Daniel 1 - ABIBILIA NGAKIRO NAAJOKAK

NGAKIRO A DANIEL KA NGIPAALON KENG ( 1:1–6:28 ) Ngisorok lu ayakasi nawi a Nebukadinesa

¹ Ekaru lo a nguuni lo araakar Yeoyakim ekapolon a Yuda, abu ekapolon a Babilon lo anyaritae Nebukadinesa tangaa ngajorei Yerusalem, sodi kisiriam.

² Abu Ekapolon kiwaak Yeoyakim lo arai ekapolon a Yuda nakan a Nebukadinesa. Tolema Nebukadinesa tani ngiboro ngiche a akai a Akuj yaa kai a akuj keng, kiwaak ngiboro ngulu lodulae a akuj keng.

³ Abu ekapolon todungok Achipenas lo arai ekapolon a ngikasubak etich atamar toriku Ngisirael epewae lu eraakasi ngika a awi a ekapolon, ka ngikajakaanak.

⁴ Ngisorok lu emam ni esechech, lukebuseak, lu echwaaka anakiro kadaang, lu eosok, lu isomato, toyenete akisub etich alokai a ekapolon. Tolimok ekapolon Achipenas atamar kitatam kesi akisomare ngakiro ka akiruor angajep a Ngibabiloniae.

⁵ Todung ekapolon atamar kisumujai kesi akimuj a awi keng, ka akitamat emuna. Asakio kesi kitatamae a ngikaru a nguuni, ani adaunet a ngikaru kangulu, tosuba etich a ekapolon.

⁶ Ayakasi tani Daniel, ka Anania, ka Mikael ta Asaria lua ekitela a Yuda tooma lotunga lu etatamio ngulu.

⁷ Abu ekapolon a ngikasubak etich tolimok kesi ngirora. Daniel tanyarae Belitechasa, Anania tanyarae Chadrak, Mikael tanyarae Mechak, ani Asaria tanyarae Abedinego.

⁸ Nakaneni totiaku Daniel atamar nyenyasun kotere akinyam akimuj a ekapolon, ka akimat emuna lo emaseene ngesi. Abu ngesi tolimok ekapolon a ngikasubak etich ngolo atamar kepaka ngesi anakimuj nyeenyasunor.

⁹ Abu Akuj kitojok etau a ekapolon kangolo tacham Daniel, kidodiu ngisien ani a Daniel.

¹⁰ Tolimok ekapolon ngolo Daniel tama, “Aemit ayong kainyo epedori ekapolon kang lokolong alimuni atamar kiinakin esi akimuj ka emuna keng, aanyungar esi kikarit akidwang ngisorok luche lua anaket kus. Ani kikok neni, emam ibore iratakini ekapolon atubor akou kang.”

¹¹ Sodi tolimok Daniel itwaan ni erumunit ekapolon a ngikasubak etich aweikin Daniel, ka Anania, ka Mikael ta Asaria tama,

¹² “Kiningoe kare mono sua ngikasubak etich kon a ngirwa a ngitomon, kiinak ngimomwa atanyama ka ngakipi atamata.

¹³ Ani erumor kiseme ngireetin kosi alongaren kon, ka ngireetin a ngisorok alu enyamete akimuj naajokon a ekapolon, sodi kitosubakinea sua ngikasubak etich kon ngakiro nakisubakinea, itemem ka nguna ianyungari.”

¹⁴ Abu ngesi kiira ngakiro nakech nguna, sodi kining kesi a ngirwa a ngitomon.

¹⁵ Adaunet a ngirwa a ngitomon, akilikilete ngawat kech noi, totumito akidwang ngisorok lu anyamete akimuj a ekapolon.

¹⁶ Tachada ekaweikinan ngolo akimuj a ekapolon ka emuna lo asakio kesi tamata, nak kesi ngimomwa make.

¹⁷ Ani ngisorok luomwon ngulu, kitoosu Akuj kesi noi anakisomare ka achwaanu. Toyen Daniel eger a ngakisingolikinet kadaang, ka akirujare.

¹⁸ Ani adaunet a ngirwa alu kolong adungunit ekapolon atamar torikunere kesi ngaren keng, apon torikoroe kesi nia ekapolon Nebukadinesa.

¹⁹ Kisiruor ekapolon kesi. Alosorok kangulu kadaang, amam ngiche nabo lu ekote Daniel, ka Anania, ka Mikael ta Asaria. Kanguna, tosuba kesi etich a ekapolon.

²⁰ Anakiroit kadaang a aosou ka achwaanu ana engisi ekapolon kesi, torukau kesi eosok noi idwangito ngikekeriak ka ngimurok a akwap ana apolokinit ngesi, ngakidwanget ngatomon.

²¹ Torubak Daniel eyei neni tanang ekaru lo ekingaren a ekapolon Korech.