Ngilawi 1 - ABIBILIA NGAKIRO NAAJOKAK

Ngakipeyos na inomio nginerin daang

¹ Tanyara Ekapolon Akuj Musa, kiruorik Akuj aloeam keng sodi tolimok Musa tama,

² “Tolimok Ngisirael kona, itwaan cha daang ni eyauni ibarasit ni ipeyeo, ejoikinit eyauni kerai aite, kori amesek, kori akine.

³ Ani keyau ngesi aite keng toliwor akipeyos, ejoikinit eyauni emong lo emam ni ichwangakina. Ejoikinit ngesi ipeyoe anakituk a eam a Akuj sodi tachamunea Ekapolon Akuj.

⁴ Idokokini itwaan akan keng nakou a ibarasit ani ipeyeo. Ani kikok ngesi neni, eliwor akipeyos ngina na emookere ngesi tolema ngasechesea keng.

⁵ Eari ngesi emong kaneni. Talokookeng a Aron lu eraakasi ngimurok a Akuj, eyaunete ngaakot nia Ekapolon Akuj. Elemunete kesi ngaakot nguna towatakis lowaitin luomwon a ekeno alo a ngakipeyos, alo eyei nakituk a eam.

⁶ Eyengi itwaan ngini ibarasit ni ipeyeo, totubutubu.

⁷ Talokookeng a Aron lu eraakasi ngimurok, erekinete ngakito lokeno lo a ngakipeyos sodi kinokakis.

⁸ Iwaakinete kesi nginerin a ibarasit nakim, kiwaakis tani akou ka nikataronon.

⁹ Ejoikinit itwaan ngini ilotari ngiboro a akook ka ngamuroi, sodi topee emuron a Akuj akipeyos daang alokeno alo a ngakipeyos. Ejoikinit akukuny a akipeyos kangina Ekapolon Akuj.

¹⁰ “Ani kelemu itwaan amesek keng kori akine, ejoikinit eliwor nikile ni emam ni ichwangakina.

¹¹ Eari ngesi ibarasit ngini alowae alo alokwap ekeno a ngakipeyos, sodi towatakis ngimurok ngaakot lowaitin luomwon a ekeno.

¹² Ani ketubutub kerumor, iwaakini emuron a Akuj nginerin daang nakim, kiwaakis tani akou ka nikataronon.

¹³ Ejoikinit itwaan ngini ilotari ngiboro a akook ka ngamuroi sodi tolemik emuron Ekapolon Akuj akipeyos sodi topee daang alokeno alo a ngakipeyos. Ejoikinit akukuny a akipeyos kangina Ekapolon Akuj.

¹⁴ “Ani kelemu itwaan ikeny toliwor akipeyos, ejoikinit erai akuuri kori kidomelio.

¹⁵ Iwaakini emuron a Akuj lokeno lo a ngakipeyos, tomojirik akou torutun, sodi topee alokeno. Toliworos ngaakot keng idokadokasi lowaitin a ekeno a ngakipeyos.

¹⁶ Elemari ngesi etole a ikeny aapei ka ngikujit, sodi tomurak ni iwaanakinio ekuron, ni eyei kide ekeno a ngakipeyos.

¹⁷ Etingi ngesi ngabeben sodi kibeletetea ikeny, nakaneni nyeerut ngabeben. Ani erumor topee elemwaana. Ejoikinit akukuny a akipeyos kangina Ekapolon Akuj.