1 Korinthianys 2 - An Bibel Kernewek 20234 (Kernewek Kemmyn)

Pregoth Krist Krowsys

¹ Pan dheuth vy dhywgh, breder, ny dheuth ow terivas dustuni Duw nag yn geryow ughel nag yn skentoleth ughel.

² Rag my a erviras na wodhyen travyth yn agas mysk marnas Yesu Krist hag ev krowsys.

³ Hag yth esen vy genowgh yn gwannder hag yn own ha meur a grena;

⁴ hag ow hows ha'm negys ny veu res dre dennvos geryow a skentoleth, mes yn diskwedhyans a'n Spyrys hag a nerth,

⁵ agas fydh ma na vo yn skentoleth mab-den mes yn nerth Duw.

Diskwedhyans Spyrys Duw

⁶ Hwath yn mysk an re adhves ni a gews skentoleth, kyn nag yw skentoleth a'n oes ma po a rewlysi a'n oes ma, neb a dremen dhe-ves.

⁷ Mes ni a gews furneth Duw, kevrinek ha kudh, a ragdhestnas Duw kyns an oesow rag agan glori.

⁸ Nagonan a rewlysi an oes ma ny gonvedhas hemma; rag mar konvetthens, ny growssens an Arloedh a wormola.

⁹ Mes, dell yw skrifys, ‘An pyth na welas lagas bythkweth ha na glewas skovarn ha na dheuth yn kolonn mab-den, an pyth re beu darbarys gans Duw dhe'n re a'n kar’ –

¹⁰ Duw re dhiskwedhas hemma dhyn ni der an Spyrys; rag an Spyrys a hwither pup-tra, ynwedh downderyow Duw.

¹¹ Rag py den a woer an pyth yw a dhensys yn hwir marnas spyrys a dhensys usi ynno? Yn kettella, ytho, denvyth ny gonvedh an pyth yw dhe Dhuw marnas Spyrys Duw.

¹² Ha ny dhegemmersyn spyrys an bys mes an Spyrys usi dhiworth Duw, may konvetthyn an taklow res yn hel dhyn ni gans Duw.

¹³ A-dro dhe'n re ma, ytho, ni a gews yn lavarow nag yw dyskys dre skentoleth mab-den, mes dyskys gans an Spyrys, ow styrya traow spyrysel dhe'n re yw spyrysel.

¹⁴ Den anspyrysel ny dhegemmer traow an Spyrys, rag dhodho follneth yth yns i, ha ny yll ev aga honvedhes, drefenn aga bos aswonnys dre spyrys.

¹⁵ An den spyrysel a vreus pup-tra mes ev y honan nyns yw gorrys yn-dann vreus denvyth:

¹⁶ ‘Rag piw re gonvedhas brys an Arloedh may hwrello y gevarwoedha?’ Mes ni a'gan beus brys Krist.