Tito 1 - ABIBILIA NGAKIRO NAAJOKAK

¹ Ayong Paulo lo arai ekasuban etich a Akuj, ka emeanara a Yesu Kiristo ngesi egirunit abarua naga. Kaseunio ayong engarak ngitunga lu aseuni Akuj tonupeta lokojokon nabo etoyen kesi ngakiro na iteni ka eger lo itemokino ngitunga a Akuj ibooyete.

² Ngakiro nguna kesi igienore akiyar nanyedaun. Akuj ngina nyisudeene, ngesi kolong kichikakini ngoni akiyar naga a angorot eringa akwap nyesubakina.

³ Kidodiu ngesi ngakiro nguna anakiroit keng na etemokinor esaa lo kolong asakit ngesi. Kareikinio ayong ngakiro nguna, nakaneni etatami ayong ani kadungokinea Akuj Akayuunan yok.

⁴ Egirakinit ayong Tito lo erai lokookang dir anakiro a Akuj ana kinupit ngoni daang. Agasi atamar kitaanyu Akuj Apa ka Yesu Kiristo Ekayuunan yok ajokis ka ekisil.

Etich a Tito alo Kirete

⁵ Kaisikini ayong iyong alo Kirete, tosubak ngakiro daang na aroko nyesubakina, nabo toseu ngikasukou a ngikanisae alorerea kadaang loger lo kolong kalimokinitor.

⁶ Ejoikinit ekasukout a ekanisa peitoronitae, ejoikinit erikit aberu apei bon. Ejoikinit ngide keng eraakasi lu enupito ngakiro a Akuj nabo nyeeliworosi kesi lua nginyas kori lu nyepupete ngakiro.

⁷ Kona epolokinitor ekarikon a ekanisa etich a Akuj, nyejoikinit ngesi itoronitae. Nyejoikinit ngesi erai itwaan nikewogan kori ni edesem etau, kori nikelewan kori nikaadengan, kori ni iterekuyarito ngaropiyae.

⁸ Ejoikinit ngesi erai itwaan ni ipeyoununi ngipeyok anawi, nabo tarai itwaan ni emina ngakiro naajokak. Ejoikinit erai itwaan ni iapunit ngakiro, ka ni etenoono, ta ni italeuno tochoikinite ngakiro.

⁹ Ejoikinit ngesi etionikini jiik anupit ngakiro a Akuj na iteni loger lo itatamere. Aloger kangolo, epedori ngesi akitititiny luche a akitatamet ana iteni ani nabo dang kisileereu ngakiro na ichwangakinito lu epegasi ngakiro a Akuj.

¹⁰ Kainyo eyakasi ngikaalak lu engerito Akuj, ngitunga lu iruorosi ngakiro napasiek, kingalaate ngitunga, tarai cha noi lu areeunosi alodin a Ngiyaudi.

¹¹ Ejoikina kesi isililingio, kainyo echana kesi ngitunga a ngawiyei anakaalak ani itatameta ngakiro na nyejoikinit itatamete, esubete kesi kongina ani esaketa aanyun ngaropiyae na a ngileech.

¹² Itwaan a Kirete elope niarai epei a ngikadwarak kech, ngesi alimuni ngakiro na iteni tama, “Eliokoko ngitunga a Kirete ngipean, ikote ngitieng luaronok nabo dang, edakaka takalanyaka.”

¹³ Eraakasi ngakiro nguna iteni. Ejoikinit iyong ikilakini kesi lokojokon toliworotor kesi ngikanupak luajokak

¹⁴ lu nyeneikina anupit ngakiro napasiek na isisaate Ngiyaudi ka ngitalio a ngitunga alu angero ngakiro na iteni.

¹⁵ Ikiuna ibore daang alotunga alu ikiuna, nakaneni emam ibore ikiuna alotunga alu eroko alu nyenupito ngakiro a Akuj, kainyo aroketa kolong ngitamen kech ka ngitai.

¹⁶ Iwogasi ngitunga ngulu atamar kiyeni ngakiro a Akuj, nakaneni idodiunit eboyor kech atamar nyeyenete. Kikadakinete kesi nabo nyepupete ngakiro, nyepedorete kesi asubakin ibore niajokon tani wadiochichi.