Sekaria 1 - ABIBILIA NGAKIRO NAAJOKAK

Enyarit Ekapolon Akuj ngitunga keng tobongut nikeng

¹ Elap lo a ngikan-kauni a ekaru alo a ngiarei alo araakar Dario ekapolon a Persia, abu Ekapolon Akuj tolimok ekadwaran Sekaria lokookeng a Berekia, tarai etatait a Ido, akiroit.

² Tolimok Akuj Namerikanyer Sekaria atamar tolimok ngitunga tama, “Ayong Akuj Namerikanyer, angoikinit kolong taapaakus noi.

³ Nakaneni abala tokona ayong, tobongutu nikang, atobongu ayong nikus.

⁴ Nyiikokis taapaakus lukolong alimokinete ngikadwarak atamar toisikis elote kech loaronon ka ngakiro naaronok asubete kesi nakaneni towout kesi akiirar ka akiwap ngakiro kang, ayong Akuj Namerikanyer.

⁵ Taapaakus a, nyaalu tokona? Ani bo ngikadwarak, ikwa nyedauna kolong a?

⁶ Apon taapaakus nyiirirae ani angerioto ngitalio ka ngakichikichiket kang nakolong adungokini ayong kesi esitoru lokadwarak lu araakasi ngikasubak etich kang a? Ngirwa ngulu, apot tolunga ngasechesea tamasi, ‘Kisubea sua Akuj Namerikanyer nguna etemokino kisubea itemem ka elote kosi ka nguna kisubi sua. Nguna dir abu ngesi tosubak.’ ”

Ngangolei

⁷ Akolongit na ngatomwon-arei ka ngoomwon a elap alo a ngitomon ka epei (alo enyaritae Chebat), a ekaru alo a ngiarei alo araakar Dario ekapolon, ayong ekadwaran Sekaria, abu Akuj katolimok akiroit.

⁸ Nakwaare, engolik itwaan edokit angole naarengan. Awei ngesi alokiding ngikito lube talopara alu ayakasi nadipo. Kaku keng, ayakasi ngangolei nache naarengak, ka namugeyek ta naakwaak.

⁹ Engit ayong ngesi atama, “Ekaapaan, nyo eger a ngangolei kanu?” Tatachu ngesi tama, “Kedodikini ayong iyong eger kech.

¹⁰ Lugu kesi lu amea Ekapolon Akuj akireb akwap.”

¹¹ Tolimokis ngangolei emalaikat ngolo tamasi, “Kirim sua akwap daang. Kianyu atamar idatakinit akwap daang echakina chek.”

¹² Sodi tolim emalaikat tama, “Ee Akuj Namerikanyer, ingoik iyong Yerusalem ka ngirerea a Yuda a ngikaru a ngitomwon-kaarei tokona. Idarete tokona kesi a ngikaru a ngiai nabo eringa iyong nyidodikina kesi ngisien?”

¹³ Abu Ekapolon Akuj tatachak emalaikat ngolo ngakiro na abalasi alotau keng chuu.

¹⁴ Katolimok ayong emalaikat ngolo atamar atolimo ngakiro na alimu Akuj Namerikanyer ebala, “Keterekuyarit ayong Yerusalem lokojokon.

¹⁵ Angoikinit ayong ngibukui lu ibooyete nikaalimon. Iteni dir angoikini ayong Ngisirael wadio, nakaneni apot ngibukui ngulu kitorono noi ngichan a ngitunga kang.

¹⁶ Kotere nguna, abongu ayong Yerusalem edodik ere ngolo ngisien. Edukokinio akai kang neni, esiakin akitem ni edukokinio alore alokitetet.”

¹⁷ Ani erumor katolimok ayong emalaikat ngolo atamar atolimo akiroit nache naga, “Ebala Akuj Namerikanyer kona, ‘Ilelebun ajako lorerea kang. Ayong Ekapolon Akuj engarakini nabo ere a Yerusalem. Ee robo, aseuni ayong ere a Yerusalem toliwor ngesi erai ere kang.’ ”

Ngaamwar

¹⁸ Engolia ayong nabo ataanyunga ngaamwar ngoomwon.

¹⁹ Engit ayong emalaikat lo kiruoror atama, “Nyo eger a ngaamwar kanu?” Katatachak ngesi tama, “Eraakasi ngaamwar nugu ngibukui lukolong ealarete Yuda ka Isirael ta Yerusalem.”

²⁰ Ani erumor kedodik Ekapolon Akuj ayong ngiketiekak ngasua nguomwon.

²¹ Engis ayong atama, “Nyo eponito ngitunga lugu akisub?” Tatachu ngesi tama, “Eponito ngitunga lugu akitubul ka amunyar ngibukui lukajwok lukolong aremete akwap a Yuda, topetasi ngitunga keng.”