Yoel 1 - ABIBILIA NGAKIRO NAAJOKAK

¹ Akiroit naga alimokini Ekapolon Akuj Yoel lo arai lokookeng a Pesuel.

Ialolongete ngitunga kotere ngamanat na enyasun

² Kiirasi ngakiro nugu, esi ngikasukou. Topupokisi, ngitunga daang lu iyakasi Yuda. Eya ngakiro na ikote nugu na asubakinosi anikus nakanuan a? Kori ngirwa lukolong kata apaakus a?

³ Tolimokisi ngide kus ngakiro nugu, elimokinete kesi ngide kech, tolimokis ngide kech alesit na iwapit nakech.

⁴ Anyam emaase ngamanat a ngalooso. Ibore ni aisikini emaase lokatubon, tanyam emaase lokaalan. Ibore ni aisikini emaase lakaalan, tanyam emaase lo eporit. Ibore ni aisikini emaase lo eporit, tanyam emaase lokamunyaran.

⁵ Esi ngikelewak, tonyoutu sodi kikalout, kigoro esi lukamatak emuna lo epuritoe, enyasun ngamusabib na epurere emuna lokitetet.

⁶ Kainyo abu ajore a emaase nakwap yok, etiono ajore ngina nabo elal noi emam kona imarunio, ekwaka ngikel kech ikote lua engatuny.

⁷ Enyasut kesi ngimusabib yok, nabo erikasi ngimeyana yok. Abolochiasi kesi ngikito, edong ngaten na alokidiama ekwangak.

⁸ Kigoro loger a apese ana enapi ngiboro lu igoror na etoanea ekile lo edikino iusi ngesi.

⁹ Emam ngakiria ka emuna lu ipeyeo alokai a Akuj. Ialolongete ngimurok a Akuj kainyo emam ngalemunet elemikinete Ekapolon Akuj.

¹⁰ Emam ibore eringa eyei namanat, ialolongete ngalup kainyo enyasun ngikinyam, aoko ngamusabib nabo aoniyosi ngikito a akimiet.

¹¹ Kialolongo, esi ngiketak, kikaloutu, esi lu iyokiyete ngimusabib, kainyo enyasun ngakanoi ka erau, iteni dir enyasun ngalemet daang anamanat.

¹² Aoko ngimusabib ka ngimeyana atoniasi ngalam ka ngingolea ta ngikalalio. Ajongoto ngitunga alakara.

¹³ Tanapa ngiboro lu igorore kikalout, esi ngimurok lu isubete etich alokeno a ngakipeyos a Akuj. Tolomasi kai a Akuj sodi kialolongo akwaar kiiya kiwala! Kainyo emam ngakiria ka emuna lu ilemikinete esi Akuj kus.

¹⁴ Todungutu atamar toronoi akimuj, tanyarautu ngitunga lokiriam! Tochunakisi ngikarikok ka ngitunga daang a Yuda tochunakinos kai a Ekapolon Akuj ana erai Akuj kus sodi kikaloikis ngesi.

¹⁵ Aapuu akolongit a Ekapolon Akuj, akolongit na eyaunea Akuj Naationon nginyas. Eroner noi ebuloi a akolongit kangina!

¹⁶ Ikwa nyinyasuna ngamanat yok kitee ngoni a? Emam akiena ka alakara alokai a Akuj yok.

¹⁷ Abosikis ngikinyam nalup nakoonok. Emam akimuj na ikachakinio lokerui, enyasun ngidulae, emam ibore eyei tooma.

¹⁸ Eruosi ngaatuk eriabasi kainyo angopikis nginyia, ichanasi tani ngisipaan a ngamesekin.

¹⁹ Kegoronokini ayong iyong Ekapolon Akuj, kainyo aoko nginyia ka ngikito, asubut kenomia akim.

²⁰ Kigoronokinete iyong tani ngitieng lu alomoding, kainyo aoko ngayana.