Akisiakinet 1 - ABIBILIA NGAKIRO NAAJOKAK

Eger lo asubere akwap

¹ Kolong anakisiakinet, asubuni Akuj adis ka akwap.

² Amam ibore ekwaanatar akwap, peapedorio atamar erai akwap nyo. Aribokinit ngakipi na aburuchiarito ibore daang. Alosi Etau a Akuj alokidiama ngakipi.

³ Sodi tolim Akuj tama, “Ejoikinit akicha emini.” Min akicha.

⁴ Sodi kingolik Akuj atamar ejok akicha. Totiak Akuj akicha ka aribu.

⁵ Tanyara Akuj akicha Apaaran, ani aribu tanyara Akwaar. Toliwor ibore atabong ka ataparach, a akolongit ana a ekingaren.

⁶ Sodi tolim Akuj tama, “Ejoikinit emini atorite kiding ngakipi na etiaki ngakipi ngatiaket ngaarei.”

⁷ Tosubak Akuj atorite ngina sodi totiak ngakipi na ayakasi kidiama atorite ka ngakipi na ayakasi kwap keng. Tosubakin nguna loger ngolo.

⁸ Sodi tanyara Akuj atorite ngina Adis. Toliwor ibore atabong ka ataparach, a akolongit ana a ngaarei.

⁹ Sodi tolim Akuj tama, “Ejoikinit ngakipi na eyakasi kwap adis echunakinosi wapei tatakanu akwap nakoonon.” Sodi tosubakin nguna loger ngolo.

¹⁰ Tanyara Akuj nikoonon Akwap, ani ngakipi na achunakina wapei tanyara Anam. Kingolik Akuj nguna atamar ejokak.

¹¹ Sodi tolim Akuj tama, “Ejoikinit akwap elibuni, toruput ngikito lu eyakasi ngichok, nabo toruput ngikito lua ageor ka luche. Toruput ngikito lugelagelae anakwap a eger kech.” Sodi tosubakin nguna loger ngolo.

¹² Tolibu akwap ngaukea ngagelagelae a ngikito. Toruput ngikinyam lu itao namanat ka ngikito a ageor, ta ngikito luche lua ngichok. Sodi kingolik Akuj nguna atamar ejokak.

¹³ Toliwor ibore atabong ka ataparach, a akolongit ana a ngauni.

¹⁴ Sodi tolim Akuj tama, “Ejoikinit epete ngiborei lu echayete natorite a adis totiaka apaaran ka akwaar. Toliworos kesi eyenere ngirwa ka ngikaru.

¹⁵ Echayete kesi anatorite a adis minio akicha nakwap.” Sodi tosubakin nguna loger ngolo.

¹⁶ Tosubak Akuj ngiborei lu echayete luapolok ngiarei, topolok akolong apaaran, topolok elap akwaar. Tosubak tani ngikanyer.

¹⁷ Kiwaak Akuj ngiborei lu echayete ngulu natorite a adis, sodi kinwakut akwap

¹⁸ ka apolokin apaaran ka akwaar nabo totiaka akicha ka aribu. Sodi kingolik Akuj nguna atamar ejokak.

¹⁹ Toliwor ibore atabong ka ataparach a akolongit ana a ngoomwon.

²⁰ Sodi tolim Akuj tama, “Ejoikinit ngiborei lu eyarete ilelebun nakipi, nabo ejoikinit ngikieny eporito anatorite a adis ana eyei kidiama akwap.”

²¹ Sodi tosubak Akuj ngitieng luapolok a anam ka ngiborei daang lu eyarete lu eyakasi nakipi, ta ngikieny daang. Sodi kingolik Akuj nguna atamar ejokak.

²² Topia Akuj kesi tama, “Ngiborei daang lu iyakasi nakipi, toureta kileleba anam.” Tolimok ngikieny atamar talalakearos anakwap.

²³ Toliwor ibore atabong ka ataparach, a akolongit ana a ngakan.

²⁴ Tolim Akuj tama, “Ejoikinit akwap ilelebun ngitieng lu eyarete lugelagelae lu ikote ngibaren ka ngiborei lu eliato ta ngitieng lu alomoding.” Sodi tosubakin nguna loger ngolo.

²⁵ Tosubak Akuj etiengit a moding a eger keng, ani ibarasit tosubak a eger keng, ani ibore daang ni eliat tosubak a eger keng. Sodi kingolik Akuj nguna atamar ejokak.

²⁶ Sodi tolim Akuj tama, “Atosubakisi itwaan kikwaanikin ka ngoni, sodi topolok ngikolia, ka ngikieny, ka ngitieng, ka akwap daang, ta ibore cha daang ni eliat alokwap.”

²⁷ Sodi tosubak Akuj itwaan ikwaan ka ngesi. Tosubak Akuj ekile ka aberu.

²⁸ Topia Akuj kesi, sodi tolimok tama, “Toureta, talalaketa nabo topetakinos wadaang, toreut ibore daang. Topolokisi ngikolia, ka ngikieny, ta ngiborei daang lu eliato analup.”

²⁹ Tolim Akuj tama, “Kingolik a, kainak ayong iyong ekitoe daang lo eyei nakwap lo ekoniununi echokit, ta ekitoe daang a ageor lo eyei echokit. Eliworosi akimuj kus.

³⁰ Ani etiengit daang lo eyei nakwap, ka ikeny daang, ta ibore daang ni eliat nabo tarai ni eyari, nginyia kesi eliworosi akimuj kech.” Tosubakin nguna loger ngolo.

³¹ Taanyunga Akuj ibore daang ni asubi ngesi kingolik atamar ejok noi. Toliwor ibore atabong ka ataparach a akolongit ana ngakan-kapei.