Rus 1 - ABIBILIA NGAKIRO NAAJOKAK

Awosi Elimelek Moab

¹ Kolong a angorot erai ngikatubok ngakiro epolokinito akwap a Isirael, tolom eron a akoro nakwap ngina. Abu ekile epei a emachar a Epirasa, tonyou alore a Betleem anakwap a Yuda, tolot Moab kirukosi ka aberu keng ka talokookeng ngiarei.

² Anyaritae ekiro keng Elimelek, tonyaritetei aberu keng Naom. Anyaritae talokookeng Malon ka Kilion. Tolot kesi nakwap a Moab toloma neni.

³ Totoan Elimelek. Kidongo Naom ka talokookeng luarei make.

⁴ Kiutasi ngide ngulu ngapesur a akwap a Moab na anyaritae Oripa ka Rus. Adaunet a ngikaru asibit ngitomon,

⁵ totoaka Malon ka Kilion dang. Sodi kidong Naom anapei emam ekile kori talokookeng.

Abongosi Naom ka Rus Betleem

⁶ Ani ekisidi kiira Naom atamar apia Ekapolon Akuj ngitunga keng etiliwo akwap a Isirael aka ajako. Taramakis ngesi ka ngaterak keng anakwap a Moab.

⁷ Tonyout kesi aapei alosit nakwap a Yuda. Ani enangete kesi lorot,

⁸ tolim Naom tama, “Kapesi tobongosi lotunga kus. Kingarak Ekapolon Akuj esi loger lo kingarakineta esi ayong ka ngikasiak.

⁹ Kingarak Ekapolon Akuj taanyut ngikiliok lu kuusete esi nabo taanyuneta ngawiyei.” Sodi tonuak ngesi kesi tolimok atamar toloto niajokon. Nakaneni kikalout kesi

¹⁰ tolimokis ngesi tamasi, “Mam, kilosi sua ka iyong lotunga kon.”

¹¹ Tatachak Naom kesi tama, “Tobongosi ngide kang, nyo isaketa esi akirukor ka ayong? Aliwae aanyunea ayong ngide lu kuusete esi nabo? Tobongosi lotunga kus kainyo amojong ayong nyekeusio nabo.

¹² Arai tani atasaki ayong akuuto nabo, sodi keus akolongit naga atouri ngide,

¹³ kedikino esi idarete ngide ngulu topolout a? Ipedorete esi akinger itwaan iche kiusi a? Meere kongina ngide kang, iyenete esi atamar nyitemokino nguna. Ekoni ayong itwaan nilamam ani a Ekapolon Akuj, nakaneni kisienito esi ayong.”

¹⁴ Kikalout kesi nabo. Nakaneni tonuak Oripa ataakeng tolimok atamar tolot niajokon ani erumor tobong lotunga keng. Sodi kirumeikin Rus nika ataakeng.

¹⁵ Tolimok Naom ngesi tama, “Rus, abong nakain kon lotunga keng ka nakujo keng. Tobongo lotunga kon kirukosi ka ngesi.”

¹⁶ Tatachu Rus tama, “Tojongo akimaima ayong atamar atotiakas ka iyong. Kimiekinae ayong erukosi ka iyong. Ni ilosi iyong, alosi ayong dang. Ni ilomi iyong alom ayong dang. Ngitunga kon kesi eliworosi ngikang, nabo Akuj ngina ilipi iyong ngesi elipi ayong dang.

¹⁷ Ni itoanikini iyong, ngesi atoanikini ayong dang, neni ngesi kanukakinio ayong dang. Ekong ayong atamar ani pekewap ayong ngakiro nugu eringa ngoni nyetoaka, aliwor ayong itwaan nilamam alongaren Akuj.”

¹⁸ Ani ingolikini Naom atamar irichakina Rus akirukor ka ngesi, kililing chek.

¹⁹ Toloto kesi tananga Betleem. Ani enangunete kesi neni, talakaros ngitunga daang a ere kangolo. Tolimut ngaberu tamasi “Erai itwaan en Naom dir a?”

²⁰ Tolimok Naom kesi tama, “Nyikinyarata ayong Naom. Tanyarae ayong Mara kainyo etoron Akuj Naationon eboyor kang.

²¹ Arotokini kolong ayong kanege eyei ibore daang, nakaneni kabuu tokona Akuj Naationon ayong emam ibore tani ni etal. Nyo kinyaritotor esi ayong Naom nakeriraa ayong Akuj kelomak lochan?”

²² Eger ngolo ngesi abongunio Naom anakwap a Maob ka nateran keng Rus na arai aka akwap a Moab. Anangunete kesi Betleem akisiakinet a ngirwa alu alemere erau.