a nyns owgh hwi a'n kig, hag a nyns esowgh hwi owth omdhegi kepar ha tus kemmyn?

⁴ Yndella nebonan pan lever ‘Dhe Powl yth ov evy’, ha den arall ‘Dhe Apollos yth ov evy’, a nyns owgh hwi marnas denel?

⁵ Ytho, pyth yw Apollos? Pyth yw Powl? Gwesyon dredha may kryssowgh par dell ros an Arloedh dhe gettep onan.

⁶ My a blansas, Apollos a dhowras, mes Duw a wrug dhe devi.

⁷ Rakhenna naneyl neb a blans na neb a dhowr ny vern, saw unnsel Duw neb a wra dhe devi.

⁸ Neb a blans ha neb a dhowr yw parow, ha kettep onan a wra degemmeres y wober herwydh y wonis y honan.

⁹ Rag ni yw kesoberoryon Duw; hwi yw park gonedhys Duw, drehevyans Duw.

¹⁰ Herwydh gras Duw res dhymm, avel pennser sleygh my a worras sel, hag yma nebonan arall ow trehevel warnedhi. Mes y koedh dhe gettep onan bos war fatell dhrehav ev warnedhi,

¹¹ rag denvyth ny yll gorra sel marnas an sel re beu gorrys, hag yw Yesu Krist.

¹² Mar trehav nebonan, ytho, war an sel gans owr, arghans, meyn drudh, prenn, goera, kala,

¹³ ober kettep penn a wra dos ha bos apert, rag an jydh a wra y dhiskwedhes, rag y fydh diskwedhys gans tan, ha'n tan a wra previ py par ober re beu gwrys gans kettep penn.

¹⁴ Mar tur an ober a veu drehevys gans nebonan, ev a dhegemmer y bewas.

¹⁵ Mars yw leskys ober nebonan, ev a wra perthi koll, mes ev y honan a vydh selwys, byttegyns par dell vo gans tan.

¹⁶ A ny wodhowgh hwi agas bos tempel Duw ha bos Spyrys Duw trigys ynnowgh?

¹⁷ Mar tistru nebonan tempel Duw, Duw a dhistru an den na; rag sans yw tempel Duw, ha'n tempel na yth owgh hwi.

¹⁸ Na omdoelles denvyth; nebonan ahanowgh mar tesev y vos skentel y'n oes ma, des ha bos foll, may teffo ha bos skentel.

¹⁹ Rag skentoleth an bys ma yw follneth gans Duw. Rag skrifys yw, ‘Ev a vagel an dus skentel yn aga felder’,

²⁰ hag arta, ‘An Arloedh a woer prederow an dus skentel, i dhe vos euver.’

²¹ Ytho, nagonan na vostyes a-dro dhe dus. Pup-tra yw dhywgh hwi:

²² kyn fo Powl po Apollos po Kefas po an bys po bewnans po ankow po taklow y'n dydhyow ma po traow a dheu – oll an re ma yw dhywgh hwi,

²³ ha hwi yw dhe Grist, ha Krist yw dhe Dhuw.