Neemia 1 - ABIBILIA NGAKIRO NAAJOKAK

¹ Eraakasi ngakiro na isisaunitae kane na asubakini Neemia lokookeng a Akalia. Elap lo a Kislep ekaru lo a ngitomwon-arei lo araakar Artachasta ekapolon a Persia, ayei ayong Neemia lore a Susa lo arai ere loapolon.

Ngakiro na asaki Neemia kotere Yerusalem

² Abu epei kata lokaatokang lo anyaritae Anani todolu alo Yuda erukito ka ngitunga ngiche. Engit ayong kesi ngakiro a Yerusalem ka ngakiro a Ngiyaudi aluche kosi abongunete anarikonot alo Babilonia.

³ Katolimokis kesi ayong tamasi, “Ngiyaudi lukolong abuchun anarikonot tobongut nakwap, eyakasi lochan kirumito ngileech. Aukor awas a Yerusalem, nabo anomiasi ngidorin keng akim.”

⁴ Ani eirari ayong ngakiro nguna daang, abu eboikin ekalou. Egor ayong atosutonok a ngirwa alukaalak nyimuja. Elip Akuj

⁵ atama, “Ekapolon Akuj na irai Akuj a adis! Ipol iyong, nabo irai naketimon. Irichakinit iyong achamunet kon ka amina na nyedaun kotere ngulu kiminasi iyong ka akiwap ngakiro na idunguni iyong.

⁶ Todeta akit kon Ekapolon Akuj. Kiira akilip kang na elipitor akwaar ka apaaran kotere Ngisirael lu eraakasi ngikasubak etich kon. Alimorit ayong atamar kisechit sua Ngisirael. Iteni dir, kisech ayong ka taapaakang.

⁷ Kisubea sua iyong ngakiro naaronok noi nabo nyiwapa ngakiro nakidungok iyong sua. Nyirichakina sua ngitalio lu kolong kiinakini iyong sua kisitoru nia Musa alo erai ekasuban etich kon.

⁸ Kitamu tokona ngakiro nakolong idungokini iyong Musa ibala, ‘Ani pekimunokis esi Ngisirael ayong, kapetakini ayong esi lobukui luche.

⁹ Nakaneni ani kibongokis esi ayong tosuba ngakiro na adunguni ayong, tani bo kipetara esi lowaitin daang a akwap, kabuuni ayong esi ni aseu ayong atamar kelipeenere ayong.’

¹⁰ “Ekapolon Akuj, eraakasi lugu ngikasubak etich kon a ilope. Iyuuni kolong iyong kesi a apolou kon anaationon ka ngikilinga kon.

¹¹ Todeta akit kon kiira akilip kang. Kiira tani ngakilipasinei a ngikasubak etich kon alu eminasi arima iyong. Kitojok ngakiro kang akolongit naga, sodi kitiliwo ekapolon logo lo a ngisien anikang.” Ngirwa ngulu, ayong etamaseene ekapolon emuna.