Ngitichisio 1 - ABIBILIA NGAKIRO NAAJOKAK

¹ Kegirakinit iyong Teopilo. Anakitab kang ana a ekingaren, egiri ayong ngitichisio daang lu asubi Yesu ka ngakiro na etatami ngesi na esiakinea etich keng

² tanang akolongit na ayaarere kidiama nadis. Ani eringa ngesi nyeyaara nadis, kichikichik ngesi ngitunga lu aseuni ngesi toliworos ngimeanara keng, a agogongu a Etau a Akuj.

³ A ngirwa a ngitomwon-omwon ekisidi a akitu keng, kidodiun ngesi anikech ngakidodiunet ngakaalak, sodi toyana daang dir atamar eyari ngesi. Taanyungasi kesi ngesi nabo kiyana ka kesi ngakiro a Apolou a Akuj.

⁴ Ani na achunakinotor kesi wapei, todungok ngesi ngakiro na abala, “Nyiirotokis alo Yerusalem, nakaneni kidarutu ainakinet nakalimok ayong esi, ainakinet nakichikak esi Apa.

⁵ Kibatisae Yoana esi a ngakipi, nakaneni ani adaunet a ngirwa a ngidikidio, kibatisao esi a Etau a Akuj.”

Ayaario Yesu kidiama nadis

⁶ Na eriameta ngimeanara aapei ka Yesu, kingita ngesi tamasi, “Ekapolon, inyiakakini iyong tokona Ngisirael Apolou kech a?”

⁷ Tolimok Yesu kesi tama, “Apakang ngesi erekinit ngisaae ka ngirwa a apolou keng, nyerai esi echamit iyenete atamar ori esubakinotor.

⁸ Nakaneni na ebunio Etau a Akuj nikus, kilelebun esi agogongu. Iliworosi ngikaanyunak kang lu iruorosi ngakiro kang alo Yerusalem ka Yudea ka Samaria ta ngiwaitin daang a akwap.”

⁹ Alimunet nguna, yaarae ngesi kidiama nadis ekienyikinito kesi. Sodi edou kimuk ngesi tongopia.

¹⁰ Ani eringa kesi ekienyiyarito kidiama na alosio ngesi, towaa ngitunga ngiarei atipei alo diyete kech enapito ngiworui luakwaak.

¹¹ Sodi tamasi, “Ngitunga a Galilaya, nyo iwaatar esi kaneni ikienyiyaritotor kidiama? Yesu lo ayaar nadis anikus lo, ebonguni loger lopei ianyungareta esi ngesi elosi nadis.”

Itwaan ni elunyokin lotich a Yuda

¹² Tobongosi kesi Yerusalem na aponeta alo Moru a ngikito a akimiet alo arai akilomitait apei alore.

¹³ Na ananguneta kesi lore, sodi todokasi kai na alokidiama na apereenete kesi. Araakasi kesi Petero ka Yoana ka Yakobo ka Andirea ka Pilip ka Tomas ka Bartolomayo ka Matayo ka Yakobo lokookeng a Alipayo ka Simon lo a atiakaru a Salote ta Yuda lokookeng a Yakobo.

¹⁴ Achunanakinosi kesi ilipito aapei ka ngaberu ngache ka Mariam itiokeng a Yesu ka ngikaitotoi keng.

¹⁵ Adaunet a ngirwa a ngidikidio, eriamito ngikanupak lu asibit amiat apei ka ngitomwon-arei. Sodi tonyou Petero tolim tama,

¹⁶ “Ngikaitotoi kang, ajoikinit ngagiran iyookinosi loger lokolong adwarea Etau a Akuj ani a Daudi ngakiro a Yuda alo arikokini Yesu ngitunga lu erumunete.

¹⁷ Arai Yuda erukitos yok kainyo aseunitae atosuba ka ngoni etich.” (

¹⁸ Togiel ngesi amana a ngaropiyae ana aanyuni alotich keng a loaronon, totoan ngesi alomana kangina tobulor akook keng, topudut ngiboro a akook keng daang nikalapatan.

¹⁹ Kiirasi ngitunga daang lu alomito Yerusalem ngakiro nguna, dio tanyarata amana ngina, “Akel Dama,” na erai eger keng atamar, “Amana na a ngaakot.”)

²⁰ “Kona igiritere nakitab a Ngieosio, ‘Ibooyi akai keng kongin, nyeelom itwaan neni.’ Igiritae nabo wache kona, ‘Kilunyokin itwaan iche tosub etich keng.’

²¹ “Tokona bocha, ejoikinit itwaan ngini erai ipei a ngitunga alu kolong kirukit ka ngoni ngirwa daang lukolong kirukitor ngoni ka Ekapolon Yesu,

²² napei kolong ebatisaa Yoana ngitunga, tanang akolongit na alemarere Yesu aniyok yaarae nadis. Ipei a ngitunga kangulu ngesi ejoikinit eliwor ni kianyuni ka ngoni atamar eteyarunio Yesu.”

²³ Sodi tolimunoe ngitunga ngiarei, Yosep lo anyaritae Barisaba (lo arai ekiro eche Yusito) ka Matia.

²⁴ Sodi kilipa kesi tamasi, “Ekapolon, iyeni iyong etau a itwaan kadaang, kidodikinae tokona sua alotunga aluarei kalu ni iseu iyong

²⁵ akisub etich erai emeanara sodi kilunyokin lotich lo aisikini Yuda torei tolot ni asaki ngesi.”

²⁶ Tarama kesi ekura esakete aseun itwaan ipei. Toseunae Matia kimorikin ka ngimeanara lutomon ka epei.