1 Esdras 7 - An Bibel Kernewek 20234 (Kernewek Kemmyn)

Sakrans an Tempel

¹ Ena Sisinnes governour Kelesyria ha Fenikia, ha Sathrabuzanes ha'ga howetha, owth holya gorhemmynnow myghtern Darius,

² a worweli an ober sans gans rach meur, ow kesoberi gans henavogyon an Yedhewon ha soedhogyon an tempel.

³ An ober sans a seweni, ha'n brofoesi Haggay ha Zekaria ow profoesa;

⁴ hag i a'n gorfennas herwydh gorhemmynn an Arloedh, Duw Ysrael. Yndella herwydh arghadow Kyrus ha Darius hag Artakserkses, myghternedh an Persianys,

⁵ an chi sans a veu gorfennys erbynn an tressa warn ugens a'n mis Adar, y'n hweghves blydhen a vyghtern Darius.

⁶ Ha pobel Ysrael, an oferysi, an Levysi ha'n re erell a'n divroedh a omguntellas gansa, a wrug herwydh an pyth o skrifys yn lyver Moyses.

⁷ I a offrynnas yn sakrans tempel an Arloedh kans tarow, dew kans hordh, peswar kans oen,

⁸ ha dewdhek bogh yowynk rag pegh oll Ysrael, herwydh niver dewdhek ledyer loethow Ysrael;

⁹ ha'n oferysi ha'n Levysi a sevis gwiskys yn aga dillas, herwydh aga theyluyow, rag servisyow an Arloedh, Duw Ysrael, herwydh lyver Moyses, ha'n borthoryon orth pub yet.

An Pask

¹⁰ Mebyon Ysrael a dheuth a'n gethneth a woelyas an pask y'n peswardhegves dydh a'n kynsa mis wosa an oferysi dhe vos glanhes war-barth.

¹¹ Ny veu glanhes oll mebyon an divroedh, mes oll an Levysi a veu glanhes war-barth,

¹² hag i a sakrifias oen an pask rag oll mebyon an divroedh ha rag aga breder aga honan an oferysi, hag ragdha i aga honan.

¹³ Oll mebyon Ysrael re dhehwelsa a'n divroedh a'n dybris, oll an re re dhibarthsa dhiworth taklow kasadow poblow an tir ha re hwilsa an Arloedh.

¹⁴ Seyth dydh i a woelyas goel an bara heb goell, ow lowenhe dherag an Arloedh,

¹⁵ rag ev dhe janjya bodh myghtern Asshur a-dro dhedha, ha krevhe aga diwleuv rag servis an Arloedh, Duw Ysrael.