Yuda 1 - ABIBILIA NGAKIRO NAAJOKAK

¹ Ayong Yuda ekasuban etich a Yesu Kiristo atarai lokaatokeng a Yakobo ngesi egirunit abarua naga. Egirakinit lu anyara Akuj, lu ibooyete anamina a Akuj Apa tochoikinite Yesu Kiristo.

² Agasi atamar toliwor akisienut ka ekisil ta amina ngakus lokojokon noi.

Ngiketatamak lukaliokok

³ Ngipaalon kang lu amina, erichakina kolong ayong akigirakin esi ngakiro a ayuuno ana erai ayok kadaang. Engolik ayong atamar echamit kegirakini, sodi kemaima totitinyeketo ijiete kotere anupit na etaanyu Akuj ngitunga keng akitaanyunet apei torumor.

⁴ Kainyo aropun ngitunga ngiche lu nyenupito ngakiro a Akuj. Elocho kesi ngakiro a ajokis a Akuj yok toliwor kesi esubeta ngakiro naaronok, nabo engerito kesi Yesu Kiristo lo erai bon Ekarikon ka Ekapolon yok. Kolong kanuan, adwario Anagiran eriras, lo eanyunete kesi.

⁵ Kainyo tani kiyenete esi nugu daang, asaki ayong akisitamun esi eger lo ayuunea Ekapolon Ngisirael alo Misiri, nakaneni ani ekisidi tomunya lu awounete akinup.

⁶ Kitamutu ngimalaikae lu adeparete apolou nasek edodikinitae sodi toisikis kesi ni kolong sek eboyoto, eenit Akuj kesi a ngiriko alu nyelachakin jik anaribu ana isidaritor Akuj kesi Akolongit Naapolon na a eriras.

⁷ Kitamutu tani Sodom ka Gomora ta ngirerea luche lu edunyatar, asubete ngitunga a ngirerea kangulu ngakiro napei asubete ngimalaikae ngulu nabo aminasi kesi emalaanu ka etereku a ngawat logela, eriabasi kesi aloriras a akim ana nyedaun idodikinit eriras ngolo kesi ngakiro na a ngakonyen.

⁸ Aloger alopei kangolo, eya ngitunga ngulu ngakiro na itamete na etiliwosi kesi lu esechanakinete ngawat kech, emenyasi kesi apolou a Akuj nabo iyenyete ngisubuna lu ipuroi lu eya kidiama.

⁹ Nyesuba tani emalaikat loapolon Mikael kongina. Na eburaata ngesi ka Ekipe, na apegatar ngesi ka Ekipe kotere atamar ngae elemari akwaan a Musa, nyitorono Mikael Ekipe kiyeny nakaneni abu tama, “Kikilakini iyong Ekapolon!”

¹⁰ Nakaneni ematanakinosi ngitunga ngulu ngakiro na nyeyenete iyenyasi, ani ngakiro na itwanganakinosi kesi loger a ngitieng, ngesi ngakiro napei inyasunete kesi.

¹¹ Oitiakoi! Abe etioko nginyas eanyunete kesi! Ewapa kesi erot lopei kolong a Kain. Kotere ngaropiyae, aneikinosi kesi ngasechesea na kolong asechi Balaam. Echanaketa kesi loger a Kora, nakaneni amunyarosi kesi loger keng.

¹² Kotere amera na echalatar kesi, ikote kesi ngakemera a asakatan na iriamiriameta ka esi akinyam akimuj a Ekapolon. Irichito kesi ngakookies kech make. Ikote kesi ngidowon lu ijukit ekuwam nakaneni emam akiru eyaunete. Ikote kesi ngikito lu nyekoniunete ageor tani ngirwa lu ekonitor ageor, ikote ngikito lu aditun anaten, nakaneni aoko jik.

¹³ Ikote kesi ngitoroi a anam lu ekulaate, nabo ileerete ngakiro kech na a ngileech loger a ngikurudoi. Ikote kesi ngikanyer lu ilato, lu asubaki Akuj nikirion chuch ni epete kesi jik.

¹⁴ Arai kolong Enok itwaan nia ngikan-kaarei napei ani eyei Adam, ngesi kolong adwari ngakiro kech a angorot tama, “Kingolikisi a, epote Ekapolon ka ngimalaikae keng lukaalak lu italeuno

¹⁵ akirirare ngitunga daang, kirira kesi daang kotere ngakiro naaronok asubete kesi ka nabo ngakiro naaronok daang eruorotor ngesi ngikasechak!”

¹⁶ Engolopasi ngitunga lugu ngirwa daang, nabo itoronito luche, iwapito kesi etereku kech loaronon, iwogasi kesi nabo ediakito ngitunga ngiche esakete ariamun ibore anikech.

Akikilakin ka akitatam

¹⁷ Nakaneni ngipaalon kang, kitamutu na kolong sek kilimokinete ngimeanara a Ekapolon yok Yesu Kiristo.

¹⁸ Kilimokinete esi tamasi, “Na enangea ngirwa lu esal, epote ngitunga lu kikianatar esi, eraakasi kesi ngitunga lu iwapito etereku kech loaronon.”

¹⁹ Ngitunga ngulu ngesi irokunete atiakatiaka, erikit kesi etereku kech lo a akwap, nabo emam Etau a Akuj anikech.

²⁰ Nakaneni ani esi ngipaalon kang, torubakisi idukosi lokojokon ananupit kus ana italeuno. Kilipa kotere agogongu a Etau a Akuj,

²¹ nabo torubakisi iyakasi namina a Akuj, erai idarito esi Ekapolon yok Yesu Kiristo kitaanyuni esi akiyar na nyedaun kotere akisienut keng.

²² Kisieneto ngitunga lu ichanasi,

²³ toyuutu luche ani ikopuneto anakim. Ani eya ngiche, kidodiutu ngisien ka aemit aapei. Nakaneni toremokinos tani ngiworui kech lu etoron etereku kech loaronon.

Akilip na a ekipur

²⁴ Nika ngolo epedori akiratakin esi nyiidakarosi, nabo kiyau esi emam akisech napolou keng,

²⁵ nika ngina bon erai Akuj Akayuunan yok ani a Yesu Kiristo Ekapolon yok, min ekipur ka apolou, ka agogongu ta apolokinit alokaru kadaang, napei tokona ta nakajik! Aamen.