1 Korinthianys 14 - An Bibel Kernewek 20234 (Kernewek Kemmyn)

Tavosow ha Profoesansow

¹ Siwyewgh kerensa, mes yeunewgh yn ter an rohow spyrysel, yn arbennik may profoessowgh.

² Rag ev neb usi ow kewsel yn taves ny gews orth tus, mes orth Duw; rag ny'n konvedh denvyth, mes ev a gews kevrinyow y'n Spyrys;

³ mes neb eus ow profoesa a gews orth tus rag aga drehevyans, aga hennerth ha'ga honfort.

⁴ Neb usi ow kewsel yn taves a dhrehav y honan; mes neb usi ow profoesa a dhrehav an eglos.

⁵ My a vynn orthowgh hwi oll kewsel yn tavosow, mes moy es henna, profoesa; neb a brofoes yw brassa ages neb a gews yn tavosow, marnas nebonan a styr, may fo an eglos drehevys.

⁶ Lemmyn, breder, mar tov vy dhywgh ow kewsel yn tavosow, fatell vydhav dhe les dhywgh marnas my a gews orthowgh yn diskwedhyans, po yn godhvos, po yn profoesans, po yn dyskas?

⁷ Ha taklow heb bewnans ow seni, po pib po telynn, mar ny wrons sonyow diblans, fatell wodhor an pyth yw pibys po an pyth yw telynnys?

⁸ Rag hirgorn mar tyllo son nag yw diblans, piw a wra ombareusi rag an gas?

⁹ Y'n keth vaner ma, marnas yn taves hwi a re lavar diblans, fatell wodhor an pyth yw leverys? Rag ow kewsel y'n ayr y fydhowgh.

¹⁰ Heb mar, lies yeth dhihaval yma y'n bys, ha nagonan heb styr:

¹¹ byttegyns mar ny wonn styr an yeth, barbarus dhe'n kowser vydhav, ha'n kowser barbarus vydh dhymmo vy.

¹² Yndella hwi ynwedh; a-ban owgh hwi ter rag rohow an Spyrys, hwilewgh may fo dhywgh pals anedha, rag drehevyans an eglos.

¹³ Rakhenna, y koedh dhe neb a gews yn taves pysi rag galloes dhe styrya.

¹⁴ Rag mar pysav yn taves, ow spyrys a bys, mes ow brys nyns yw heb frut.

¹⁵ Pandr'a wrav vy, ytho? Pysi gans an spyrys my a wra, ha pysi gans an brys ynwedh; kana gans an spyrys my a wra, ha kana gans an brys ynwedh.

¹⁶ Poken mar pennigydh y'n spyrys, fatell yll nebonan usi ynter an re heb dyskans leverel ‘Amen’ dhe'th grasyans, pan na woer an pyth a leverydh?

¹⁷ Rag yth es'ta ow kodhvos gras yn ta lowr, mes nyns yw an den arall drehevys.

¹⁸ Dhe Dhuw y hwonn gras my dhe gewsel yn tavosow moy agesowgh hwi oll;

¹⁹ byttegyns, y'n eglos gwell via genev leverel pymp ger gans ow brys, may tysken re erell, ages deg mil er yn taves.

²⁰ Breder, na vedhewgh fleghes yn agas tybyans, mes bedhewgh babanes yn droktra, hag yn tybyans bedhewgh adhves.

²¹ Y'n lagha skrifys yw, ‘Dre boblow a davosow ankoth ha dre weusyow estrenyon kewsel a wrav orth an bobel ma, ha na hwath ny wrons i goslowes orthiv’, yn-medh an Arloedh.

²² Yndella tavosow nyns yw tokyn rag kryjygyon mes rag diskryjygyon, ha nyns yw profoesans rag diskryjygyon mes rag kryjygyon.

²³ Rakhenna, ha'n eglos kowal kuntellys war-barth ha peub oll ow kewsel yn tavosow, mar teu a-ji re heb dyskans, po diskryjygyon, a ny wrons i leverel agas bos gorboellek?

²⁴ Mes mars usi peub oll ow profoesa, hag y teu a-ji diskryjyk po den heb dyskans, keredhys yw gans peub, ha breusys gans peub,

²⁵ kevrinyow y golonn diskudhys yw; rakhenna, koedhys dhe'n dor, gordhya Duw a wra ev hag avowa bos Duw yntredhowgh yn tevri.

Pup-tra dhe Vos Gwrys yn Fordh Gempenn

²⁶ Ytho, pandr'a wrewgh hwi, ow breder? Pan omguntellowgh, pub huni a'n jeves hymna, po dyskans, po diskwedhyans, po taves, po styryans. Pup-tra bedhes gwrys rag drehevyans.

²⁷ Mar kews tus yn taves, ny res bos saw dew, po tri dhe'n moyha, ha peub war y dorn, hag onan styryes;

²⁸ mes mar nyns eus denvyth dhe styrya, tewes pub huni y'n eglos, ha kewses orto y honan hag orth Duw.

²⁹ Dew po tri frofoes kewsens; ha'n re erell, breusens;

³⁰ mes mars yw neppyth diskwedhys dhe nebonan usi owth esedha ena, tewes an kynsa.

³¹ Rag hwi oll a yll profoesa, onan hag onan, may fo pubonan dyskys ha pubonan kennerthys;

³² ha spyrysyon profoesi yw rewlys gans profoesi.

³³ Rag Duw nyns yw Duw a dheray mes a gres. Kepar hag yn oll eglosyow an syns,

³⁴ y koedh dhe'n benynes tewel y'n eglosyow: rag ny's teves kummyas a gewsel, mes bedhens gostydh, par dell lever ynwedh an lagha.

³⁵ Mars yw neppyth hag a vynnons y wodhvos, govynnens orth aga gwer yn chi; rag divlas yw dhe venyn kewsel y'n eglos.

³⁶ A wrug ger Duw dalleth genowgh hwi, po a ny dheuth saw dhywgh hwi?

³⁷ Mar tyb nebonan y vos profoes, po spyrysel, y koedh dhodho avowa bos an pyth a skrifav dhywgh arghadow an Arloedh.

³⁸ Mar ny aswonn hemma, na vedhes ev aswonnys.

³⁹ Ytho, ow breder, bedhewgh ter dhe brofoesa, ha na dhifennewgh kewsel yn tavosow;

⁴⁰ mes pup-tra bedhes gwrys dell dhelledh hag yn fordh gempenn.