Naum 1 - ABIBILIA NGAKIRO NAAJOKAK

¹ Eraakasi nugu ngakiro na adwario kotere Ninewi. Eraakasi ngakiro na edodikinio Naum lo abunit alo Elikoch.

Engoikinit Ekapolon Akuj Ninewi

² Erai Ekapolon Akuj, Akuj na etereku, tatachanakini ngakiro. Etachanakini ngakiro tonyunyura. Iriraene ngesi ngimoe keng, nabo enyunyuranakin kesi.

³ Nyengoyeene Ekapolon Akuj atipei nabo erai ngesi na ngikilinga aluationok. Nyelakanakini ngesi lu esechito eloose nyirira. Elosi ngesi alokuwam alo ipiripiri. Eraakasi ngidowon apua a ngakejen keng.

⁴ Ikilakini ngesi anam toon! Itooni ngesi ngangololin daang. Tooniyosi ngaroatin a Bachan. Tokwangia emoru a Karimel tongopiasi ngatur a Lebanon.

⁵ Erikirikokinete ngimoru alongaren keng, tokeiasi ngimukur. Emaranikini akwap alongaren keng, ee robo, emaranikini akwap ka ibore daang ni eyei neni.

⁶ Ngae eweikini angoit keng? Ngae enaikini apipilu a anyunyura keng? Ebukuno anyunyura keng loger a akim. Ebwangi ngesi ngatabab kiela.

⁷ Ejok Ekapolon Akuj, erai ngesi awas nakaagongon akolongit na a ngichan, echoikinit ngulu emotunosi nikeng akimech.

⁸ Emunyari ngesi ngimoe keng, loger a akaale ana eneteuna. Irisi ngimoe keng tanang naribu.

⁹ Anukiro itukotor esi Ekapolon Akuj? Kimunyari ngesi esi. Emam itwaan itepegakini Ekapolon Akuj ngaarei

¹⁰ Loger a ngiikwa alu ekodakina, imunyarosi, ee robo, loger a ngatunyeny ana eokito.

¹¹ Meere nikus kolong abunio itwaan ni atuki ngakiro naaronok ani a Ekapolon Akuj sodi kitam aronis a?

¹² Isuruori Ekapolon Akuj Ngisirael ebala, “Tani kejwoko ngitunga a Asiria talalak, emunyario tongopiasi. Tani bo ketaanyunit ayong esi apipilu, nyabongokini nabo.

¹³ Angedangedaari ngamasea nakienitotor kesi esi, atachaka ngarukanes nakienitere esi.”

¹⁴ Adungu Ekapolon Akuj nugu kotere Asiria, “Ekisari ekiro kus nyeerubak elimitoe. Atubori ngakujo kus nasubuna ka na itekeiaritae na eyakasi nakais a ngakujo kus. Kabokakini esi ngalielin kainyo nyechamit iyarete!”

¹⁵ Kingolik, emotuno emeanara alomoru, eyaunit ngakiro naajokak, elimorit ekisil! Ee Yuda, kirichak ngisukukui kon, kirichak ngakikongiet kon. Nyeringa nabo luaronok kinyoikinete iyong. Amunyar kesi jik!