Ekimar 1 - ABIBILIA NGAKIRO NAAJOKAK

Ekimar a Ngisirael lo ekingaren

¹ Akolongit na ekingaren a elap alo a ngiarei, ekaru loa ngiarei kerotokis Ngisirael alo Misiri kerumor, abu Ekapolon Akuj kisuruor Musa alotooma eam keng, anariet a Sinai. Tolimok tama,

² “Echamit iyong ka Aron imarunete Ngisirael, kimara a ngimacharin ka ngawiyei. Kigira ngirora a ngikiliok kadaang

³ alu eraakasi ngikaru kech ngitomwon-arei kori lu iporito ngikaru kech ngitomwon-arei, lu epedorete alosit lojie.

⁴ Alokitela a epei, emini ekarikon a emachar a epei lo kingarakini esi.

⁵ Ngirora a ngikiliok alu kingarenikinete esi kesi lugu. Alokitela a Reuben, eliwor Elisur lo erai lokookeng a Chedeur.

⁶ Alokitela a Simeon, eliwor Chelumiel lo erai lokookeng a Surichadai.

⁷ Alokitela a Yuda, eliwor Nachon lo erai lokookeng a Aminadab.

⁸ Alokitela a Isakar, eliwor Nesanel lo erai lokookeng a Suar.

⁹ Alokitela a Sebulun, eliwor Eliab lo erai lokookeng Elon.

¹⁰ Ani eyakasi talokookeng a Yosep, alokitela a Epiraim, eliwor Elichama lo erai lokookeng a Amiud. Alokitela a Manase, eliwor Gamaliel lo erai lokookeng a Pedasur.

¹¹ Alokitela a Benjamen, eliwor Abidan lo erai lokookeng Gideon.

¹² Alokitela a Dan, eliwor Ayeser lo erai lokookeng a Amichadai.

¹³ Alokitela a Acher, eliwor Pagiel lo erai lokookeng a Okiran.

¹⁴ Alokitela a Gad, eliwor Eliasap lo erai lokookeng a Deuel.

¹⁵ Alokitela a Naputal, eliwor Aira lo erai lokookeng a Enan.”

¹⁶ Ngulu kesi lu aseun alotunga eraakasi ngikarikok alotela kech taraakas nabo ngikarikok alomacharin kech.

¹⁷ Apot Musa ka Aron kingarakinos ka ngikiliok lutomon ka ngiarei ngulu.

¹⁸ Ani akolongit na ekingaren a elap alo a ngiarei, apot kesi tochunakis ngitunga daang wapei kimara kesi a ngimacharin ka ngawiyei sodi kigira ngirora kech. Apon ngikiliok daang lu araakasi ngikaru kech ngitomwon-arei kori lu eporito ngikaru kech ngitomwon-arei, kigirae ngirora kech sodi kimarunae,

¹⁹ loger losek adungokinitor Ekapolon Akuj Musa. Emari Musa ngitunga anariet a Sinai.

²⁰ Ngikiliok daang lu araakasi ngikaru kech ngitomwon-arei kori lu eporito ngikaru kech ngulu, lu epedorete alosit lojie, emario loger logo a ngimacharin ka ngawiyei. Reuben lo arai lokookeng a Yakobo lo ekingaren,

²¹ arai ekimar a ngitunga a ekitela keng 46,500.

²² Alokitela a Simeon,

²³ arai ekimar a ngitunga kangulu 59,300.

²⁴ Alokitela a Gad,

²⁵ arai ekimar a ngitunga kangulu 45,650.

²⁶ Alokitela a Yuda,

²⁷ arai ekimar a ngitunga kangulu 74,600.

²⁸ Alokitela a Isakar,

²⁹ arai ekimar a ngitunga kangulu 54,400.

³⁰ Alokitela a Sebulun,

³¹ arai ekimar a ngitunga kangulu 57,400.

³² Alokitela a Yosep, alu eraakasi ngitunga a Epiraim,

³³ arai ekimar a ngitunga kangulu 40,500.

³⁴ Alokitela a Yosep alu eraakasi ngitunga a Manase,

³⁵ arai ekimar a ngitunga kangulu 32,200.

³⁶ Alokitela a Benjamen,

³⁷ arai ekimar a ngitunga kangulu 35,400.

³⁸ Alokitela a Dan,

³⁹ arai ekimar a ngitunga kangulu 62,700.

⁴⁰ Alokitela a Acher,

⁴¹ arai ekimar a ngitunga kangulu 41,500.

⁴² Alokitela a Naputal,

⁴³ arai ekimar a ngitunga kangulu 53,400.

⁴⁴ Ngulu kesi emarunete Musa ka Aron ingarakina ka ngikiliok lutomon ka ngiarei lu araakasi ngikapolok a ngimacharin kech, eweikinit epei kech daang ngitunga a awi a apei.

⁴⁵ Alotunga a Ngisirael kadaang, arai ekimar a ngikiliok alu araakasi ngikaru kech ngitomwon-arei kori lu eporito ngikaru kech ngitomwon-arei, lu apedorete alosit lojie,

⁴⁶ arai ekimar kech 603,550.

⁴⁷ Nakaneni peemarunitae Ngilawi aapei ka ngitela luche,

⁴⁸ kainyo alimokinit sek Ekapolon Akuj Musa tama,

⁴⁹ “Ani imaruni ngikiliok lu epedorete alosit lojie, nyiimarak lua ekitela a Lawi.

⁵⁰ Nakaneni kiwaak kesi toweikis eam kang ka ngiboro keng daang. Edakete kesi eam ka ngiboro keng. Esubete etich alotooma eam, nabo edukokinete adakar kech kiriam eam.

⁵¹ Ani cha eramakinio wache, toyatasi Ngilawi eam kang sodi ani enangi ni elomio, kigurosi. Eario itwaan cha daang ni eapuuni diyete eam.

⁵² Todukokis Ngisirael luche daang ngadakarin a ngalooso, itwaan daang erukito ka ngitunga keng, toduk kwap abendera keng a ilope.

⁵³ Nakaneni edukokinete Ngilawi adakar kech kiriam eam. Iyokiyete kesi eam kang sodi nyeebunio itwaan iche diyete, sodi nyaangoik ayong Ngisirael daang.”

⁵⁴ Apot Ngisirael tosuba ngakiro daang nakolong adungokinit Ekapolon Akuj Musa.