Yona 1 - ABIBILIA NGAKIRO NAAJOKAK

Awou Yona akiwap ngakiro a Ekapolon Akuj

¹ Tolimok Ekapolon Akuj Yona lo arai lokookeng a Amitai, akiroit naga tama,

² “Tonyou, tolot Ninewi, lore loapolon ngolo tolimo eriras lo ebunit nikeng, kainyo engolik ayong atamar aroner ere ngolo noi.”

³ Nakaneni tonyou Yona tolot Tarchich esaki akilany Ekapolon Akuj. Tolot ngesi Yopa toriam atubwa na anyounit alosit Sipania. Tatach ngesi ngaropiyae nadoket, toloto ka ngitunga lu ayakasi natubwa, esaki akilany Ekapolon Akuj.

⁴ Nakaneni tachaku Akuj ekuwam lotiapolon nanam, tokulau anam lokojokon, tonyou atubwa abwanga.

⁵ Toema ngitunga lu adokito atubwa, kikaloik itwaan daang akuj keng. Apot kesi tachakakis ngiboro lu ewokit atubwa nakipi esakete tooker atubwa. Alomarit sek Yona tooma atubwa, kinapakin tanakak ngaju.

⁶ Bu ekamean atubwa nikeng tolimok ngesi tama, “Etige ekajoton, nyo isubi iyong? Tonyou tanyara akuj kon! Tokona ngon epedori kingarak ngoni nyikimunyar.”

⁷ Tolimonokinos ngitunga lu adokito atubwa make tamasi, “Potu atarama ekura atoyeneta itwaan ni kirikok ngoni ngakiro naaronok nugu.” Tarama kesi ekura, toliwor ngakiro ngaka Yona.

⁸ Sodi tolimokis kesi Yona tamasi, “Tolimokinae, ngae kirikok sua ngakiro naaronok nugu? Nyo isubi iyong? Anikwap ibunitor iyong? Irai iyong ebukut ali?”

⁹ Tolimok Yona kesi tama, “Arai ayong Eburaniait. Elipit ayong Ekapolon Akuj, Akuj a adis, nakolong asubi akwap ka anam.”

¹⁰ Tolimok Yona kesi atamar asiit ngesi ani a Ekapolon Akuj.

¹¹ Tobul ngitunga ngulu lokojokon, tolimokis ngesi tamasi, “Anukiro nugu isubak iyong!” Tokulau anam noi, sodi tolimokis kesi Yona tamasi, “Anukiro tokona kisubakinea sua iyong toyonea anam?”

¹² Tatachu Yona tama, “Tadakarae ayong kimasakis nanam, toyon anam, kainyo ayeni ayong atamar ayong ayaunit ekuwam lotiapolon logo nikus.”

¹³ Kaneni dang, apot ngitunga ngulu kigurokis atubwa lokojokon esakete akijukar lokwar, nakaneni kipiyo, kainyo abu anam tokulau lokojokon noi.

¹⁴ Dio kikaloikis kesi Ekapolon Akuj ebalasi, “Ee Ekapolon Akuj, kimaimai sua iyong nyikimunya sua kotere akitu a itwaan kaen, nyikipaik sua ngaakot keng, kainyo iyong Ekapolon Akuj isubak nugu. Eraakasi nugu ngaka akiding kon.”

¹⁵ Ani erumor tadakut kesi Yona kimasakis nanam, toyon anam atipei.

¹⁶ Kotere ngakiro nguna, toema kesi Ekapolon Akuj lokojokon, kipeyokis Ekapolon Akuj akipeyos kikongo atamar kisubi etich keng.

¹⁷ Toseu Ekapolon Akuj ekolia lotiapolon kiliko Yona. Kiboi Yona anakook a ekolia ngirwa nguuni, akwaar ka apaaran.