Ngigalatiae 1 - ABIBILIA NGAKIRO NAAJOKAK

¹ Paulo ngesi igirunit abarua naga, meere itwaan anyarae Paulo. Erai Yesu Kiristo ka Akuj Apa lo eteyaruni Kiristo ngesi anyarae toliwor emeanara.

² Imalaate ngikaitotoi daang lu kirukit ka ayong kane ngitunga a ngikanisae lu eya Galatia.

³ Agasi atamar kitaanyu esi Akuj Apayok ka Ekapolon Yesu Kiristo ajokis ka ekisil.

⁴ Alemun Kiristo kotere ngasechesea yok erai iwapit ngakiro a Akuj yok ana erai Apa, sodi kitoyuunea ngoni anakiro anaaronok a ngirwa kalu.

⁵ Min apolou nikeng nakajik! Aamen.

Ngakiro Naajokak

⁶ Katalarito ayong ngakiro kus! Abe imiekis esi atipei lokolong kinyarae esi a ajokis a Kiristo, sodi kiwapa ngakiro naajokak ngache nagelayek.

⁷ Emam “ngakiro naajokak ngache,” nakaneni alimunit ayong nugu kainyo eya ngitunga ngiche lu kichanete esi esakete akiloch ngakiro naajokak a Kiristo.

⁸ Ani kitatam esi epei kosi kori emalaikat lo ebunit anadis ngakiro nagelayek na nyikote na kitatami sua esi, ejoikinit ngesi eliwor lo ilamam!

⁹ Kilimu kolong sek sua, nakaneni alimunit tokona ayong nabo, ani keyei itwaan idio ni kitatami esi ngakiro ngache na nyikote nakolong inupa esi, ejoikinit ngesi eliwor lo ilamam!

¹⁰ Ekoe, esibit tokona ibore en asaki ayong akitalakar ngitunga a? Mam jik! Erai Akuj ngesi asaki ayong akitalakar! Asaki ayong katoyenikis ngitunga a? Arai atoringa ayong ekoni neni, pekaraunit ayong jik ekasuban etich a Kiristo.

Eger lo araunea Paulo emeanara

¹¹ Ngikaitotoi kang, asaki toyena atamar meere ngakiro naajokak etatami ayong na eraakasi ngitunga irokunito.

¹² Peanyuni ayong ngakiro nguna ani a itwaan, kori emam itwaan ketatam ayong. Yesu elope ngesi kedodikini ayong.

¹³ Kilimokin esi ngakiro a eboyor kang kolong eringa ayong ewapit edin a Ngiyaudi. Aboliar ayong ngitunga a ekanisa a Akuj lokojokon, asaki akinyasun jik.

¹⁴ Ewapit ayong edin a Ngiyaudi noi akidwang nginaket kang daang, nabo dang, erichakinit ayong noi ngitalio kata apaakang.

¹⁵ Nakaneni katoseu Akuj ayong a ajokis keng kolong eringa ayong tani nyidouno. Sodi katanyara a ajokis keng

¹⁶ ani naatiakunea ngesi akidodikin ayong Lokookeng sodi etatamea ayong ngibukui lu nyerai Ngiyaudi Ngakiro Naajokak keng, amam ngakiro engituuni ayong alotunga.

¹⁷ Nyeloto ayong tani Yerusalem ni aya ngulu kolong aberakin aliwor ngimeanara. Esiauni mono ayong atolot Arabia ani erumor atobong nabo Damasko.

¹⁸ Arai adaunet a ngikaru a nguuni ngesi alosio ayong Yerusalem aanyun ka Petero, sodi atopero ayong inaa ngirwa ngitomon ka nguomwon.

¹⁹ Nyeanyuna ayong ka emeanara eche mati Yakobo, lo erai lokaatokeng a Ekapolon Yesu.

²⁰ Eraakasi ngakiro na egiri ayong ngaka iteni. Eyeni Akuj atamar nyeruoro ayong alioko!

²¹ Ani erumor atolot ayong nakwapea a Siria ka Kilikia.

²² Pekayenete ayong ngikiristoi a ngikanisae alu aya Yudea ngirwa ngulu.

²³ Araakasi ngakiro ngapei make ayenete kesi, na eruorosi luche ebalasi, “Itwaan nikolong kiboliar ngoni, itatami tokona ngakiro a Akuj nakolong asaki akinyasun!”

²⁴ Sodi kipuruut kesi Akuj kotere ayong.