1 Korinthianys 13 - An Bibel Kernewek 20234 (Kernewek Kemmyn)

Kerensa

¹ Mar lavarren yn tavosow a dus hag a eledh, ha my heb kerensa, brest ughel y son po symbal ow tynkyal y fien.

² Ha mar pe dhymm galloes dhe brofoesa, ha mar konvetthen pub kevrin ha pub oll godhvos, ha mar pe dhymm fydh gowal may hallen tenna dhe-ves menydhyow, ha my heb kerensa, ny vien travyth.

³ Ha mar rannen ow fythow oll, ha mar rollen ow horf dh'y leski, ha my heb kerensa, ny via kammenn dhe'm les.

⁴ Pell ow perthi yma kerensa; kuv yw kerensa, ny berth avi; kerensa ny vost, nyns yw goethus,

⁵ ny omdheg heb onester, ny hwila hy les hy honan, nyns yw es hy serri, ny wra vri a dhrokoleth,

⁶ ny's teves heudhder yn kammwrians, mes heudhhes yw y'n gwiryonedh.

⁷ Hi a berth pup-tra, a grys pup-tra, a wayt pup-tra, a wodhev pup-tra.

⁸ Kerensa ny fyll nevra; mes mars eus profoesansow, i a wra gorfenna; po tavosow, i a wra difygya; po godhvos, ev a wra gorfenna.

⁹ Rag yn rann ni a woer hag yn rann ni a brofoes;

¹⁰ mes pan dheu an pyth yw perfydh, gorfenna a wra an pyth usi yn rann.

¹¹ Pan en vy flogh, my a leveri avel flogh, my a dybi avel flogh, my a resna avel flogh; pan dheuth ha bos gour, my a worras dhe-ves traow a flogholeth.

¹² Rag lemmyn, ni a wel yn gweder, yn tewl, mes ena fas orth fas; lemmyn my a woer yn rann, mes ena my a wra aswonn yn tien, kepar dell ov vy aswonnys yn tien.

¹³ Ytho, lemmyn y pes fydh, govenek ha kerensa, aga thri; mes an brassa a'n re ma yw kerensa.