Matayo 1 - ABIBILIA NGAKIRO NAAJOKAK

Ngirora kata apaakeng a Yesu Kiristo

¹ Erai akitab naga aka ngirora lu ngika ta apaakeng a Yesu Kiristo alo erai ales a Daudi ka ales a Aburaam.

² Auruni Aburaam Isaka, touriu Isaka Yakobo, touriu Yakobo Yuda ka ngikaitotoi keng.

³ Touriu Yuda Peres ka Sera (anyaritae itiokech Tamar). Touriu Peres Esiron. Touriu Esiron Ram.

⁴ Touriu Ram Aminadab. Touriu Aminadab Nachon. Touriu Nachon Salimon.

⁵ Touriu Salimon Boas (anyaritae itiokeng a Boas Raab). Touriu Boas Obed (anyaritae itiokeng a Obed Rus). Touriu Obed Yese.

⁶ Touriu Yese ekapolon Daudi. Touriu Daudi Solomon (arai sek itiokeng a Solomon aberu a Uria).

⁷ Touriu Solomon Reoboam. Touriu Reoboam Abija. Touriu Abija Asa.

⁸ Touriu Asa Yeochapat. Touriu Yeochapat Yoram. Touriu Yoram Usia.

⁹ Touriu Usia Yosam. Touriu Yosam Aas. Touriu Aas Esekia.

¹⁰ Touriu Esekia Manase. Touriu Manase Amon. Touriu Amon Yosia.

¹¹ Auruni Yosia Yeoyakin ka ngikaitotoi keng ngikaru lu arikere Ngisirael nakwap a Babilon.

¹² Na arikorere ngitunga Babilon, touriu Yeoyakin Chealitiel. Touriu Chealitel Serubabel.

¹³ Touriu Serubabel Abiud. Touriu Abiud Eliakim. Touriu Eliakim Asor.

¹⁴ Touriu Asor Sadok. Touriu Sadok Akim. Touriu Akim Eliud.

¹⁵ Touriu Eliud Eleasar. Touriu Eleasar Matan. Touriu Matan Yakobo.

¹⁶ Touriu Yakobo Yosep ekile a Mariam ana arai itiokeng a Yesu alo enyaritae Kiristo.

¹⁷ Nakaneni ayakasi ngalesea ngatomon ka ngoomwon napei ana Aburaam tanang Daudi. Ayakasi ngalesea ngache ngatomon ka ngoomwon napei ana Daudi tanang ngikaru lu arikere Ngisirael nakwap a Babilon. Ayakasi ngalesea ngache ngatomon ka ngoomwon napei alokaru alu arikonot kangulu tanang ngirwa lu edounere Kiristo.

Akidounet a Yesu Kiristo

¹⁸ Ekoni akidounet a Yesu Kiristo nege. Anerit Yosep itiokeng a Yesu na enyaritae Mariam. Ani eringa kesi nyepero, apon Mariam toyenae atamar epoti ngesi ikoku kotere agogongu a Etau a Akuj.

¹⁹ Yosep ngolo anerit ngesi asubeene jiik ngakiro nguna iyookino. Kona peasakea ngesi Mariam eriamuni ngileech, abu nyisileereu ngakiro nguna, tasak atiaka ka Mariam ekiilingat.

²⁰ Ani eringa ngesi itami ngakiro nguna, bu Emalaikat a Akuj nikeng kisuruja ngesi tama, “Iyong Yosep lo irai eka a ales a Daudi, nyiiker akuut Mariam, kainyo erai agogongu a Etau a Akuj apotio ngesi.

²¹ Idouni ngesi ikoku nisapat ni ilimokini iyong ekiro be Yesu, kainyo eyuuni ngesi ngitunga keng anasechesea kech.”

²² Asubasi nugu daang sodi kiyookinotor nguna kolong alimuni Ekapolon Akuj alokadwaran keng tama:

²³ “Epoti apese na nyepero ka ekile a ache kidou ikoku nisapat, ni enyarao Imanuel” (ngesi atamar, “Kirukit ngoni ka Akuj”).

²⁴ Na akienyunea Yosep kiuut Mariam loger lo alimokinea Emalaikat a Akuj.

²⁵ Nyepero Yosep ka Mariam eringa idia nyidouno. Tolimok Yosep ngesi ekiro be Yesu.