1 Esdras 4 - An Bibel Kernewek 20234 (Kernewek Kemmyn)

Areth a-dro dhe'n Myghtern

¹ Ena an nessa, neb re gowssa a-dro dhe grevder an myghtern a dhallathas kewsel.

² ‘Syrrys, a nyns yw tus an kreffa, ow rewlya tir ha mor ha pup-tra eus ynna?

³ Mes an myghtern yw kreffa; ev yw aga arloedh ha'ga mester, ha pypynag a lever dhedha, gostydh dhodho yth yns.

⁴ Mar hworhemmynn may hwerryons an eyl erbynn y gila, i a'n gwra; ha mara's tannvon yn-mes erbynn an eskerens, yth ens, ha fetha menydhyow, fosow ha touryow.

⁵ I a ladh ha ledhys yth yns, mes ny dhisobayons gorhemmynn an myghtern; mars yns i tryghoryon, i a dheg pup-tra dhe'n myghtern, py preydh pynag a gevons ha pup-tra arall.

⁶ Ynwedh an re na serv y'n lu na gwerrya mes gonis an dor, peskweyth may hasons ha mysi, i a'n dre dhe'n vyghtern; hag i a gonstryn, an eyl y gila, may tallons tollow dhe'n myghtern.

⁷ Byttegyns nyns yw marnas unn den! Mar korhemmynn dhedha may latthons, ladha a wrons; mar korhemmynn dhedha may liffrons, livra a wrons;

⁸ mar korhemmynn dhedha mayth omsettyons, omsettya a wrons; mar korhemmynn dhedha may hwastyons, gwastya a wrons; mar korhemmynn dhedha may trehaffons, drehevel a wrons;

⁹ mar korhemmynn dhedha may trogghons dhe'n dor, treghi a wrons; mar korhemmynn dhedha may plansons, plansa a wrons.

¹⁰ Oll y bobel ha'y luyow yw gostydh dhodho. Moy es hemma, ev a wrowedh, ha dybri, hag eva, ha koska,

¹¹ mes i a woel a-dro dhodho, ha ny yll nagonan mos dhe-ves rag dyghtya a-dro dh'y negysyow y honan, na ny'n disobayons.

¹² Syrrys, prag nag yw an myghtern an kreffa, rag ev yw obayys yndella?’ Hag ev a dewis.

An Areth a-dro dhe Venynes

¹³ Ena an tressa neb re gowssa a-dro dhe venynes ha gwiryonedh (ha hemm o Zerubbabel), a dhallathas kewsel:

¹⁴ ‘Syrrys, a nyns yw an myghtern meur, a nyns yw tus pals, a nyns yw gwin krev? Ytho piw yw neb a's rewl, po piw a'n jeves an maystri warnedha? A nyns yw benynes?

¹⁵ Benynes a dhineythis an myghtern, ha'n bobel oll a rewl mor ha tir.

¹⁶ Dhiworth benynes y teuthons; ha benynes a vaga an keth tus hag a blansa an gwinlannow may teu an gwin.

¹⁷ Benynes a wra dillas tus; i a dheg glori dhe dus; ny yll tus bos yn few heb benynes.

¹⁸ Mar kuntellons owr hag arghans, po ken tra deg, hag ena gweles benyn fethus hy semlans ha'y thekter,

¹⁹ i a as dhe oll an re na mos dhe wari, ha lagatta orti, igor aga ganow, ha gwell yw hi gans pub huni ages owr po arghans po ken tra deg.

²⁰ Den a as y das y honan a'n maga, ha'y vro y honan, ha glena orth y wreg.

²¹ Gans y wreg y tiwedh y dhydhyow, heb preder a'y das nag a'y vamm nag a'y vro.

²² Ytho res yw hwi dhe aswonn, benynes dh'agas rewlya! ‘A ny oberowgh ha lavurya ha dri pup-tra ha'y ri dhe venynes?

²³ Den a gemmer y gledha, hag a dhe-ves rag vyajya ha dhe ladra ha dhe woelya war an mor ha war avonyow.

²⁴ Enebi lew a wra, ha kerdhes yn tewlder, mes wosa ladra ha ravna, ev a'n deg tre dhe'n venyn a gar.

²⁵ Den a gar y wreg moy es dell gar ev y das po y vamm.

²⁶ Lies res eth yn-mes a'ga rewl ragdha, ha res eth ha bos kethyon ragdha.

²⁷ Lies re verwis po trebuchya po pegha rag benynes.

²⁸ Ha lemmyn a ny grysowgh dhymmo? ‘A nyns yw an myghtern meur yn y grevder? A ny berth oll tiryow own a'y dochya?

²⁹ Byttegyns my re'n gwelas gans Apame, iswreg an myghtern, myrgh an den a vri, Bartakus, owth esedha a-barth dhyghow dhe'n myghtern

³⁰ ha kemmeres an diadem dhiwar benn an myghtern ha'y worra war hy fenn hy honan, ha hwettya y vogh gans hy leuv gledh.

³¹ Gans hemma an myghtern a lagatta orti a'y anow igor. Mar minhwerth orto ev a hwerth; mara pydh serrys orto, ev a's fekyl, rag may fo hi attes arta ganso.

³² Syrrys, prag nag yw benynes krev, pan wrons taklow a'n par na?’

An Areth a-dro dhe Wiryonedh

³³ Ena an myghtern ha'n ugheloryon a viras, an eyl orth y gila. Ytho ev a dhallathas kewsel a-dro dhe wiryonedh:

³⁴ ‘A Syrrys, a nyns yw benynes krev? An norvys yw bras, ha'n nev yw ughel, ha'n howl yw skav yn y resegva, rag y hwra ev tro an ebron ha dehweles dh'y dyller a-ji dhe unn jydh.

