1 Esdras 2 - An Bibel Kernewek 20234 (Kernewek Kemmyn)

Kyrus a wront Dehwelyans dhe'n Dhivresow

¹ Y'n kynsa blydhen a reyn Kyrus myghtern an Persianys, rag may fe kewerys ger an Arloedh dre anow Yeremia,

² an Arloedh a wrug dhe spyrys Kyrus myghtern an Persianys difuna, hag ev a dhellos gwarnyans der oll y wlaskor, hag ynwedh ev a'n skrifas:

³ ‘Yndella y lever Kyrus myghtern an Persianys: Arloedh Ysrael, an Ughella Arloedh, re'm gwrug myghtern an norvys,

⁴ hag ev re'm gorhemmynnis may treheffiv chi ragdho yn Yerusalem, usi yn Yudi.

⁵ Ytho mars yw nebonan ahanowgh hwi a'y bobel, re bo y Arloedh genowgh; kewgh yn-bann dhe Yerusalem, usi yn Yudi, ha drehevewgh chi an Arloedh, Duw Ysrael – ev yw an Arloedh trigys yn Yerusalem.

⁶ An re usi trigys yn tylleryow a-dro bedhes gweres res dhedha gans tus a'gas tyller gans owr hag arghans,

⁷ ha gans rohow ha gans mergh ha gans chatel, ha taklow erell keworrys avel offrynnow ambos rag tempel an Arloedh usi yn Yerusalem.’

⁸ Ena pennow teyluyow loethow Yuda ha Benyamin a sevis yn-bann, ha'n oferysi ha'n Levysi, hag oll an re difunys aga spyrys gans an Arloedh rag mayth ellens yn-bann rag drehevel an chi yn Yerusalem rag an Arloedh.

⁹ Aga hentrevogyon a's gweresas gans pup-tra, gans arghans ha gans owr, ha gans mergh ha gans chatel ha gans myns meur a offrynnow ambos a lies difunys aga holonn.

¹⁰ Myghtern Kyrus a dhug yn-mes lestri sans an Arloedh re bia degys dhe-ves dhiworth Yerusalem gans Nebukadnessar ha ganso gwithys yn y dempel a imajys.

¹¹ Pan dhug Kyrus myghtern an Persianys an taklow ma yn-mes, ev a's ros dhe Mithridates, y alhwedhor,

¹² ha ganso ev i a veu res dhe Sheshbassar, governour Yudi.

¹³ Niver an re ma o mil hanaf a owr, mil hanaf a arghans, naw ynkyslester warn ugens a owr, deg bolla warn ugens, dew vil peswar kans ha deg a vollow a arghans, ha mil lester arall.

¹⁴ Oll an lestri a veu daskorrys, owr hag arghans, pymp mil peswar kans naw ha tri ugens,

¹⁵ hag i a veu degys tre gans Sheshbassar gans an dhivresow a dheuth a Babylon dhe Yerusalem.

Enebieth orth Dastrehevyans Yerusalem

¹⁶ Yn termyn Artakserkses myghtern an Persianys, Bishlam, Mithridates, Tabeel, Rehum, Beltethmus, an skrifwas Shimshay, ha'ga howetha erell trigys yn Samaria hag yn tylleryow erell, a skrifas dhodho an lyther a hol, erbynn an re esa trigys yn Yudi ha Yerusalem:

¹⁷ ‘Dhe vyghtern Artakserkses agan arloedh, dha servysi an kovadhor Rehum ha'n skrifwas Shimshay hag eseli erell a'ga honsel, ha'n vreusysi yn Kelesyria ha Fenikia:

¹⁸ Bedhes godhvedhys lemmyn dh'agan arloedh an myghtern, bos an Yedhewon a dheuth yn-bann dhiworthis gyllys dhe Yerusalem hag i dhe vos ow trehevel an sita na, gorth ha tebel dell yw hi, owth ewnhe hy marghasvaow ha'y fosow hag ow korra yn aga le an selyow rag tempel.

¹⁹ Yndella mar pydh an sita ma drehevys ha'n fosow gorfennys, ny naghons hepken a dyli an trubyt mes moy es henna i a sev orth myghternedh.

²⁰ A-ban usi drehevel an tempel ow mos yn-rag, ni a dyb na vydh an gwella kusul gasa tra a'n par na,

²¹ mes ni dhe gewsel gans agan arloedh an myghtern rag may hwitthrer yn kovadhow dha dasow.

²² Ty a gyv y'n kovlyvrow an pyth re beu skrifys a-dro dhedha, ha ty a wel bos an sita ma diwostydh, ow trobla kekeffrys myghternedh ha sitys erell,

²³ ha'n Yedhewon dhe vos diwostydh ha prest ow trehevel esedhvaow ynni a-henys. Henn yw an acheson ragdho may feu an sita ma gwastyes.

²⁴ Ytho ni a dheriv dhis, A arloedh an myghtern, na vydh fordh na fella rag ty dhe vos dhe Kelesyria ha Fenikia mara pydh an sita ma drehevys, ha'y fosow gorfennys.’

²⁵ Ena an myghtern ow korthybi dhe'n kovadhor Rehum, Beltethmus, an skrifwas Shimshay ha'n re erell esa gansa trigys yn Samaria ha Syria ha Fenikia, a skrifas dell siw:

²⁶ ‘My re redyas an lyther a dhannvensowgh dhymm. Yndella my a worhemmynnis may hwitthrer, ha kevys yw an sita na dhe sevel yn aray erbynn myghternedh a-henys,

²⁷ ha bos an bobel ynni ow kul rebellyans ha bresel a'ga usadow, ha myghternedh alloesek ha fell dhe reynya yn Yerusalem, hag i dhe gemmeres trubyt a Kelesyria hag a Fenikia.

²⁸ Yndella my re worhemmynnis may fo lett war an dus na rag drehevel an sita, ha dhe waytya na vo travyth moy gwrys,

²⁹ ha nag ello pella droktraow a'n par ma, dhe annia myghternedh.’

³⁰ Ena pan veu redys an lyther ma a vyghtern Artakserkses, Rehum ha'n skrifwas Shimshay ha'ga howetha eth yn skav dhe Yerusalem gans marghoglu ha myns bras a gasoryon ervys hag i a dhallathas lesta an re esa ow trehevel. Ha drehevel an tempel yn Yerusalem a hedhis bys an nessa blydhen a reyn Darius myghtern an Persianys.