Isaya 1 - ABIBILIA NGAKIRO NAAJOKAK

¹ Eraakasi ngakiro na eyakasi nakitab naga ngakitoodikinet na edodikini Akuj Isaya lokookeng a Amos, kotere Yuda ka Yerusalem, ngirwa lu araakatar Usia ka Yosam, ka Aas ta Esekia ngikapolok a Yuda.

Ekilak Akuj ngitunga keng

² Tama Ekapolon Akuj, “Ee adis topupok. Ee akwap, todeta akit, kiirasi ngakiro na eruoro ayong! Kangero ayong ngide lukolong etanuni ayong etopolou.

³ Eyenete ngaatuk ilope kech, eyenete ngisikiria nipalem isumujea ilope kesi. Nakaneni nyeyenete Ngisirael lu eraakasi ngitunga kang. Emam kesi ngatameta nakayeneta ayong.”

⁴ Wae, ebukut lokasechan, ileleba esi akisech, iraakasi esi ngalesea a ngikasechak, lu esubete naaronok! Itilileta esi Ekapolon Akuj na erai Akuj a Isirael na italeuno. Ibongokis esi ngesi ngakawa.

⁵ Nyo irubakinitotor esi ingerito Akuj? Kori isakete kirirae nabo noi. Isirael, eburuchiarito sek ngajemei akou kon nabo ipirisaara etau kon.

⁶ Napei anakou tanang nakeju, emam ni ejok anakwaan kon. Eyakasi ngagwaranaret, ka ngajemei ta ngajemei na eiyete ngaakot, eyakasi nakwaan kon. Nyilotara ngajemei kon, kori nyeena. Nyiwasakina akimiet.

⁷ Enyasun akwap kus. Enom ngirerea kus a akim. Erikasi ngitunga a akwap anache ngiboro kus, anakonyen kus. Enyasut ibore daang.

⁸ Edong Yerusalem bon, erai ere lo iriamito ngajorei. Ikoni epem alokiding amana a ngimusabib, kori mana a ngamunye.

⁹ Arai kolong Akuj Namerikanyer nyiimiek ngidikidio yok topuunos, kemunyaritae Yerusalem jik loger a Sodom ka Gomora.

¹⁰ Yerusalem, ngikapolok kon ka ngitunga kon ekokis lua Sodom ka Gomora. Topupokisi ngakiro na elimunit Ekapolon Akuj. Todetasi ngaki kiirasi ngakiro nakitatami Akuj yok.

¹¹ Ebala, “Nyo kang ngakipeyos kus nakaalak? Kaupa ayong ngakipeyos na inomio, na ngimesekin ka ngibaren lukanakunak. Ketuburut ayong ngaakot a ngimongin ka na ngimesekin aluuchik ta ngikora.

¹² Ngae ebala esi inunae ayong ngibaren lugu daang na iponeta akilip? Nyo idamidameta esi akai kang?

¹³ Nyiiyaut nabo ngakipeyos kus na eraakasi pas. Kakadaki ayong aurus a emitina kus alo inomio. Nyanaikini ayong ngisukukui kus lu eanyungarere elap, ka ngasabatoi kus ta akiriamariam kus na ilipeta.

¹⁴ Aremokino ayong ngisukukui kus lu eanyungarere elap, ka ngirwa a esukukuu lu eseunitae. Kechan kesi ayong, nyeringa etiri.

¹⁵ “Na ibauneta esi ngakan kus ilipito, emuki ayong ngakonyen kang nyekaanyunga esi. Tani kilipa esi nikooyen, nyeirari ayong kainyo kikudito esi ngaakot.

¹⁶ Kitosegas kitaleunos, tachadasi naaronok anakonyen kang. Ee robo, tapalikisi naaronok,

¹⁷ kitatamas akisub naajokak. Tasaka ngakiro na eriyan. Kingarakis ngulu ichiakiaritae. Totiakakisi ngikokiok nguna eriyan. Toikisi ngapuseru.”

¹⁸ Ebala Ekapolon Akuj, “Potu tokona atopupokinos aapei. Tani kerengak ngasechesea kus puu, ekwangearosi kea. Tani kerengak loger a emunyen aloarengan, ekwangearosi kikokis ngajul a ngamesekin.

¹⁹ Ani kichamito esi akiwap ngakiro kang, inyamete ngamuja naajokak na ekoniunete anakwap.

²⁰ Nakaneni ani kingero esi ayong, kimunyario esi a akwara, kainyo ayong Ekapolon Akuj alimu nguna.”

Ere lokasechan

²¹ Ere lokolong amunoi, ekwaanikin ka amalaat. Asubi kolong ngakiro na eriyan. Eleleba kolong ngitunga lu etenooko, edong tokona ngikaarak make.

²² Yerusalem, ikwaan kolong iyong ka akwangat, iliwor tokona pas. Ikoni kolong iyong emuna loajokon, ichorimim tokona.

²³ Eraakasi ngikarikok kon ngirukooi, ngirukitos a ngikokolak. Eminasi daang ibore nidiaket ka ebachit. Nyeikinito lukokiok alokies. Nyepupokinete ngakiro a ngapuseru na eponeta nikech.

²⁴ Tokona bocha, topupokisi ngakiro na alimu Akuj Namerikanyer, na erai Akuj naationon. Ebala, “Esi ngimoe kang, kanyunyurikin ayong esi atatachak naaronok.

²⁵ Kanyoikini ayong esi, ketosegi loger a asuat ana itosegio, ekisa elos kus daang.

²⁶ Katobuak ngikapolok ka ngikesuruorok lu ikote lukolong a ekingaren. Sodi tanyarae Yerusalem ere lo etenoono, lo emunoi.”

²⁷ Eyuuni ngesi Yerusalem a ngakiro ana eriyan, itwaan daang ni eyei neni ni elungi ngasechesea keng, eyuunio a ateneanut.

²⁸ Nakaneni emunyari Ekapolon Akuj ngitunga daang lu engerito ngesi ka ngikasechak. Eari Ekapolon Akuj daang lu aisikis ngesi.

²⁹ Kitingete esi ngileech kotere ngichokei lu ilipito esi ka ngamanat na iseut esi akilip.

³⁰ Ikwaanikinosi esi ka echoke lo eoniyori ka amana na emam ngakipi.

³¹ Ngulu eyenikinitae, inyasunete ngakiro naaronok esubete kesi, loger lo edetakinor ekatwanyit lonyia tonomia. Emam itwaan epedori akiratakin nginyas ngulu.