³⁵ A nyns ywa meur neb a wra an taklow ma? Mes gwiryonedh yw meur, ha kreffa ages pup-tra.

³⁶ Oll an norvys a elow war wiryonedh, ha'n nev a'n bennik. Oll oberow Duw a gren ha krysya, ha ganso nyns eus travyth anwiryon.

³⁷ Gwin yw anwiryon, an myghtern yw anwiryon, benynes yw anwiryon, ha densys yw anwiryon hag oll aga oberow yw anwiryon ha pup-tra a'n par na. Nyns eus gwiryonedh kammenn ynna, hag yn aga anwiryonedh y ferwons.

³⁸ Mes gwiryonedh a bes bys vynnari, hag a vew hag a drygh bys vynnari ha bys vykken.

³⁹ Ganso nyns eus faverans na degemmeres gobrow, mes ev a wra an pyth yw gwiryon yn le pup-tra yw anwiryon ha drog. Da yw gans pub den y weythresow,

⁴⁰ ha nyns eus travyth anwiryon yn y vreus. Dhodho yth yw krevder ha'n vyghterneth ha'n nerth ha meuredh an oesow oll. Benniges re bo an Duw a wiryonedh.’

⁴¹ Pan astelas kewsel, oll an dus a armas hag a leveris, ‘Meur yw gwiryonedh ha'n kreffa dres oll.’

Pewas Zerubbabel

⁴² Ena an myghtern a leveris dhodho, ‘Govynn pypynag a vynni, dres an pyth yw skrifys hogen, ha ni a'n re dhis, rag ty re beu kevys avel an furra. Ty a esedh rybov, hag a vydh henwys ow har.’

⁴³ Ena ev a leveris dhe'n myghtern. ‘Porth kov a'n ti a wruss'ta y'n jydh may feus gwrys myghtern, ty dhe dhastrehevel Yerusalem,

⁴⁴ ha dhe dhastannvon oll an lestri a veu kemmerys dhiworth Yerusalem, an re a worras Kyrus dhe denewen pan dhallathas diswul Babylon, hag ev a dos ti dh'aga daskorr di.

⁴⁵ Ty a dhedhewsys ynwedh drehevel an tempel a veu leskys gans an Edomysi pan o Yudi difeythys gans an Kaldeanys.

⁴⁶ Ha lemmyn, A arloedh an myghtern, hemm yw an pyth a bysav ha govynn dhiworthis, ha hemma a dhelledh dhe'th veuredh. Ytho my a bys may kewerri an ti a desys y gewera dhe Vyghtern nev, gans dha dhiwweus dha honan.’

⁴⁷ Ena Darius an myghtern a sevis hag a ammas dhodho, hag a skrifas lytherow ragdho dhe oll an alhwedhoryon ha'n wovernours ha'n gaslewydhyon ha'n wahalyethow ma'n dannvonsens war y hyns, ev hag oll an dus ow mos yn-bann ganso rag drehevel Yerusalem.

⁴⁸ Hag ev a skrifas lytherow dhe oll an wovernours yn Kelesyria ha Fenikia ha dhe'n re yn Lebanon, may trollens prennyer keder dhiworth Lebanon dhe Yerusalem ha ma'n gweressens ow trehevel an sita.

⁴⁹ Ev a skrifas a-barth oll an Yedhewon esa ow mos dhiworth y wlaskor dhe Yudi, drefenn aga rydhses, nag entra soedhek na gwahalyeth aga darasow gans nerth;

⁵⁰ may fe dhedha heb trubyt oll an tiredh ynno may trikkens, ha may taskorra an Edomysi an gwigow a gemmersens dhiworth an Yedhewon;

⁵¹ ha may fe res ugens talent pub blydhen rag drehevel an tempel bys pan vedha gorfennys,

⁵² ha may fe res deg talent moy rag offrynnow leskys war an alter pub dydh herwydh an gorhemmynn dhe wul seytek offrynn;

⁵³ ha ma's teffa aga rydhses oll an re devedhys a Babylon rag drehevel an sita, i hag oll an fleghes ha'n oferysi a dheuth.

⁵⁴ Ev a skrifas ynwedh a-dro dh'aga fygans ha dillas an oferysi ynna may fenystrens.

⁵⁵ Ev a skrifas may fe proviys an gweres rag an Levysi bys pan vedha an tempel gorfennys ha Yerusalem drehevys.

⁵⁶ Ev a skrifas may fe tiredh ha gobrow proviys rag oll an re esa ow kwitha an sita.

⁵⁷ Hag ev a dhaskorras dhiworth Babylon oll an lestri re bia gorrys a-denewen gans Kyrus; pup-tra gorhemmynnys gans Kyrus, ev a worhemmynnis may fe gwrys, ha dannvenys dhe Yerusalem.

Pysadow Zerubbabel

⁵⁸ Pan eth an gour yowynk dhe-ves, ev a dhrehevis y fas dhe'n nev war-tu ha Yerusalem, hag a wordhyas Myghtern nev, ow leverel,

⁵⁹ ‘Ahanas y teu an trygh; ahanas y teu furneth, ha dhis yth yw an glori. Dha was yth ov.

⁶⁰ Benniges yth os, neb re ros dhymm furneth; aswonnav grasow, A Arloedh agan tasow.’

⁶¹ Ytho ev a gemmeras an lytherow, ha mos dhe Babylon ha derivas hemma dhe oll y vreder.

⁶² Hag i a wormolas Duw aga thasow drefenn ev dhe ri dhedha delivrans ha kummyas

⁶³ a vos yn-bann ha drehevel Yerusalem ha'n tempel may feu y hanow gelwys warnodho; hag i a woelya gans menestrouthi ha lowender seyth dydh.